1 Vakorintho 12
12
1Kalunu, avamitu, si nyenya mu vule kumanya amakuva gevihaanwa vya Roho. 2Mu manya kuli mwa li ave Tsihiri, mwa gotidzwa ni mu londa vifwananyi vi ta li nomwoyo, kuli mwimirirwa. 3Kigira yaga mmannya mwinye si ha li nomundu u volanga mu Roho wa Nyasaye, u vola, Yesu a ve lilaamwa; kandi si ha li nomundu u nyala kuvola Yesu a veye Mwami ni bu ta li mu Roho Mutakatifu.
4Ha veye netsing'ano tsyevihaanwa, navutswa Roho a veye mulala. 5Kandi ha veye netsing'ano tsyobu tumwa, kandi Mwami a veye mulala. 6Kandi ha veye netsing'ano tsyeliyinzira, nawtswa Nyasaye a veye mulala, u kolanga vindu vyosi mu vosi. 7Navutswa sa mulala a hebwangwa livuula lya Roho kigira likonyana. 8Kigira mulala a hebwangwa ubugeeri ku Roho; nowundi a hebwangwa limanya, ku Roho zana: 9wundi a hebwangwa lisuuvira, ku Roho zana; wundi a hebwangwa vihaanwa vyokuhonnya valwaye, ku Roho zana; 10wundi a hebwangwa likola miyinzi gyetsingulu; wundi a hebwangwa ubuprofeti; kandi wundi a hebwangwa limanya roho: wundi a hebuangua tsing'ano tsyetsinimi; kandi wundi a hebwangua ligirunkannya tsinimi; 11navutswa amakuva yaga gosi Roho zana a kolanga, nokugavulira vosi sa mulala lugano lugano kuli ga a yanza.
12Kigira kuli mubiri gu veye mulala kandi gu veye nevivero vinyingi, kandi vivero vyosi vyomubiri vi veye vinyingi vi kola mubiri mulala; kandi Kristo a veye ndiyo. 13Kigira kwosi kwa bati dzwa mu Roho mulala ku duke kuva mubiri mulala, ni ku veye Avayuda naho Avagreki, naho avatugwa, naho avaboholole; kwosi kwa nwehidzwa ku Roho mulala. 14Kigira mubiri si gu veye kivero kilala, navutswa gu veye vivero vinyingi. 15Kirenge ni ki vola, Kigira inze si mbeye mukono si mbeye womubiri; si ki veye kyomubiri kigira yaga? 16Kandi ugutu ni gu vola, Kigira inze si mbeye imoni, si mbeye womubiri; si gu veye gwomubiri kigira yaga? 17Mubiri gwosi ni gu va imoni lihulira li veye haliha? Mubiri gwosi ni gu va ugutu, lifunyiridza li veye haliha? 18Navutswa kalunu Nya saye u viki vivero si kilala ku mubiri kuli wa a yanza. 19Kandi vivero vyosi ni vi va kilala, mubiri gu veye haliha? 20Navutswa kalunu vi veye vivero vinyingi, navutswa mubiri gu veye mulala. 21Kandi imoni si i nyala kuvolera mukono, Si nyenya ive: kinga mutwe kuvolera virenge, Si nyenya mwinye. 22Auwa, nu bulahi ligali, vivero yivyo vyomubiri vi lolekanga kuva videdekere kuvita vyenyangwa ligali: 23kandi vivero vyomubiri vya ku ganagana vya gehera lidzominywa, ku vidzominya kuvita; nevivero vyetu vi ta li vilahi vi veye vilahi kuvita; 24kigira vivero vyetu vilahi si vi veye nelyenya: navutswa Nyasaye ya hambannya mubiri nokuha yiki kya gehera lidzominywa kuvita; 25lyavukana li ta va ku mubiri, navutswa vivero vyosi vi dendane vyene na vyene. 26Kandi kivero kilala ni ki salira, vivero vyosi vi salira halala nakyo; kinga kivero kilala ni kidzominywa, vivero vyosi vi sangala nakyo. 27Mwinye mu veye mubiri gwa Kristo, kandi sa mulala mu veye vivero kugwo. 28Kandi Nyasaye ya vika avalala mu livugana, vokutanga avatumwa, avakaviri navaprofeta, avakavaka va veye avegidzi, kandi likola miyinzi gyokugenya, kandi vihaanwa vyokuhonnya avalwaye, kandi ubukonyani, kandi lya meha, kandi tsing'ano tsyetsinimi. 29Kunangwa vosi va veye avatumwa? Naho vosi va veye avaprofeti? Naho vosi va veye avegidzi? Naho vosi va kola miyinzi gyokugenya? 30Naho vosi va veye nevihaanwa vyokuhonnya avalwaye? Naho vosi va vola tsinimi lugano lugano? Naho vosi va girunkannya tsinimi? 31Navutswa mwenye ligali vihaanwa vinene kuvita. Kandi mmu mannya inzira indahi kuvita.
Currently Selected:
1 Vakorintho 12: MBE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 1967
