MATAYO 6
6
1 #
Mat 23:5. “Orip kegh moporï ighisyewutkökwo cho karamach cho pö saghat ompö tawu pich lö tökesïwak. Ato aghakwa lenyoni melö tonyorunekwa ropöwon ompö Paponkwa nyo mi yïm.
2“Kïlenyona nyu, ato itö kïgh chi, itötö ompö sison mengalana, tömekarkegh nko pich cho le lïsï cho ighöy lenyoni ompö kori sowut nko ompö ortïna kanastin atökïkwol pich chane. Omwowokwa nyoman lö kikïnyorï chane ropöwontengwa. 3Wölo ato itö chi kïgh, mekany kunkïtï ewungu nyo pö löt kïgh nyo ighöy ewungu nyo pö tagh. 4Tötenö ropöwontengu ompö wïngat atökïkonïn ropöw Papongu nyo sïwïyi tïkwïn cho wïngote.
Kinetut wölo kïsoghtoy Tororöt
(Luk 11:2-4)
5 #
Luk 18:10,14. “Akwotini osoghöy, makarkegh nko pich cho le lïsï, cho chömöy kïsoghöy kughyongo kori sowut nko wölo sochegho ortïna atökumï pich kïsïwa chane. Omwowokwa nyoman lö kikïnyorï chane ropöwontengwa. 6Wölo ato isoghöy, iwö ilït kongu aikar kukat aisagh Papongu nyo melö kïsïwïyi atökïkonïn Papongu ropöwon nyo sïwïyi tïkwïn cho wïngote.
7“Akwotini osoghöy, mepöghisyeghö ngal cho chang cho puryö kinyiwut, le wölo lata pich cho melö tïng kighanat cho lenchini kegh terchini Tororöt chane ompöwölo soghöy nyo kogh. 8Makarkegh nko chane, ompöwölo nkït Paponkwa möchukökwa kïtomö osomökwa nyinte.
9Asagha nyu le nyï:
‘Paponyo nyo mi yïm,
Nya kïtïlitit kaynengu.
10Nya kungwïn Pöyunötengu.
Nya kwigha machatengu ompö ngwïny le wölo lata
ompö yïm.
11Konecha asisete omisyenyo nyo mïchinech,
12Löstewecha lelutköcho cho kakïlel,
le wölo kïlöstoghchinecha pich cho lelwecha.
13Amemïtyecha wölo mi tyamata,
wölo isörunenech Onyöt.’#6:13 Tösöy kikirutkö walaka: Ompöwölo nyengu pöyunötö nko owesyö nko ororyö kokay. Amen.*
14 #
Mrk 11:25. “Ompöwölo ato olöstoghchikwa pich lelutkökwa, kïlöstowokwa tïkwïl Paponkwa nyo mi yïm, 15wölo ato molöstoghchikwanye pich lelutkökwa, kïmölöstowokwanye Paponkwa nyo mi yïm lelutkökwo.
Kinetutyo kïrurat
16“Ato okïruröy, makany kïsilonchö tökochwekwo le lïsï, ompöwölo lisöy chane tokochwekwa atökïsïwa pich lö mi chane kïkïruröy. Omwowokwa nyoman lö kikïnyorï chane ropöwontengwa. 17Wölo ato ikïruröy, iyil mötïngu aiwun tokochungu, 18atömösïwin pich lö ikïrurenyi, kïpoto Papongu nyo mesïwïyenyinye ompö konyiku. Konïnyi nyu ropöwon Papongu nyo sïwïyi kïgh nyi ighenyi ompö sison.
Sïkönöt ompö yïm
(Luk 12:33-34)
19 #
Yak 5:2-3. “Mororchï kegh kaplawachtin ompö ngwïny, wölo omo rirïm nko köpumpï akïwiröy chorï atökïchor. 20Wölo ororchinö kaplawachtinekwo yïm wölo memuköcha rirïm anta köpumpï ntökuwur akïmemuköcha chorï ntökïwir akïchor. 21Ompöwölo mi mïkulöwungu wölo mi kaplawachtangu.
Löpoyïn pö por
(Luk 12:34-36)
22“Kong kï kitömöwonto por, nyo ato karam kontangu, kïmi löpoyïn kïmïkul. 23Wölo ato gha kontangu, kïmi tuwïn portöngu kïmïkul. Kïlenyona ato tuwïn löpoyïn nyo mi oringu, kïtuwitu nyu kïtya tuwïnoni!
Tororöt nko mökosyö
(Luk 16:13; 12:22-31)
24“Möminye chi nyo pöghisyechini echot odeny, ompöwölo töghöy anka kïcham anka, anta terchï nko anka kïsas anka. Momukekwanye topöghisyechï Tororöt nko mökosyö.
25“Kïlenyona omwowokwa lö, mosus kegh ompö tïkwïn cho kyomöy anta cho kïgheghöy anta cho kïloköy. Mötïlönye so söpon omisyö anta tïl por sïro? 26Arose törit, cho melö kötkötisïyi amelö ilsïyi amötïngcha töpoton. Wölo pöghöy Tororöt chane. Melö so opokwa tösunöt nyo wow kïtïl törit? 27Akï ngo ompö akwa nyo ato sus kegh kumuköy kïtas kite osiswechi ompö ngwïny?
28“Kwompö ne nyu tosusokwa kegh sïro? Arose wölo pitïtoy tapïkoy pö wuw, cho meghöcha ighisyö anta nöpchï kegh sïro. 29#1Pöy 10:4,7; 2Ot 9:3. Wölo omwowokwa lö kïrkegh ki oror pöytoghintö Solomon lö ne, kïmelö kiloköy sïro cho pïchighöch le tapïkoychï. 30Wölo atö minöy Tororöt sus, cho nyörilöch ye akwasïyech kïyomö akepel, kïmemukönye nyinte tökulokwekwa sïro kïtïl? Heywey akwa cho mïnïng kighanata! 31Kïlenyona nyu, mosus kegh lö, kyomecha ne anta kïgheghecha ne anta kilokecha ne? 32Ompöwölo yöröy pipö punton tïkuchoni löwïr akunkït Paponkwa nyo mi yïm lö otïngetekwa machat nyo pö tïkuchoni löwïr. 33Wölo ayara kïny Pöyunöto Tororöt nko mantanyi tökïtöswokwa nyinte tïkuchoni löwïr. 34Kïlenyona, mosusö kegh ngala asïyech, ompöwölo suso kegh asïyech ngalechi.
Mömïchininye kerwokyï pich
(Luk 6:37-38,41-42)
Currently Selected:
MATAYO 6: PIPÏLIA
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019
