MATAYO 5
5
1Otini kisïwa Yeso söpïchis, kïpus kutïng akumpur ngwïny. Kïpa kinetankachi wölo mi nyinte 2atolapay kutor kunet chane lö,
Ngörekyo man
(Luk 6:20-23)
3“Soyönote pich cho nkït lö kïchï
mey ompö tawu Tororöt,
ompöwölo nyingwa Pöyunöto Yïm!
4 #
Isa 61:2. Soyönote pich cho sönöniot,
ompöwölo syonchini Tororöt chane!
5 #
Tum 37:11. Soyönote pich cho tölose,
ompöwölo mïlöy ngwïny.
6 #
Isa 55:1-2. Soyönote pich cho omöy kömöy
nko maral nyo pö manpa Tororöt,
ompöwölo kipïghyongöy.
7Soyönote pich cho syonchini pich,
ompöwölo syonchini Tororöt chane!
8 #
Tum 24:3-4. Soyönote pich cho tïlilöch mïkulöwekwa,
ompöwölo sïwïyi chane Tororöt.
9Soyönote pich cho linyot pich,
ompöwölo kïkuro chane monïngo Tororöt!
10 #
1Pt 3:14. Soyönote pich cho kichopöy kong ompö man,
ompöwölo lïku nyingwa Pöyunöto Yïm.
11 #
1Pt 4:14. “Ochikwa soyönote ato chïpokwa pich akuchopokwa kong akïngalanenekwa ngal cho ghach ompö putintön, akwompö ani. 12#2Ot 36:16; Ist 7:52. Oturonchenö angörekyö, ompöwölo wow ropöwontenkwa nyo mi yïm. Ompöwölo kikichop kong werkoy cho kimi tawunkwa lenyoni.
Partin nko löpoyïn
(Mrk 9:50; Luk 14:34-35)
13“Ochikwa partin ompö ngwïny. Wölo ato pot onyïnio partin, kïmökïminye or anka nyo tökwonyïnituno ngat. Melö tökunyiwu kïgh nyonikïny kïpoto kelasta akïtïkata pich.
14 #
Yna 8:12; 9:5. “Ochikwa löpoyïn pö ngwïny. Möwïngonye kanasyanta nyo kikïtek kutïng parak 15#Mrk 4:21; Luk 8:16; 11:33. akï möminye chi nyo nömöy kitömöwon akïkartegha otupö, wölo syolöy töpöyöwe atökïlöpochï chi anka tïkwïl nyo mi kö. 16#1Pt 2:12. Akanya nyu kulïwunö löpoyïntöngwo tawu pich atökïsïwa chane ighisyewutkökwa cho karamach atökïsal Papongwo nyo mi yïm.
Kinetutyo kirurut
17“Molenchï kegh kyangwïnan anategha Kirurut pö Musa anta kinetut pö werkoy. Mangwïnanye anategha, wölo kyangwïnan agh kïpïntö kinetutkökwa. 18#Luk 16:17. Ompöwölo omwowokwa nyoman lö, weröy yïmö nko ngwïny nyo mötïny, wölo mewerönye ompö kemeryanta kite nyo pö kirurut ntökïtenö kïpïntö tïkwïn löwïr. 19Kïlenyona, chi anka tïkwïl nyo penyöy ompö kirurut akonga nyo mïnïng tya ompö kirurutchï, akunet pikö walaka kwigh lenyoni, kïmïnïngitu nyinte tya ompö Pöyunöto Yïm. Wölo chi anka tïkwïl rïpöy akunetöy lenyini kekuro nyo wow ompö Pöyunöto Yïm. 20Ompöwölo omwowokwa lö, momukekwanye ntolït Pöyunöto Yïm ato matïlnye kighanatenkwa nyo pö koneti kirurut nko nyo pö Parisaytin.*
Kinetutyo nörekyö
21 #
Wuw 20:13; Krt 5:17. “Kyalïmakwa kemwochï pich könyisyok lö, ‘Mepar chi, akï chi nyo kapar chi, kepöy ka kirwok.’ 22Wölo omwowokwa nyu ye lö, chi anka tïkwïl nyo nörekyini werïngwa, kepöy kokwö,* akwanka tïkwïl nyo kuro werïngwa sölwö, kuroko kewirchï mapa kokay. 23Kïlenyona ato imököy töne Tororöt konutyengu ompö ato kïpelo amöros ainan ompö atoni lö mi kigheghchinogh nyo tïng werïnkwa ompö nyi, 24ipïsyï konutyengu atoni kïpelo amörostin aiwö lawel ichomnyö nko werïngwo. Atolapay imïla itötö konutyengu.
25“Nyagha chomnyenö nko chichini ipinyi kokwo kïtomö ata ka kirwok, atömepïn nyinte tawu kirwokin nyo mutöy ngaleku akutöninyi mori askaryon kïtorchinyi chela. 26Omwowunyi nyoman lö mengetunonyinye wöloni ntökïtenö ghaktenanyi ompö nyo le sentöyon.
Kinetutyo cheporesnan
27 #
Wuw 20:14; Krt 5:18. “Kyalïmakwa kemwa lö, ‘Megh cheporesnan!’ 28Wölo omwowokwa ye nyu lö chi anka tïkwïl nyo rosöy korka ompö pïrchin, kï kikwigh cheporesnan tïkwïl. 29#Mat 18:9; Mrk 9:47. Kïlenyona ato ighinyi kontangu nyo pö tagh igha ngokï, iködötï aiwirta! Ngwangwa chopanyi nyichay akonga nyo pö portöngu, kïtïl kewirchï portöngu kïmïkul mapa kokay. 30#Mat 18:8; Mrk 9:43. Akwoto ighinyi ewungu nyo pö tagh igha ngokï, imut aiwirta! Ngwangwa chopanyi ngichay akonga nyo pö portöngu kïtïl kewirchï portöngu kïmïkul mapa kokay.
Kinetutyo kityakat ompö kensyö
(Mat 19:9; Mrk 10:11-12; Luk 16:18)
31 #
Krt 24:1-4; Mat 19:7; Mrk 10:4. “Kikïmwa ngat lö, ‘Chi anka tïkwïl nyo tyoköy korkenyi, nya kutö nyinte palalyanta kityakat.’ 32#Mat 19:9; Mrk 10:11; Luk 16:18; 1Kr 7:10-11. Wölo omwowokwa ye lö, ato tyak chi korkenyi, kïpoto ompö cheporesnan, kwighöy kokononi kïlïkwï chepores. Ato ip chi anka kokononi, kï kegh nyinte tïkwïl cheporesnan.
Kinetutyo muma
33 #
Law 19:12; Kiy 30:2; Krt 23:21. “Kyalïmakwa ngat lö kikïmwochï pich könyisyok lö, ‘Mewalwal kegh ompö putintön, wölo ighchinönyi Echotyon kini kewolwolchinyi Echotyon.’ 34#Isa 66:1; Mat 23:22; Yak 5:12. Wölo omwowokwa ye nyu lö, mewalwal kegh nyonikïny, yïm ompöwölo ngacharu Tororöt nyo pö paytagh 35#Tum 48:2; Isa 66:1. anta wolwolchï kegh ngwïny, ompöwölo ngacharu kelyechi anta ompö Yerusalem, ompöwölo kanasyanta Pöytoghin nyo wow. 36Amewalwala kegh mötïngu, ompöwölo memukenyinye ighe putyon akonga kïrelit anta kïtuwit. 37Nya kïlïkwï kïgh nyo imwoghöy, ‘Owöy’ anta, ‘Ewo.’ Kïgh anka tïkwïl nyo tïlöy nyoni, kungwïno wölo mi Onyötö.
Kinetutyo kitakat
(Luk 6:29-30)
38“Kyalïmakwa kemwa lö, ‘Kong nko kong, kelat nko kelat.’ 39Wölo omwowokwa ye nyu lö, metak ato iwun chi nyo gha. Ato rapakïn chi lalapka okumpö tagh, iwöghökyï okumpö löt. 40Akwoto ipinyi chi ka kirwok kïmököy kïchengöy syatingu, ipïsyï kwip koti tïkwïl. 41Akwoto chikyinyi chi kasana tïkuchi kilomita akonga, ikösönchï kilomiten odeny. 42Ato somïn chi kïgh itö, ato mököy chi kïpösöneninyi kïgh ipösönchï.
Achama punkökwo
(Luk 6:27-28,32-36)
43 #
Law 19:18. “Kyalïmakwa kemwa lö, ‘Chama pöröryengu airey punyontengu.’ 44Wölo omwowokwa ye nyu lö, ‘Achama punkökwo asoghchï pich cho chopokwa kong, 45atalïkuna monïngo Paponkwa nyo mi yïm.’ Ompöwölo ighöy nyinte asistanyi kuluchï pich cho le mwokïyis nko cho karamach akïkonu rop kïropönchï pich cho pö man nko cho melö pö man. 46Ato achamakwa pich cho chömekwa, onyorukwa tösunöt ne? Ompöwölo ighöy lenyoni tïkwïl kwöghi surï! 47Kwato ato atakwesakwa kongotikwa opïn, kïkaghakwa ne nyo tïlate kïsïr pich walaka? Ighöy lenyoni tïkwïl pipö punton. 48#Law 19:2; Krt 18:13. Alïkuna nyu pich cho tenote le wölo lata Paponkwa nyo mi yïm.
Kinetutyo kingarakata pich cho le chopot
Currently Selected:
MATAYO 5: PIPÏLIA
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019
