MATAYO 10
10
1Kïkur Yeso kinetankachi taman nko odeny akutö kimukat nyo yono oy akusop sömew anka tïkwïl nko kösotyö anka tïkwïl. 2Achï nyu kaynötutko pïchoni kiyoktö nyinte le taman nko odeny: nyo pö tagh kï Simon nyo kïkuro Petro nko werïngwa Andrea nko werpö Sepedayo odeny, Yakopo nko Yoana nko 3Pilipo nko Partolomayo nko Tomas nko Matayo nyo kile kwöghinto surï nko Yakopo wero Alpayo nko Tadayo nko 4Simon nyo pö Kanan nko Yudas Iskariote nyo kïwïchtö Yeso.
Ighisyo kiyoktoghichay le taman nko odeny
(Mrk 6:7-13; Luk 9:1-6)
5Kiyonta Yeso pïchoni le Taman nko Odeny akïlenchï, “Mapa koro punton amolït kanasyan anka tïkwïl nyo pö pipö Samaria. 6Wölo kaykay ape wölo mi pipö Israel cho kakupotyö le kechir. 7#Luk 10:4-12. Ape amtena lö, ‘Kikïrikï Pöyunöto Yïm.’ 8Osopö pich cho chirsot agh cho kïmeghö kututu asop pich cho kyam psenkwet, ayon oy kïngeta pich. Kyonyorukwa kwïle, otötenö nyu kwïle. 9Mop koltin anta ropïyen anta kerpes ompö mïlotwekwo 10#1Kr 9:14; 1Tm 5:18. amop mïloto okörö ato orutoy anta syatin odeny anta kwegh anta lïkïp, ompöwölo mïchini kïsïkö chi omisyö pöghisyenyi.
11“Otini katakwa kanasyan nyo wow anta nyo mïnïng amar chi nyo chömöy kïtochokwa, ampur nko nyinte ntökïtenö angetena atoni. 12Akwotini kolïtökwa kö atakwes piko köyoni. 13Ato tach piko köyoni takwestankwa, kïtöpo kalyenkwa nko chane, wölo ato melö katachekwa chane, akany kïmïla kalyenkwa wölo omitekwa. 14#Ist 13:51. Akwato mi kaw anta kanasyan nyo matachakwanye anta ter ngalekwa anget apartegha terïtyon kelyekwo. 15#Tow 19:24; Mat 11:24-28. Omwowokwa nyoman lö, syonchini Tororöt asispa kirwok tya pipö Sodoma nko cho pö Komora, kïsir piko kanasyantanoni!
Itu kichopata kong
(Mrk 13:9-13; Luk 21:12-17)
16 #
Luk 10:3. “Oyontonokwa ye nyu le kechir ompö kwenu suyï. Ongöghomöchitunö le moroyut, atölosöchitu le chepïrïmpen. 17#Mrk 13:9-11; Luk 12:11-12; 21:12-15. Orip kegh, ompöwölo pkonöy pich cho nömokwa akumïtyokwa ka kirwok, mungokwa chane ompö korikwa pö sowut. 18Mïtyinokwa chane tawu pöytoghï cho mïnkech nko cho echön ompö kaynenyan atomchinö pïchoni Lökoy cho Karamach nko pipö punton tïkwïl. 19Otini kemïtyokwa chane wöloni le ka kirwok, mosus kegh lö, ekemwoghöy ne anta kïmwoytoy onö, konokwa Tororöt ngölyon nyo omwoghekwa. 20Ompöwölo melö chikwa ngalechini omwoghekwa, wölo pkono Mïkulöwuto Paponkwa nyoni ngölonöy ompö orinkwa.
21 #
Mrk 13:12; Luk 21:16. “Wïchtoy pich werkökwa kerwokyï atökepar akwighöy papotïnö lenyoni tïkwïl ompö monekwa. Ngetyini monïngö yiyikwa akïwïchtö chane kepar. 22#Mat 24:9,13; Mrk 13:13; Luk 21:17. Nguyokwa pich tïkwïl akwompö ani. Wölo anka tïkwïl nyo ghyongtoy ntökwit söröm, kesöru. 23Kïkany kunyarilakwa pich kong ompö kanasyan akonga, oryöghchï kanasyante anka. Omwowokwa nyoman lö mowongekwanye ighisyewutkökwo löwïr ompö kanastina Israel kïmïkul kïtomö kïmïla Wero Chi.
24 #
Luk 6:40; Yna 13:16; 15:20. “Melö wow nyo kinetöy kïtïl konetintenyi, amöwownye mötworintö kitïl echotyontenyi. 25#Mat 9:34; 12:24; Mrk 3:22; Luk 11:15. Nyo mïchini kinetan kïtöpö le konetintenyi, kïtöpö mötworintö le echotyontenyi. Akwoto kurö chane chito kot, Pelsepul,* kïmïnchini nyu chane, moneko köyoni kaynötut cho ghach tya.
Ngo nyo mïchini kewagh
(Luk 12:2-7)
26 #
Mrk 4:22; Luk 8:17. “Kilenyona, mawagh nyu pïchoni. Möminye kïgh nyo tïpote nyo melö kïwösu, akï möminye kïgh nyo wïngate nyo mökiporunye. 27Ngölyon nyo omwowokwa ompö tuwïn amwatïta ompö löpoyïn, kïkany kïgh nyo olïmokwa sison amwatïtegha pörkö. 28Amawagh chane cho pöröy por akïmemuköcha ntökïtïgh söpontö, wölo awagha Tororöt nyo muköy kuwuröy por nko söpontö ompö mapa kokay. 29Kimuköy kyolo alurïtin odeny senten angwan akï möminye ompö akong ompö chane nyo chïnchini ngwïny akïtomö kïchömchï Paponkwa nyo mi yïm. 30Wölo yitote chini le putekwa pö möt löwïr. 31Kïlenyona, mowöghisyö, opokwa olyot nyo wow tya kïtïl alurïtin cho chang!
Kecham nko ketagh Kristo*
(Luk 12:8-9)
32“Chi anka tïkwïl nyo portonanïn ompö tawu pich, oportonan nyinte tïkwïl lenyoni ompö tawuto Paponyan nyo mi yïm. 33#2Tm 2:12. Wölo anka tïkwïl nyo töghanïn ompö tawu pich, otöghan nyinte lenyoni tïkwïl ompö tawu Paponyan nyo mi yïm.
Toyogh
(Luk 12:51-53; 14:26-27)
34“Molenchï kegh kyangwïnan opï kalya ngwïny. Kimangwïnanye opï kalya kïpoto poryot. 35#Mik 7:6. Kyangwïnan atowulyö weri nko kwanta, awulyö cheptö nko kame, awulyö korka nko potïchtanyi, 36lïku pung pö chi cho ghach tya chini le piko katanyi.
37“Chi anka tïkwïl nyo chömöy kwanta anta kame kïtïlanïn, kïmerokonanïnye akwanka tïkwïl nyo chömöy werïnyi anta cheptanyi kïtïlanïn, kïmerokonanïnye. 38#Mat 16:24; Mrk 8:34; Luk 9:23. Akwanka tïkwïl nyo mepönye kimurtöwontenyi akïrïpanïn kïmerokonanïnye. 39#Mat 16:25; Mrk 8:35; Luk 9:24; 17:33; Yna 12:25. Ato mököy chi kïnömtoy kegh söpontanyi, kïwirtoy, wölo chi nyo wirtoy söpontanyi ompö ani, kïnyoru.
Ropöw
(Mrk 9:41)
40 #
Mrk 9:37; Luk 9:48; 10:16; Yna 13:20. “Chi anka tïkwïl nyo tokokwa kïtokanïn, akwanka tïkwïl nyo tokanïn, kïtoköy nyinte nyini kiyokwanïn. 41Akwanka tïkwïl nyo toköy werkoyon ompöwölo werkoyon nyinte, kïnyoru ropöwonto werkoynön, akwanka tïkwïl nyo toköy chi pö man ompöwölo pö man nyinte, kïnyoru ropöwonto chi pö man. 42Akwanka tïkwïl nyo töni kikompo pögh cho köghïte akonga ompö rïpankachan chete mïnkech, ompöwölo rïpanïn nyinte, kïnyoru ropöwontenyi nyo mötïny.”
Pich cho kiyonta Yoana Kipatisanintö wölo mi Yeso
(Luk 7:18-35)
Currently Selected:
MATAYO 10: PIPÏLIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
