MATAYO 11
11
1Kïkany kuwany Yeso kïmwochï kinetankachi ngalechoni, kïngeta atoni akiwö kunetata akwomchinotö pich ompö kanastine walaka cho kilekïtö atoni.
2Otini kilïm Yoana Kipatisanintö ompö chela ighisyewut pö Kristo,* kïyonta kinetankachi kïpa. 3Kïtep Yeso lö, “Mwowune köny, ichinyi chichay kikimwa lö ngwïnöy nya, anta kïkangacha anka?”
4Kuyokyï Yeso lö, “Ape omwochinö Yoana tïkwïn cho kasïwekwa alïm. 5Kerosïta chepkarotonoy akïpesïta pich cho ngwolsot, kakesop pich cho amate psenkwet, kalïm ngal cho le cheminytin, kakigh cho kökimeghö kututï akyomchï mey Lökoy cho Karamach. 6Soyönote chi nyo mötïngnye tomtomönöt ompö ani!”
7Akwotini kimi kinetanpa Yoana kïpetoy, kïngölonchï Yeso söpïchischoni ngala Yoana, kïtep chane lö, “Kyapekwa surkwen aros ne? Solyon nyo kitimtimöy yomötï? 8Kyapekwa aros ne nyu chi nyo loköy sïro cho pïchighöchï? Möngöy pich cho loköy lenyoni kori pöytoghï! 9Omwowante köny lö ne kitö nyini kyapekwa aros? Werkoyonï? Owöy, amwowokwa lö kyasïwekwa chi nyo molu werkoyon. 10Ompöwölo Yoana nyaye ngölono Kikirut lö lentöy Tororöt, ‘Kayontan mötworintenyan kïnyaghinyi atökwigh or nyo iwerenyi.’ 11Amwowokwa nyoman lö, möminye chi nyo kikïpusï ompö monïng cho kiyï korï nyo wow kïtïl Yoana Kipatisanin, wölo chi anka tïkwïl nyo kiyitöy lö mïnïng tya ompö Pöyunöto Yïm, kï wow kïtïl nyinte. 12Kïngeta osiswo Yoana Kipatisanin nko ye, wow ryöpötö nyo könyorï pöyunöto yïm, wölo pich cho köromöch cho chengo kat. 13Kingor werkoy löwïr nko kirurut ngalechoni ntökwit osiswo Yoana. 14Akwoto omökekwa ochöme nyu kï Eliya nyinte nyo kikïmwoghöy lö ngwïnöy. 15Ato itïng chi yitïn cho ilïmo, ilïm!
16“Wölo ne nyo okongityonan nko pïnï? Lata monïng cho mpuröy sany kïkuröy kongotikwa lö, 17‘Kakïkuröcha tum amaghanakwanye, kelecha kïriryö, kïmosönönökwanye!’ 18Ompöwölo kingwïn Yoana momisyönye anta gheghsyö, kelö, ‘Ipot oy nyinte!’ 19Kingwïn Wero Chi kwomisyö, akïgheghsyö kelö, ‘Arose chichï! Chemu akïtömösin, kongo kwöghi surï nko mwokïyis.’ Wölo poru ngöghomnyo Tororöt lö man ompö ighisyewutkachi.”
Kanastin cho kimötïngcha kighanat
(Luk 10:13-15)
20Atolapay kutor Yeso kugheghchï, kanastinechini kigha nyinte töngönchintin cho chang, ompöwölo kitagh chane kïrötö ngokikwa. 21Kilenchï, “Heywey we, Korasin! Heywey ompö nyi Petsayda tïkwïl! Ompöwölo ntökikigha Tiro nko Sidon töngönchintin cho kikighwekwa, kitö kikïkötö köny chane akulach sarankwachtin akuchukö kegh aren. 22Wölo omwowokwa nyoman lö, ‘Syonchini Tororöt ompö asispa kirwok tya pipö Tiro nko Sidon kïtïlekwa!’ 23Kïkany nyi, Kapernaum! Kemachanyi so syolö kegh ntet yïm? Kirekunyi ntetanyi ngwen! Ompöwölo ntökikigha töngönchintinechoni kikigheninyi Sodoma, kitötökïmi nko nyete le ye! 24Wölo omwowokwa nyoman lö, syonchini Tororöt asispa kirwok tya pipö Sodoma kïtïlinyi!”
Apkana wölo omitan atomungö
(Luk 10:21-22)
25Kïmwa nyu Yeso atoni lö, “Paponyu, Echotyonto yïm nko ngwïny! Oyokunyi sörö ompöwölo kewïngenyi pich cho ngöghomöch ngalechi aingongchï nyu tengon. 26Owöy, Papo, ompöwölo kichamanyi nyinte lenyoni.
27“Kikïkonanïn Paponyu tïkwïn löwïr. Möminye chi nyo nkït Weri kïpoto Kwanta akï möminye chi nyo nkït Paponyan kïpoto Weri nko anka tïkwïl nyo mököy Weri kïngonchini nyinte.
28“Opkonchanïn pich löwïr cho osusöy kegh nko nïkisïntin atomunywok. 29Akanagha kat mchokinyan, anetenanïn kegh, ompöwölo ochan talase, apan kegh ngwïny, atosïkö kimïny ompö söponwekwo. 30Ompöwölo melö awes mchokinyan akï kwïskwïs nïkisïtönyan.”
Kinetut paraku Sapato*
(Mrk 2:23-28; Luk 6:1-5)
Currently Selected:
MATAYO 11: PIPÏLIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
