MATAYO 9
9
1Kïlany Yeso meli akïmïla kwoghyö nanamay akïwö kutang kanasyantenyi. 2Kumïtyï pich nyinte chi nyo kisipö por nyo kirïwöy pöröy. Kïsïwa Yeso wowïnto kighanatengwa, kïlenchï chichay kisipö por, “Inyakanitï, werïnyu, kakelöstowunyi ngokiku.” 3Atolapay kutor koneti kirurut walaka cho kimi atoni kïmwochinchö lö, “Kemwagh chichï Tororöt!” 4Kïpköchï Yeso ngalechoni kinonöy chane, kïlenchï, “Ompö ne tononokwa mïkuliskökwo ngal cho ghach? 5Kwïskwïs kemwa lö, ‘Kakelöstowunyi ngokiku,’ nya anta kemwa lö, ‘Ngeta aiwechï kegh?’ 6Oporwokwa ye nyu lö tïng Wero Chi wowïn ompö ngwïny nyo löstoghchini pich ngokï.” Kïlenchï chichay, “Ngeta aicheng menyontengu aiwechï kegh katangu!” 7Kïnget chichay akïwechï kegh katanyi. 8Otini kisïwa söpïchoni, kuwöghisyö akukus Tororöt nyo kitö pich wowïn nyo lata nyoni.
Kuröy Yeso Matayo
(Mrk 2:13-17; Luk 5:27-32)
9Kïngeta Yeso atoni, akwotini kimi kïwetöy kïsïwa chi nyo le kwöghinto surï nyo kikïkuro Matayo, mito kumpuröy kokwenyi wölo kikwögho surï. Kïlenchï, “Rïpkanïn.” Kïnget Matayo akïrïp nyinte.
10 #
Luk 15:1-2. Akwotini kimi Yeso kö pö Matayo kwomisïyi, kïpka kwöghi surï walaka cho chang nko mwokïyiskö walaka akumpur nko nyinte kïmi nko kinetankachi. 11Otini kïsïwa Parisaytin,* kïlenchï kinetankachi, “Ompö ne tökwomisïyi konetintenkwa nko kwöghi surï nko mwokïyis?” 12Kïlïm Yeso ngalechoni, kïlenchï, “Melö möröy pich cho melö chiryot chepsakïtyan, kïpoto cho chiryote. 13#Ose 6:6; Mat 12:7. Ape aneta kegh lö mwoghöy ne Kikirutchay lentöy, ‘Opïrchinan kisyonchin, amelö amörostin.’ Ompöwölo kimangwïnanye okur pich cho karamach kïpoto mwokïyis.”
Kinetut paraku kïrurat
(Mrk 2:18-22; Luk 5:33-39)
14Atolapay kïpka kinetanpa Yoana Kipatisanin wölo mi Yeso akïtep nyinte lö, “Ompö ne tökekïrurecha nko Parisaytin kïnomnyö amelö kïruröy kinetanköku?” 15Kuyokyï Yeso chane lö, “Olentekwa so, muköy toyo kensyö kïkïruröy otini tökïmi chi pö koyögh nko chane? Muko nyo mi onö! Wölo pkonöy osiswö ato kïchengo chane chi pö koyögh, kïkïrur nyu chane asisoni.
16“Möminye chi nyo kïno kïnöwon nyo rel sïra nyo kayosit, ompöwölo köreröy sïre tya nyinö kiyosit. 17Ametöninye chi dipay* cho kötökeryököy tökol cho kiyositu. Ato igh lenyoni, kïköreröy tökolkö akïmïlta kegh dipayka kunyorisyö tökolkö. Wölo kitöni dipay cho kötökeryököy tökol cho relach tökïrorisyö.”
Kakisop chepö pöytoghin nko korka nyo kiswany sïra Yeso
(Mrk 5:21-43; Luk 8:40-56)
18Otini kitökïmi Yeso kïmwochini chane ngalechoni kungwïn kintöghoghinto pipö Yaudi akong akïkïtïngö tawunyi akïlö, “Kötökïmeghöy cheptönyan, wölo nyonö kanagha ewungu parakunyi tökïsöp.” 19Kïnget Yeso akïrïp chichay, kïpa kinetankachi tïkwïl nko nyinte.
20Kimi korka nyo kikuyit könyis taman nko odeny, kungwïn akïrïp Yeso löt akïswany sörömuto sïrenyi. 21Kinonchï kegh lö, “Ato aswangan sörömuto sïrenyi kwïle, osöpan.” 22Kiwaghaka Yeso akïsïwa nyinte, kïlenchï, “Inyakanitï, cheptanyu kakusopinyi kighanatengu.” Akïnyini lawel kïsöp kokonay.
23Otini Yeso akïlït kö pö pöytoghintonay. Kïsïwa pich cho kikutöy pkurerun nko pich cho kiriryot, 24kïlenchï, “Angete ape! Tomönye kïma chepï kör, wölo rïwöy!” Kïroröchï chane nyinte. 25Kïkany kïpa pïchay sany, kïwö Yeso kïlït köyoni kimi cheponi akïnam egh, kïnget. 26Kïyasta ngalechoni kighomï korononi kïmïkul.
Sopöy Yeso pkörotonoy odeny
27Otini kiweghö Yeso atoni kirïp pkörotonoy, odeny nyinte. Kuteghyö lö, “Wero Daudi syonchecha!” 28Kïkany otini kilït nyinte köyay, kïlïtu pïchay le odeny köryote akïpa wölo mi nyinte, kïtep Yeso chane lö, “Oghönekwa lö omukan oghwokwa ngölyontononi?” Kuyokyï lö, “Owöy, Echotyon!” 29Atolapay kïswany Yeso konyikwa akïlö, “Nya kwigha ompö akwa lenyini kaghanakwa!” 30Kïyotisyö konyikwa. Kïtagha Yeso chane nyoman lö, “Momwochï chi nyonikïny!” 31Wölo kïpa akïmwatïta ngalechay pö Yeso kïghömï korononi kïmïkul.
Sopöy Yeso chi nyo mangate
32Akwotini kimi pich kïpetöy, kumïtyï pikö walaka Yeso chi nyo kimangate, ompöwölo kipote oy, 33akwotini kikitul oyichay, kutor chichay kïngalan. Kïtöngönchï pich löwïr akïlö, “Tomönye kesöchinöcha kïgh nyo lata nyï koro Israel.” 34#Mat 10:25; 12:24; Mrk 3:22; Luk 11:15. Wölo kïlö Parisaytin, “Wowïn pö oy nyoni töni nyinte owesyö nyo yono oy.”
Syonchini Yeso pich
35 #
Mat 4:23; Mrk 1:39; Luk 4:44. Kiwö Yeso kïrutochï kanastin cho echön nko cho mïnkech cho kimi korononi kïmïkul. Kunetisyö ompö korikwa pö sowut akwamta Lökoy cho Karamach cho pö Pöyunöto Yïm, akusopö pich sömew anka tïkwïl nko kosotyö anka tïkwïl. 36#Kiy 27:17; 1Pöy 22:17; 2Ot 18:16; Esk 34:5; Mrk 6:34. Kikany kisïwa nyinte söpïchis, kusyonchï nyinte chane nyoman, ompöwölo kyoghochö akïtoytoyö le kechir cho kipuryö mösöwon. 37#Luk 10:2. Kïlenyona, kïlenchï kinetankachi, “Mito ilö nyo wow, wölo ngörï pikö cho pöghisïyi. 38Kïlenyona nyu, asagha Echotyonto ilö kïyonta pich kïpa kwilisyö.”
Kakïl Yeso pich taman nko odeny cho kiyoktoy
(Mrk 3:13-19; Luk 6:12-16)
Currently Selected:
MATAYO 9: PIPÏLIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
