1 PETRUS 2
2
Bahtu ijo bolum tutang uhtus ijo borasih
1Kotului orih, dianrih tahkan arop'mu kokaro ang ja'at; ara hino hobalik, tutang ara bopura-pura. Ara bohiri ahtoi, tutang ara mohina ulun bohkon. 2Hondakrih ihkam monjadi kolou ngoa ijo punan konanak toturus haus ahkan susu rohani ijo hinut. Honong kolourih ihkam ahkan bolum tutang tonyolamat. 3#Msm. 34:10 Ang luwang Surat Borasih tonyurat koloutuh, ‘‘Ihko jari nginyam bongom eaminon kopiosoh Tuhan.’’
4Kotului orih, lombutrih nokuh Tuhan. Io kolouoh bahtu ijo bolum, bahtu ijo todian bain kolunon, kotului tongohu eam boguna; tahpi ijo tonopili bain Pohotala, kolou bahtu ijo borega. 5Ihkam kolou bahtu-bahtu ijo bolum. Kobain orih hondakrih, ihkam kani tonohapa bagi pangun Lohpou Pohotala ijo rohani. Honong kolourih ihkam monjadi imam-imam, ijo bolum khusus bagi Pohotala, tutang ijo nguha Yesus Kristus, moposorah ahkan Pohotala, porahpah rohani ijo kokilak ang ahtoi Pohotala. 6#Yes. 28:16 Tului ang luwang Surat Borasih tonyurat koloutuh,
‘‘Ahku ius ngopili ihcokobawak bahtu borega,
ijo Ahku nginaoh ang Sion monjadi bahtu mombahtang;
tutang ulun ijo Porocaya ahkai-Oh eam ahkan tongocewaoh.’’
7 #
Msm. 118:22
Bahtu rih paham borega ahkan ihkam ijo porocaya. Tahpi bagi ulun-ulun ijo eam porocaya, nyolung ayat-ayat Surat Borasih pongo tuh.
‘‘Bahtu ijo eam hapan bain tuhkang-tuhkang pomangun rih
bokorinah monjadi bahtu ijo mombahtang.’’
8 #
Yes. 8:14-15
Tutang
‘‘Iorih bahtu ijo nguan ulun totuhking,
bahtu ijo nguan iro tosahap.’’
Iro totuhking bain iro eam Porocaya ahkan ponuhtui Pohotala. Kolourih ius tonahtap bain Pohotala tohou iro.
9 #
Ex. 19:5-6; Yes. 43:20, 21; Deut. 4:20, 7:6, 14:2; Tit. 2:14; Yes. 9:2 Tahpi ihkam anai uhtus ijo tonopili, imam-imam ijo mohalu lahca, uhtus ijo borasih, khusus ahkan Pohotala, ukup Pohotala bongoi. Pohotala mitih ihkam, tutang na'ah ihkam soluka tahkan luwang kopindong, ahkan nyolong nokuh luwang koloang-Oh ijo gomilang honong konohuang, mangat ihkam monyiar kabar tohou karon-gawiu-Oh ijo luar biasa. 10#Hos. 2:23 Lomoi ihkam eam ukup Pohotala, tahpi huntuh ihkam anairih ukup Pohotala. Lomoi ihkam eam tonongasi bain Pohotala, tahpi huntuh ihkam norima kasihsayang-Oh.
Jihpon-jihpon Pohotala
11Konduang-konduang ijo kokasih! Ihkam anai rih ulun bohkonuhtus tutang ponomuoi ang kolunon tuh. Kotului rih ahku nyawot hawui paham mangat ihkam ara numbun kojolik bolai kolunon ijo toturus hokolahi molawan homboruan. 12Hadatdasar'mu, ang tohun ulun ijo eam kosono Tuhan harusrih labih pios, nyiring amat iro mopitnah ihkam, kolou ulun ja'at, iro ka'a harus ngahku angkonuan'mu ijo pios, nyiring iro ahkan monara Pohotala ang ondou polombut-Oh.
13Ang aran Tuhan, hondakrih ihkam tunduk umba nyinong pongowasa kolunon; pios ahkan Kaisar ijo monjadi pongowasa ijo mombahtang, 14oluka ahkan gubernur ijo tonunjuk bain Kaisar, ahkan mohukum ulun ijo nguan koja'at tutang ahkan mohoromatrih ulun ijo nguan kohinut. 15Kotului Pohotala kani, mangat honong karon-gawin'kam ijo hinut ihkam mangup baun ulun ijo bopander baleh. 16Hondakrih ihkam bolum kolou ulun marodehka, tahpi ara hapa komorodehkaan'mu rih ahkan hapa monyuhuk koja'at, molekan bolumrih kolou jihpon Pohotala. 17Moregarih paring ulun, ngasirih konduang-konduang'mu sama Kristen. Mihkohrih umba Pohotala, tutang horomatrih umba Kaisar.
Karot Kristus kolou sutu
18Konduang-konduang ijo monjadi pohalu, tunduk umba tepun'mu honong sohormat-horomatoh; eam tihkas ahkan iro ijo pios ahtoi tutang bojenta, tahpi ka'a umba iro ijo kejam. 19Pohotala ahkan mborehkat ihkam, amat ihkam kotului borondong umba konohuang Pohotala, sabar ngarot konuanoh, baingawi ijo eam adil. 20Kotului inonrih istimewaoh, amat ihkam sabar ngarot hukuman, ijo soharusoh ihkam nanggung, kotului bosala? Tahpi amat ihko honong sabar nanggung karot ijo nopahas'kam tului nguan ijo morong, mahka Pohotala ahkan momborehkat'mu. 21Bagi orihrih Pohotala jari na'ah ihkam. Bain Kristus bongoi jari mongarot ahkan'kam, tutang umba orih Io nonga ahkan'kam ijo sutu, mangat ihkam nutut lohkui-Oh. 22#Yes. 53:9 Io eam pu'u nguan dusa, tutang eam pu'u ihcobehti ka'a, ngonih Io ngohawot alik. 23#Yes. 53:7 Ang ohkot Io konocahci mahki, Io eam malos umba cahci mahki. Ang ohkot Io ngarot, Io eam mangancam; Io baya monyorah porokara-Oh ahkan Pohotala, Hakim ijo adil rih. 24#Yes. 53:6 Kristus bongoi ngohtun dusa-dusan ihto aang arop-Oh ngosan kahju sopolahki, mangat ihto morodehka tahkan kowasan dusa, tutang bolum numbun konohuang Pohotala. Himang-himang Kristusrih ijo ngopios ihkam. 25Lomoi ihkam kolou tobiri ijo lahcat, tahpi huntuh ihkam jari tongomin hoduli ahkan nutut Sokahtik tutang Pongindoi homboruan'mu.
Currently Selected:
1 PETRUS 2: OTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
