OBUBALI 11

Habundu ahakulikhwa mbu Tabera

1Abandu yabo bachiaka okhwekan'na OMWAMI khukeminyakhano echiabakaana n'natsio. Olwo OMWAMI yabahulila, yahambwa noburima ma narumila abandu omul'lo. Kwatukha hakari wabwe ma nikusamba elubeka l'lala lwekambi. 2Abandu nibamulakayila Musa mbu abakhonye; naye Musa nasaaya khu MWAMI, ma omul'lo nikuchiaka okhusima. 3Kho habundu tsana hakulikhwa eliira mbu Tabera#11:3 Tabera Muluheburania mbu omul'lo kwo MWAMI.; sichila omul'lo kwo MWAMI kwasamba hakari wabwe.

Musa yeela abakhulundu amakhumi kane nakataru

4Baliho abacheni bandi abali khuluchendo l'lala nende Abaisiraeli. Bali nokhwonyonywa okhukali okhulia inyama, ma kata Abaisiraeli bosi nibachaaka okhwekaana, nibaboola mbu, “Siakhuha inyama khwalia! 5Khwitsul'langa tsisuche etsia khwalitsanga Emisiri etsia khurakulanga amapesa. Khandi khwitsul'langa nende tsinduuma, namahondo, netsiifwa, nebitungulu, neitania. 6Nebutswa luno tsingufu tsiefwe tsihweye. Sibulaho esindu siosi esiakhunyala okhulia, nikari amana kano konyene!”

7Ne amana tsana kafwananga imwo yamabele keikhumba; ne likondo liayo liali singa amayayi amalabil'lu.#Okhur. 16:31 8Abandu batsiitsanga nibakatoola, nibakasa khuluchina, nibakaswaka mubinu, nibakateekha mundabu, nibakakhola emikaati; ne esiuya siako sili singa emikaati achiatekhelwa amafura. 9Ne olwe liime liaamanga khukambi mubutukhu, amana nako nikakwa khukambi halala n'nalio.#Okhur. 16:13-15

10Musa yahulila abandu nibekaananga nibasinjiye mubituma buli mundu hamuliango weliheemalie. Yamala asinyikhe sichila oburima bwo MWAMI, bwali nibwakhile khubo. 11Musa nabool'la OMWAMI mbu “Nisina esichil'le niukhol'la obubi? Nisina esichil'le norayanzisibwa n'nase? Nisina esichil'le niunduukha omusiko kwabandu bano bosi? 12Ise sindali okhulonga abandu bano nohomba okhubebula tawe. Kho nisina esiakhachila niumbool'la mbu mbe singa omulesi khubo ma mbachinge mumakhono kanje singa abaana batoro okhwola olwa namboosie musibala esiawesuhila abakuka babwe mbu wakhabaheelesie? 13Nase ndakhanyoola hena inyama eyokhuhelesia abandu bano bosi? Okhuba balindil'langa nibaboola mbu, ‘Okhuhelesie inyama khulie.’ 14Sinyala okhusinjil'la abandu bano bosi sienyene tawe; nomulimo omusiro okhuusila khu ise. 15Noba niwenyanga okhukhol'la mbwo, khusaayanga mbu unzire bwangu, kho mbule okhutsilil'la okhwefwila amatinyu akaunder'ranga.”

16Kho OMWAMI nabool'la Musa mbu, “Umbunjelesisie abasaatsa boluyali amakhumi kane nakataru abamanyikhile mbu nabemeli babandu, witse n'nabo khwiheema liokhubaho khwanje, ma obabool'le basinjileho n'nawe halala. 17Nzia okhwikhaho nin'noma n'nawe habwene yaho; ne nambukule khumwoyo okuli mwiwe, nira mubo. Ma nabakhukhonyenje okhukhola omulimo kwokhusinjil'la abandu mumang'ana kabwe, olekhe okhubasinjil'langa wenyene. 18Luno obool'le abandu mbu ‘Mwetsienule khulwe litukhu liamukamba, namunyoole inyama yokhulia. OMWAMI uhuliye okhwekaana khwenywe nende okhuboola mbu siakhuha inyama khwalia. Khandi mbu bwalinji bulahi olwa khwali Emisiri.’ Niko akachila OMWAMI namuhelesie inyama ma namulie. 19Simulalia litukhu elala, nohomba amatukhu kabili, nohomba amatukhu karano, nohomba amatukhu likhumi, kata amatukhu amakhumi kabili tawe, 20nebutswa mulachilia khulwo omwesi omuchima, okhwola olwe emusinya, ma muchisal'le mumoolu. Yaka nakekhole sichila mwasuula OMWAMI oli hakari wenywe, ma nimumwekaan'na nimuboola mbu simwakharul'lekhwo Emisiri tawe.”

21Musa nabool'la OMWAMI mbu, “Abandu aba nzemel'langa bali etsielefu tsimia tsisasaba, nawe oboolanga mbu nobahelesie inyama balie omwesi omuchima? 22Mbula banyala okhwir'rwa tsing'ombe etsihela nende amakondi akahela okhubakhola beekure? Mbula tsisuche tsiosi etsili mumaatsi tsiakhabahela noho?”

23OMWAMI nabool'la Musa mbu, “Obunyali bwanje nobuleemu noho? Luno witsa okhulola ling'ana lianje niliba niliitsa okhwekhola nohomba okhubula okhwekhola.”

24Musa naye narula, nabool'la abandu amang'ana ako OMWAMI yali nabooye. Yabunjikha abasaatsa amakhumi kane nakataru khubemeli babandu, nabara khutsimbeka tsiosi tsie Liheema. 25Ma OMWAMI niyekhela mwilumbesi, nal'loma n'naye. Yabukulakhwo khumwoyo okwali nikuli muye, nakwinjisia mubemeli tsana amakhumi kane nakataru. Olwomwoyo kwayeela khubemeli yabo, barooba muliira lio MWAMI; nebutswa sibatsilil'la okhukhola mbwo khandi tawe.

26Nebutswa abasaatsa babili bali nibasikaye mukambi; sibali okhutsia khwiheema tawe. Mulala yalangwa Elidadi, ne oundi Medadi. Nibali mukambi omwoyo kwenjila mubo; nabo nibaroobela mukambi. 27Omusiani undi omubuukha niyelukha nabool'la Musa mbu, “Elidadi nende Medadi baroobelanga muliira lio MWAMI mukambi.”

28Ne Yoshwa omwana wa Nuni omurumikhi wa Musa owali mulala khubalobolebe, naboola mbu, “Omwami Musa, obakaye.”

29Musa namubool'la mbu, “Busina ohendelanga amang'ana kanje? Ndekombanga mbu OMWAMI are omwoyowe mubandube bosi ma kachile bosi babe abaroobi.” 30Ma Musa nakalukha mukambi halala nabemeli ba Isiraeli.

OMWAMI yabarumila ebisindu

31Nonoho OMWAMI yaruma omuyeka okwaleera ebisindu okhurula munyanza nibipulukhilanga hasi ahembi emita ndala okhurula hasi. Biayeela khukambi nende okhuchibotokhana okhuhela etsikilomita tsinyinji. 32Kho litukhu yilio liosi nende obutukhu yibwo bwosi ma nende litukhu elialondakhwo abandu batoola ebisindu; abulaho owatoola ebisindu hasi wetsikilo elefu ndala. Babibakala nibabiomia mukambi yosi. 33Ne olwe inyama iyio yali nesili inyinji, nibasili okhumila, OMWAMI yahambwa noburima ma naruma esibi esikali okhubuukha mubo. 34Khulwe yako habundu tsana nihakulikhwa eliira mbu Kiburotsi Hataba#11:34 Kiburotsi Hataba Liboola mbu Ebilindwa biobwekombi. sichila niho ahabayabila abandu abali nobwekombi. 35Abandu yabo nibarula Kiburotsi Hataba, nibatsia Haserotsi; nibamenya ebwene y'yo.

Currently Selected:

OBUBALI 11: EBAIBO

Highlight

Copy

Compare