ABALAWI 16
16
Litukhu liokhulekhelwa tsimbi
1OMWAMI yal'loma khu Musa inyuma wokhufwa khwabasiani ba Haruni babili abali okhwirwa olwa bahaana omul'lo okurali omutsienukhu khu MWAMI. 2Yaboola mbu, “Bool'la omusiani wenywe Haruni mbu khunyinga injomekhe yonyene nilwo olwa anyala okhwinjila emukongo wepasia eya Habundu Hatsienukhu Okhusila, sichila habwene yaho niho aha ndebisulanga nindi mwilumbesi ikulu wesifuunikho sie Lisanduku lie Indakano. Naba niyekala amarwi khwing'ana yili aleerwa.#Heb. 6:19 3Anyala okhwinjila Habundu Hatsienukhu Okhusila olwa yakhaba naleer'ra esimoosi esichulukhi singa omusango kwetsimbi nende limiiku singa omusango kwokhusambwa.”#Heb. 9:7
4Ma OMWAMI nahaana amebaalo kano mbu: Haruni nasili okhwinjila Habundu Hatsienukhu Okhusila okhwola arange okhwesinga omubili ma yebiikhe tsingubo tsiobwesaalisi mbu natsio nzietsino ekanzo, esinyasa, olukhoba, nende esilemba.
5Abandu ba Isiraeli balahelesia Haruni tsimbusi etsikhole tsibili khulwo omusango kwetsimbi nende limiiku elala khulwo omusango kwokhusambwa. 6Alahaana echulukhi singa omusango kwokhuhiinia tsimbi tsitsie omwene nende tsimbi tsia abeinyumba yiye. 7Ma alabukula tsimbusi tsibili atsihile habwinjil'lo bwe Liheema liokhubaho khwo MWAMI. 8Habwene yaho alakhupilaho imbulu narumikhilanga amachina kabili, elala eliahandikwakhwo “Khu MWAMI” ne elindi “Khu Asaseli#16:8 Asaseli Esifune sieling'ana lio Luheburania yili sisimanyikhan'ne tawe. Haundi neliiralies'sieno siomusitsimi..” 9Haruni alahaana imbusi yeimbulu ebukuye khulwokhuhaana khu MWAMI ma achihaane singa omusango kwetsimbi. 10Imbusi eyeimbulu ebukuye khulwa Asaseli elahanwa khu MWAMI nesili mwoyo ma ekhungwe nehengibubwe musitsiimi khu Asaseli khulwo okhuhiinia tsimbi tsiabandu.
11Olwa Haruni aba nahaananga echulukhi singa omusango kwetsimbi khulwaye omwene nende khulwa abeinyumba yiye, 12abukule olusalilo lietsahabu nilwitsuyekhwo amanda komul'lo akang'alaye okhurula khulusambwa nende obwali obulahi amakhono kabili ma ahile Habundu Hatsienukhu Okhusila. 13Habwene yaho imbeli wokhubaho khwo MWAMI alara obwali mumul'lo ne omwosi kwobwali yibwo kulabisa esifuunikho sie Lisanduku lie Indakano kho alekhe okhulilola ma afwe tawe. 14Alabukula khumatsahi kechulukhi ma anyul'lusie nesiteresie imbeli wesifuunikho ma anyul'lusie akandi hali khane nakhataru imbeli we Lisanduku lie Indakano.
15Inyuma we yako, aleera imbusi khulwo omusango kwokhuhiinia tsimbi tsiabandu, ma aleere amatsahi kayo Habundu Hatsienukhu Okhusila ne akanyul'lusie khusifuunikho nende imbeli we Lisanduku lie Indakano, singa obwa akhol'le namatsahi kechulukhi.#Heb. 9:12 16Munjila yiyi alakhola omulukha kwokhusiiya Habundu Hatsienukhu Okhusila okhurula khumisilo chiabandu ba Isiraeli nende khutsimbi tsiabwe. Okhwola akhole yaka Khwiheema, sichila lisinjilanga hakari wekambi ebetsanga eyomusilo. 17Okhurula khusaa eya Haruni yenjilanga Habundu Hatsienukhu Okhusila okhukhola omulukha kwokhusiiya okhwola olwa yakharulamwo, omundu wosi arakhabakhwo Mwiheema tawe. Olwa aba namal'le okhuhesia omulukha yikwo khuye omwene, nende khubeinyumbaye ma nende khubandu bosi, 18kho okhwola atsie khulusambwa lwemisango chiokhusambwa ma alutsienule. Okhwola abukulekhwo khumatsahi kechulukhi nende khumatsahi keimbusi ma akabakhe buli habundu hosi khutsinjika tsiomutsikona tsiolusambwa. 19Anyul'lusie amalala khumatsahi tsana nesitere sisie khulusambwa hali kane nakhataru. Munjila yiyi alalusiiya okhurula khutsimbi tsiabandu ba Isiraeli ma alutsienule.
Esitiso
20Olwa Haruni aba namal'le okhukhola omulukha kwokhusiiya Habundu Hatsienukhu okhusila, Liheema lindi liosi, nende olusambwa, alahaana khu MWAMI imbusi esili mwoyo eyeimbulu eba nebukuye khulwa okhuchihaana khu Asaseli. 21Alabiikha amakhono kaake kosi khumurwe kwayo ma yeyamile khuyo obubi bwabandu ba Isiraeli bwosi, netsimbi tsiabwe tsiosi nende indiri yabwe yosi, ma khulwako ahiinie obubi yibu khubandu nabura khumurwe kweimbusi. Ma nilwo olweimbusi elatabibwa nehengibubwe musitsiimi nomundu oba niyahuywe okhuchitabia. 22Imbusi elachinga tsimbi tsiabwe tsiosi netsia n'natsio musitsiimi.
23Nilwo olwa Haruni alenjila Mwiheema, ne alahinia tsingubo tsiobwesaalisi etsia yali okhwebiikha nasili okhwinjila Habundu Hatsienukhu Okhusila, ma atsilekhe habwene yaho.#Esek. 44:19 24Okhwola yesingile omubili habundu hatsienukhu ma yebiikhe tsingubo tsitsie omwene. Inyuma we yako alarula esioba ma ahaane omusango kwokhusambwa khulwo okhuhiinia tsimbi tsitsie omwene nende tsimbi tsiabandu. 25Alasambila khulusambwa esinya yosi yomuruko okuhan'nwe khulwo omusango kwetsimbi. 26Omundu owatabia imbusi nachihengisie musitsiimi okhutsia khu Asaseli okhwola asaabe tsingubo tsitsie ma yesinge omubili kwosi nasili okhukalukha mukambi. 27Echulukhi nende imbusi ebirumikhiywe khulwo omusango kwetsimbi ebia amatsahi kabio kaleerwa Habundu Hatsienukhu Okhusila khulwo okhuhiinia tsimbi, bilahilwa esioba wekambi ma bisambilwe ebwene yiyo. Liseelo, inyama nende ebiomunda biosi bilasambwa.#Heb. 13:11 28Omundu owokhubisamba okhwola asaabe tsingubo tsitsie ma yesinge omubili nasili okhukalukha mukambi.
Okhwitsusia litukhu liokhulekhelwa tsimbi
29Amalako kano okhwola ketsul'lwe amatukhu kosi aketsanga. Khwitukhu lielikhumi mumwesi kwakhane nakhataru, Abaisiraeli nende abacheni bosi abamenyibwa, okhwola bahonge okhulia khandi barakhakholakhwo omulimo kwosi tawe.#Abal. 23:26-32; Obub. 29:7-11 30Litukhu liene yilwo omulukha kulombwe okwokhubatsienula okhurula mutsimbi tsiabwe kho baabe abatsienukhu. 31Litukhu liene yilio likholwe litsienukhu okhusila, eliokhuhonga okhulia nende oburakhola omulimo kwosi. Amalako kano kalondwe mumatukhu kosi aketsanga. 32Omwesaalisi Omukhongo, owemekhwa munjila yahabwene khandi owahulwa okhubukula obukono bwa samwana niye okwana okhukhola omulukha kwokhutsienula. Okhwola yebiikhe tsingubo tsiobwesaalisi, 33ma akhole omulukha kwokhusiiya Habundu Hatsienukhu Okhusila, nende Liheema liosi eliokhubaho khwo MWAMI, olusambwa, abesaalisi, nende abandu bosi Abaisiraeli. 34Amalako yaka okhwola kalondwe amatukhu kosi aketsanga. Omulukha kuno kukholwe khumuhika l'lala khulwo okhutsienula Abaisiraeli okhurula mutsimbi tsiabwe tsiosi.
Kho Musa yali okhukhola singa obwo MWAMI yali namulachile.
Currently Selected:
ABALAWI 16: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
