ABALAWI 15

Okhuratsa okhubi okhurula mumubili

1OMWAMI yahelesia Musa nende Haruni amalako kano 2khulwa abandu ba Isiraeli okhulonda. Omusaatsa wosi niyakhaba nokhuraatsa okhurula imbeliwe, okhuraatsa yikhwo nokhwomusilo, 3kata imbeliye neba netsilil'la okhuraatsa nohomba nekhalisia. 4Esitanda siosi esia yakhekhalakhwo nohomba okhukonakhwo silaba esiomusilo. 5Omundu wosi owakhahamba khusitandasie, 6nohomba okhwikhala khusindu siosi esiomundu tsana aba niyekhaye khusio okhwola asaabe tsingubo tsitsie ma yesinge omubili, ne alaba mumusilo okhwola khumukolooba kwelitukhu yilio. 7Omundu wosi owakhatiila khumundu oli nende okhuraatsa khweimbeli, okhwola asaabe tsingubo tsitsie ma yesinge omubili ne alaba mumusilo okhwola khumukolooba kwelitukhu yilio. 8Omundu oli nende okhuraatsa imbeli naba nafuutsa amare khumundu oli omusiiyikhu, omundu uyo okhwola asaabe tsingubo tsitsie ma yesinge omubili, ne alaba mumusilo okhwola khumukolooba kwelitukhu yilio. 9Esiokhwikhalakhwo khusululi nohomba indebe yosi eyomundu oli nokhuraatsa imbeli yakhekhalakhwo elaba eyomusilo. 10Omundu wosi owakhahamba khusindu esiomundu uyo yekhayekhwo alaba owomusilo okhwola khumukolooba. Wosi owakhachinga esindu siosi esiomundu uyo yekhayekhwo, okhwola asaabe tsingubo tsitsie ma yesinge omubili, ne alaba mumusilo okhwola khumukolooba kwelitukhu yilio. 11Omundu oli nokhuraatsa imbeli naba nahamba khuwasie nasili okhusaaba amakhonoke, kho omundu ohambilwekhwo uyo okhwola asaabe tsingubotsie ma yesinge omubili, ne alaba mumusilo okhwola khumukolooba kwelitukhu yilio. 12Indabu yosi oyomundu uyo ahambakhwo okhwola yarakwe, ne olusalilo lwosi olwalombwa khulupao olwa yakhatiilakhwo okhwola lusaabwe.

13Omundu uyo niyakhamala okhuhona okhurula khukhuraatsa imbeli, okhwola alindil'le amatukhu kane nakataru ma kho asaabe tsingubotsie ma yesinge omubili mumaatsi amalengelu kemusitaho naye alaba omusiiyikhu. 14Khwitukhu liamunane ahile amakhulwi kabili nohomba ebituka b'bili habwinjil'lo bwe Liheema liokhubaho khwo MWAMI ma akahaane khumwesaalisi. 15Omwesaalisi alahaana elala khuko singa omusango kwetsimbi, ne elindi singa omusango kwokhusambwa. Munjila yiyi alakhola omulukha kwokhusiiya khumundu uyo.

16Omusaatsa wosi niyakheloor'ra, okhwola yesinge omubili kwosi, ne alaba mumusilo okhwola khumukolooba kwelitukhu yilio. 17Esilaka siosi esieingubo nohomba esieliseelo esia yakhaba niyelooreyekhwo okhwola sisaabwe, ne silaba mumusilo okhwola khumukolooba kwelitukhu yilio. 18Inyuma womusaatsa nende omukhasi okhuba halala, okhwola besinge omubili ne balaba mumusilo okhwola khumukolooba kwelitukhu yilio.

19Olwomukhasi aba nahengele ebukwe, alaba mumusilo khulwa amatukhu kane nakataru. Omundu wosi owakhamutiilakhwo, alaba mumusilo okhwola khumukolooba kwelitukhu yilio. 20Esindu siosi esia yekhalakhwo nohomba esiayakhakonakhwo olwa yakhaba nahengele ebukwe silaba mumusilo. 21Omundu wosi owakhahamba khusitanda sisie okhwola asaabe tsingubotsie ma yesinge omubili ne alaba mumusilo okhwola khumukolooba. 22Omundu wosi owakhahamba khusindu siosi esiayekhayekhwo okhwola asaabe tsingubo tsitsie ma yesinge omubili, ne alaba mumusilo okhwola mukolooba kwelitukhu yilio. 23Kata sibe esitanda noho esindu siosi esiayekhayekhwo alaba mumusilo okhwola khumukolooba kwelitukhu yilio. 24Omusaatsa wosi niyakhabakhwo n'naye nahenjele ebukwe, alafwabibwa khulwe esifwabwi sisie ne alaba mumusilo khulwa amatukhu kane nakataru, ne esitanda siosi esia yakhakonakhwo nesiomusilo.

25Omukhasi niyakharaatsa amatsahi amenji amatukhu akarahengele ebukwe, nohomba naba naraatsa amatsahi okhubira amatukhu akakwan'ne olwa ahenganga ebukwe, alaba mumusilo oluhono lwosi olwa amatsahi karaatsanga, singa butswa abetsanga olwa ahenganga ebukwe. 26Esitanda siosi esia yakhakonakhwo nende esindu siosi esia yakhekhalakhwo oluhono yilwo silaba esiomusilo. 27Omundu wosi owakhahamba khubindu yibio alaba mumusilo, ne okhwola asaabe tsingubo tsitsie ma yesinge omubili; alaba mumusilo okhwola khumukolooba kwelitukhu yilio. 28Olwokhuraatsa khukhwe khwamatsahi khukhalisia, okhwola alindil'le amatukhu kane nakataru, ma kho alasiiywa okhurula mumusilo. 29Khwitukhu liamunane ahile amakhulwi kabili nohomba ebituka b'bili khumwesaalisi habwinjil'lo bwe Liheema liokhubaho khwo MWAMI. 30Omwesaalisi alahaana elala khuko singa omusango kwetsimbi ne elindi singa omusango kwokhusambwa, ne munjila yiyi alakhola omulukha kwokhusiiya omukhasi uyo.

31OMWAMI yabool'la Musa achetsiyie abandu ba Isiraeli khumang'ana komusilo mbu barakhafwabia Liheema liokhubaho khukhwe, eliali hakari wekambi yabwe tawe. Nibakhakhola mbwo, bakherwa.

32Yaka namalako khumundu oli nende okhuraatsa imbeli nohomba oweloor'ranga, 33omukhasi ohenjele ebukwe, nohomba khumusaatsa obetsanga nomukhasi oli mumusilo.

Currently Selected:

ABALAWI 15: EBAIBO

Highlight

Copy

Compare