OKHURULA 40

Okhusinjisia nende okhutsienula Liheema liokhubaho khwo MWAMI.

1OMWAMI yabool'la Musa mbu, 2“Khwitukhu liokhuranga osinjisie Liheema liokhubaho khwanje. 3Mure mukari mwalio Lisanduku lie Indakano elilimwo amalako likhumi ma ore epasia imbeli walio. 4Winjisiemwo emesa ma obiikhekhwo ebindu biakhwo biosi. Khandi winjisiemwo esihani ma obiikhekhwo etsitaya. 5Obiikhe olusambwa lwetsahabu olwokhusamba obwali imbeli we Lisanduku lie Indakano ma osunge epasia habwinjil'lo bwe Liheema. 6Obiikhe imbeli we Liheema olusambwa lwokhusambilakhwo emisango. 7Ore ebeseni yokhwesaabilakhwo hakali we Liheema nende olusambwa ma witsusiekhwo amaatsi. 8Obiikheho olukaka okhulibotokhana ma osunge epasia mubwinjil'lo bwalwo.

9“Ma ohaane Liheema nende ebindu bilimwo biosi khu ise OMWAMI khulwo okhulitsukhakhwo amafura amatsienukhu, nalio lilaba litsienukhu. 10Ma, ohaane khu ise OMWAMI olusambwa nende ebiokhurumikhilwakhwo biosi khulwo okhulutsukhil'lakhwo amafura nalwo lulaba olutsienukhu okhusila. 11Khandi nimbwo olatsienula ebeseni yokhwesaabilakhwo nende ebikuru biayo.

12“Oleere Haruni nende abasianibe habwinjil'lo bwe Liheema ma obabool'la besinge mumaatsi amatsienukhu. 13Obiikhe Haruni tsingubo tsiobwesaalisi, omubakhe amafura ne munjila yiye omutsienule, mbu abe onyala okhuurumikhila singa omwesaalisi. 14Oleere abasiani baabe ma obabiikhe amasati. 15Ma obatsienule, singa obwa otsienula samwana wabwe, mbu babe abanyala okhuurumikhila singa abesaalisi. Okhutsienulwa yikhu khulabakhola abesaalisi mumatukhu kosi aketsanga.”

16Musa yakhola ebindu biosi singa obwo MWAMI yali namulachile. 17Kho khwitukhu liokhuranga khumwesi kwokhuranga khumuhika kwakhabili okhurula nibarula Emisiri, Liheema liokhubaho khwo MWAMI liombokhwa. 18Musa yarechekha ebikuru bialio, nalomba tsimbao tsialio, nakhoma tsisimbo, ma nasinjisia ebikhongo. 19Yaala khwiheema tsana esifuunikho ma nafuunikhakhwo khandi nende esifuunikho siakhabili ikulu wesifuunikho siokhuranga; singa obwo MWAMI yali namulachile. 20Ma nabukula oruchina orupapale rubili narura Mwisanduku lie Indakano. Yenjisia emisaala mutsingaka tsie Lisanduku ma nalirakhwo esifuunikho. 21Ma nara lisanduku tsana Mwiheema ma nasunga epasia yokhulisinga. Munjila yiyi yasinga Lisanduku lie Indakano singa obwo MWAMI yali namulachile.

22Yenjisia emesa Mwiheema, nachira khulubeka lwesinyolu esioba wepasia, 23ma narakhwo emikaati echihanwanga khu MWAMI, singa obwo MWAMI yali namulachile. 24Yara esihani Mwiheema, khulubeka lwenandete okhuhengana nende emesa, 25ma habwene yaho imbeli wo MWAMI nahambia etsitaya, singa obwo MWAMI yali namulachile. 26Yara olusambwa lwetsahabu Mwiheema imbeli wepasia, 27ma nasamba obwali obuhunyanga bulahi, singa OMWAMI yali namulachile. 28Yasunga epasia habwinjil'lo bwe Liheema, 29ma imbeli wepasia tsana naraho olusambwa khulwokhusamba emisango. Khulusambwa tsana yahaanakhwo omusango omusambe nende okwobuswache, singa obwo MWAMI yali namulachile. 30Yara ebeseni yokhwesaaba hakari we Liheema nende olusambwa ma natsukhakhwo amaatsi. 31Musa, Haruni, nende abasiani ba Haruni besaabanga amakhono nende ebilenje biabwe mubeseni yimwo, 32buli lwosi olwa benjilanga Mwiheema nohomba olwa batsitsanga khulusambwa, singa obwo MWAMI yali namulachile. 33Musa yasira lisisi okhubotokhana Liheema nende olusambwa ma nasunga epasia habwinjil'lo bwelisisi tsana. Kho yamala emilimo chiosi.

Lilumbesi liafuunikha Liheema liokhubaho khwo MWAMI

(Obub. 9:15-23)

34Ma lilumbesi liafuunikha Liheema ne obulafu obukhongo obumanyianga okhubaho khwo MWAMI nibwitsula Mwiheema.#1 Abar. 8:10-11; Isaya 6:4; Esek. 43:4-5; Okhub. 15:8 35Khulwe yaka, Musa siyaali onyala okhwinjila Mwiheema tawe. 36Abaisiraeli basunda butswa ekambi yabwe sibeka olwelilumbesi liali nilirul'le Khwiheema lwonyene. 37Oluhono olwelilumbesi lifuunikhanga Liheema sibasundanga ekambi yabwe tawe. 38Mukhubokaboka khwabwe khwosi balolanga lilumbesi liokhubaho khwo MWAMI nilifunikhile Liheema munyinga yomubasu ne munyinga yobutukhu, balolanga omul'lo nikwatukhanga khulio.

Currently Selected:

OKHURULA 40: EBAIBO

Highlight

Copy

Compare