OKHURULA 39

Okhunabila Abesaalisi tsingubo

(Okhur. 28:1-14)

1Barumikhila obuusi obutsokan'nemwo buluu, nobusembe nende obwakhanyu okhunaba tsingubo tsieng'ono etsia abesaalisi bakhoya okhwebikha olwa baba nibenjilanga habundu hatsienukhu. Banabila Haruni tsingubo tsiobwesaalisi singa OMWAMI yali nalachile Musa.

2Balomba ingubo ya efoti okhurula khungubo yekatani isiyikhu; nende okhurula khubuusi bwabuluu, obusembe nende obwakhanyu; ma nende khuluusi lwetsahabu. 3Balomba amasiti ketsahabu ma nibakakhalaka mutsinyaali tsinyelele okhulombelwa mungubo yekatani isiyikhu nende mubuusi bwabuluu, nobusembe nende obwakhanyu. 4Balomba emikoye chiomumabeka khungubo ya efoti ma nibachinabila khumabeka kabili okhuchihandiakhwo. 5Omukhoba okwasirwa bulahi, okwalombwa khubuusi singa obweingubo yomukari lwanabilwa khungubo tsana kho bibe esindu silala neingubo, singa OMWAMI yali nalachile Musa. 6Balomba amachina keshohamu nibakahomakhwo netsahabu. Kanabwa munjila yobusitsa ma nikahandikwakhwo amera kabasiani ba Yakobo. 7Bakara khumabeka keingubo ya efoti okhukobokhela tsinzibulo tsia Isiraeli likhumi natsibili, singa butswa obwo MWAMI yali nalachile Musa.

Okhulomba esilaka siokhusilifu

(Okhur. 28:15-30)

8Balomba esichengwa siokhusilifu okhurula khubuusi obutelwa obwabalombelakhwo ingubo ya efoti nende omunabo omufwanani. 9Esichengwa tsana siali esihelanu tsimbeka tsine ma nisifumbwamwo khabili, mbu oburambi etsisentimita amakhumi kabili nachibili ne obuchiikha etsisentimita amakhumi kabili nachibili. 10Banabilakhwo tsinyaali tsine tsiamachina keshohamu. Mulunyaali lwokhuranga banabilamwo amachina ka etsilulu, topasi, nende eparaketo; 11mulunyaali lwakhabili banabilamwo amachina ka emikoche, esafira nende alumasi; 12mulunyaali lwakhatari lwanabilwakhwo amachina ka yakinitso, ametsusto nende ikhalama; 13mulunyaali lwakhane lwali namachina ka tarishishi, amachina keshohamu nende yasipa. Yaka kosi kanabilwa mubifuuli bietsahabu. 14Sielala khumachina likhumi nakabili yako liahandiikwakhwo eliira elala khumera kabasiani ba Yakobo, mbu kakobokhele tsinzibulo tsia Isiraeli likhumi nachibili. 15Balombela esichengwa siokhusilifu yisio eminyololo chietsahabu isiyikhu, echibasilwe singa tsimbuno. 16Balomba ebitiili bietsahabu bibili khandi tsingaka tsietsahabu tsibili ma nibanabila tsingaka tsana khutsikona tsieikulu wesichengwa sieingubo iyo. 17Baboha emikoye chibili chietsahabu mutsingaka tsibili 18khandi nibaboha elubeka undi wemikoye yitsio khubitili bietsahabu ma munjila yiyi nibabinabila khumabeka keingubo ya efoti. 19Balomba tsingaka tsibili tsietsahabu ma nibachinabila mutsikona tsie hasi etsiesichengwa tsana, mukari mwasio khundulo ahembi nende ingubo ya efoti. 20Balomba khandi tsingaka tsindi tsibili ma nibachinabila isi weimbeli wamabeka keingubo ya efoti, ahembi nende obwongano bwayo ikulu wolukhoba olwasirwa bulahi. 21Singa butswa obwo MWAMI yalaka Musa, baboha tsingaka tsiesichengwa siokhusilifu khutsingaka tsieingubo ya efoti nibarumikhilanga emikoye chiabuluu, kho esilaka siomukari sielele ikulu wolukhoba ne siraronya tawe.

Okhunaba tsingubo tsindi tsiobwesaalisi

(Okhur. 28:31-43)

22Ekanzo eyebikhilwanga ikulu weingubo ya efoti yanabilwa obuusi bwa buluu bwonyene. 23Omuluhu kwokhwinjisiamwo omurwe kwatilwa khundulo khwakwo nobusi mbu kurarandukha tawe. 24Khulusiche lwosi okhubotokhana barakhwo amakomolu akanabwa nekatani isiyikhu nende obuusi bwabuluu, obusembe nende obwakhanyu. 25Khandi hakari wamakomolu tsana baraho etsikengele tsietsahabu okhubotokhana olusiche lwosi olwekanzo. 26Buli ekengele yetsahabu yalondwanga nende likonolu okhubotokhana olusiche lwosi olwekanzo, singa OMWAMI yali nalachile Musa.

27Banabila Haruni nende abasianibe amasati, 28nende ebilemba, etsikofia, ebilwali biekatani, 29nende evesti yekatani isiyikhu khandi eyanabilwa obuusi bwabuluu, obusembe nende obwakhanyu ma neng'onibwa singa OMWAMI yali nalachile Musa. 30Balomba omukonze khutsahabu isiyikhu, efwali olusimbi olutsienukhu lwobwehani, ma nibahandikakhwo mbu, “Okwahanwa khu MWAMI.” 31Bakuboha imbeli wesilemba nende omukoye kwabuluu, singa OMWAMI yali nalachile Musa.

Okhumalila omulimo

(Okhur. 35:10-19)

32Emilimo chiosi khu Liheema liokhubaho khwo MWAMI chiamala nichihwa. Abaisiraeli bakhola ebindu biosi singa OMWAMI yali nalachile Musa. 33Baleer'ra Musa Liheema nende ebindu biamwo biosi, nebifuuli bialio, tsimbao tsialio, tsisimbo tsialio, ebikhongo bialio nende ebikuru bialio; 34nende esifuunikho esialombwa khwiseelo liesimeme elienikhwa murangi inzakhanyu; nende esifuunikho sieliseelo lisiyikhu; etsipasia tsiokhulisinga; 35nende Lisanduku lia Indakano elilimwo nende oruchina orupapale rubili, nebilenje bialio nende esifuunikho sialio; 36emesa nende ebirumikhilo biakhwo, nende emikaati echiahanwa khu Nyasaye; 37esihani sietsitaya esietsahabu netsitaya tsiakhwo, nebikuru biasio amafura ketsitaya; 38olusambwa lwetsahabu, amafura kokhubakha esielwa sia Nyasaye, obwali obuhunyanga bulahi; epasia yomubwinjil'lo bwe Liheema; 39olusambwa lwomukasa nende esing'enge sialwo siomukasa, nebikhongo bialwo, nende ebirumikhilo bialwo biosi; ebeseni yokhwesaabilakhwo nende esierenjekhwangakhwo; 40etsipasia tsiokhusinga Liheema nende ebikhongo biatsio nende ebikuru biatsio; epasia yomubwinjil'lo bwomulukaka lwe Liheema nende emikoye chiayo; ebibambo bie Liheema; ebirumikhilo biosi ebiokhurumikhilwa Mwiheema; 41nende tsingubo etsieing'ono indahi etsia abesaalisi bakhoya okhwebiikha nibali Habundu Hatsienukhu – tsingubo tsinzienukhu etsia Haruni nende etsiabasianibe. 42Abaisiraeli bali nibakhol'le emilimo chiosi singa OMWAMI yali nalachile Musa. 43Musa yahenjelesia siesindu siosi ma nalola mbu bali nibabikhol'le singa OMWAMI yali nalachile Musa. Kho Musa nabalaamila tsikhabi.

Currently Selected:

OKHURULA 39: EBAIBO

Highlight

Copy

Compare