OKHURULA 15

Olwembo lwa Musa

1Ma Musa halala nende Abaisiraeli nibembela OMWAMI olwembo luno!

“Namwembele OMWAMI,

Sichila ye unyooye obulechi bwoluyali.

Ufuubile etsisululi nende yabo abachilusianga munyanza.#Okhub. 15:3

2OMWAMI niye Omusooli wanje omukufu;

niye owali okhusoola.

Ye ni Nyasaye wanje, nase namufumie,

ni Nyasaye wa papa wanje,

ne nanyembe khukobukhongo bubwe.#Etsisa. 118:14; Isaya 12:2

3OMWAMI niye mwene mahe;

OMWAMI nilio eliira lilie.

4“Yafuuba abasikari be Misiri nende amakaari kabwe munyanza;

abasikari babwe abalahi berwa namaatsi mu Nyanza Inzakhanyu.

5Inyanza eyatsia olutungu yabafunikha,

beyinikha mulutungu singa lichina.

6“OMWAMI, omukhono kukwo omusaatsa kuli netsingu tsiokhurisia;

kufunakanga omusiku mubitonye.

7Mutsingufu tsiobukhongo bubwo, olekanga abasuku baabo;

lirima lilio liatukhanga ma libasamba singa omukhuutsi.

8Wafuura khunyanza ma amaatsi nikekuula ikulu,

kasinjila ikulu silunji singa lisisi;

olutungu lwehasi heinyanza lwoma singa lichina.

9Omusuku yaboola mbu, ‘Nambalondel'le ma nambatiile;

nangabukhanie emiandu chiabwe ma nambukule esianyenyanga;

nanjomole olukanga lwanje ma nambukule biosi ebia bali n'nabio!’

10Nebutswa wahuutsa butswa omuya l'lala OMWAMI, ma Abaamisiri nibeer'rwa namaatsi;

behinikha singa esibia mumaatsi amakali.

11“OMWAMI, niwina khubanyasaye olikhwo singa ibe?

Niwina owakhafwana n'nawe, owokhuchenyia mubutsienukhu?

Niwina owakhakhola akamangalimwa,

nende ebindu biokhuchenyia singa ibe?

12Wanyil'le butswa omukhono kukwo omusaatsa,

ma liloba nilimila abasuku befwe.

13Mukhuba omusubilwa musiesuho sisio, wemel'la abandu baabo aba wanunula;

mutsingufu tsitsio wabemel'la okhutsia musibala sisio esitsienukhu.

14Amahanga kahuliye ma katechelanga muburi;

Abafilisiti bahambilwe noburi obukali.

15Abemeli ba Edomu bang'ang'aye;

Abandu ba Moabu abetsingufu indenga ibahambile;

abandu ba Kanaani bahweye tsingufu.

16Indenga nende oburi bubahamba.

Balolanga tsingufu tsitsio, E OMWAMI,

ma bangangala muburi,

okhwola olwa abandu baabo bamal'le okhubira;

abandu bawahinisie mubusumba.

17Obaleeranga ma obara khusikulu sisio,

habundu ahe ibe OMWAMI, weyahul'la singa hango haho,

Ehekalu ye ibe omwene wombokha.

18Ibe, OMWAMI, olabetsanga omuruchi inziayo!”

Olwembo lwa Miriamu

19Abaisiraeli bachenda hakari weinyanza singa abachendanga khwiloba eliomu. Nebutswa olwa amakaari ka Abaamisiri nende etsisululi tsiabwe nende abatsilusianga benjila munyanza, OMWAMI yakalusia amaatsi ma nikabafuunikha.

20Omuroobi Miriamu, omukhaana wanga Haruni, yabukula amanyanga, ne abakhasi bosi bamulonda nibasasianga amanyanga kabwe nibasina. 21Miriamu yabembela mbu,

“Mwembele OMWAMI, sichila khunyooye obulechi bwoluyali;

ufuubile etsisululi nende abatsilusia munyanza.”

Amaatsi amalulu

22Nilwo olwa Musa yemel'la abandu ba Isiraeli okhurula khu Nyanza Inzakhanyu okhutsia Suru. Khulwa amatukhu kataru babir'ra hakari wesitsiimi ne sibanyoolakhwo amaatsi tawe. 23Olwa boola habundu halangwanga Mara, sibaali abanyala okhunywa amaatsi kaho tawe sichila kali amalulu. Nisio esichilanga habundu yaho nihalangwa Mara#15:23 Mara Muluheburania mbu amaatsi “amalulu.” 24Abandu bekaan'na Musa nibareeba mbu, “Khwitsa okhunywa sina?” 25Musa yasaaya nomwoyo kwosi khu MWAMI ma OMWAMI namumanyia esitonye siomusaala esia yafuuba m'maatsi; ne amaatsi nikakaasa khulwokhunywa.

Ebwene yiyo OMWAMI yabahelesia amalako kokhumenyela, khandi nabateemelayo. 26Yababool'la mbu, “Nimuba nimwakhambulila kupu khulwokhukhola akali amalunji khu ise nende okhufumila amalako kanje, sindakhamuhekhwo esinyasio siobulwaye bwosi obwandahaana khu Bamisiri tawe. Ise nise OMWAMI, omuhonianga mubulwaye bwenywe.”

27Ma niboola Elimu ahebitaho likhumi nabibili biali halala nemisaala amakhumi kane nakataru echiamasindu; habwene yaho bakhupa ekambi ahembi khumaatsi.

Currently Selected:

OKHURULA 15: EBAIBO

Highlight

Copy