GALATIA 5
5
Yuba Dolomak Dara Bleblesil Yuba
1Nuk ara seleb lobsuk nang geknebaʾ ulunokaʾ aboka, Kristus adya dara, unuwanalum an yub ek ab, seleb gobdo lobsuk. Ugunda oruknaʾ wa wen nang saawoka domunuk aboka, pe keeboka seklelulum.
2Nara Paulus bedya hyak dib lebsinaʾ ara, ugunda bolaʾ seleb garabdanalum dara, Kristus al nong ugunsambaʾ ara, salyaʾ lelem danesil. 3Nara onoʾ hnon ugunuk laga lebsinaʾ ara, nimi bolaʾ garaldalamak nang era, ban unuwanalum an yub hnonoknya nek sunuwoka unulumakaʾ anasa, hyak nidyaʾ wenyalamlaʾ sunuwoka unulunok. 4Unuwanalum an yuba pik ab uboka, Imik Neyung hogung ak perob nenesinaʾ elelum dara, wera Kristus ab neikaʾ kweldanaʾ ara seleb pika garaldalalum. Unu garaldalalum dara, Imik Neyung adya wanaʾ uboka eleksinaʾ ak ab loboka, mok neneldalalum. 5Pewolum anaʾ dibaʾ elegosukaʾ anasa, nunda dib senelemabakanya, Geisinya aralesilaʾ adya, ganya wenaʾ dobnobaʾ aboka diri ulumab. 6Nimi Kristus Yesus lomok ulumak nim era, bolaʾ garalamakaʾ, orokaʾ ara, hnon dib nong ak unggulumla. Alda dib senenaʾ ara, wanaʾ unaʾ adya welemla dara, nenyek dib nong ara an.
7Ugunda youmaʾ dara, pika pe yeiriwoka balalum bok, wenera heknedya ugunja pika garab menegosukaʾ anasa, dib nong yub ek ara, keboka ununggululum do? 8Pe keboka unuwomunuk aboka pika garawousukaʾ ara, Imik Neyung ugun youbsuknya bek ab lananggulumla. 9#1Kor. 5:6Roti gwanenga welenaʾ ara mekaʾ bok, neikaʾ hilimak dara, nidyaʾ ol lelelamlaʾ ara ella ulumab. 10Nunja Wenelesilnya bedya bo ulusilaʾ anasa, nunja nekesuba yub ek ara, loboka yokok sam ganya beibnemakaʾ anyaʾ senenggulusin. Bok, alda ugunuk anyek malya nenewousunun senewoka ululanya bera, alak an igina yanamla. 11Hemyabo nang o, nak dara, bolaʾ garawanalum an yub enyek anam lero yabalesinya bok dara, hekasa nak ara lobaʾ nenewaneneseng do? Wera an unulusinya bok dara, Yesus oboka gal ak glamek yub era salyaʾ ouluk diknaʾ girik anaso unggulumnamso. 12Ugunja ganya bokgogoka malya nenelesak nang era, bokaʾ garaldalalulum alamakaʾ anasa, sik moumen sikja nong garabdaneseng dara, perob senelamna.
13Nadyaʾ hemyabo nim o, ugunda henga lob lomnaʾ anasoʾ ak ulululumaʾ aboka, Kristus ara ugunuk youbsuk. Ugunuk an lobsukaʾ ara, an unuwosukaʾ adya nunda yokaʾ-yokaʾ ak dara, ganya oka denaʾ adya salyaʾ lelem unulunok senenaʾ ara loboka, alda wanaʾ ubdangoka ugun moumen araldalalulum. 14#Im. 19:18Nidyaʾ unuwanalum an yub ek momnya dobokaʾ ara, ban yub enedya ok gaka dangalamlaʾ ara, ”Andamnya wanaʾ uldalalam sok, nimi yok nang ek unu neikso wanaʾ ulululum,” aro lebok. Dara, ban hnonok ok unululam bok, nidyaʾ gobdo unululam. 15Bok ugunda si glekoka obdangoka, malya neneldalamun dara, ugun moumen soldowoka dengabdomunuk aboka, pe keeboka ulululum.
Imik Neyung Ganya Ab Nimi Ganya Ab Yuba
16Nadya an wenyhenya nera, ugunja unaʾ era Imik Neyung Geisinya adya bo ulusilyaʾ dara, ugunja malya unaʾ hwam ok unulusinya pika dilira dobnenggulumnulum. 17#Rm. 7:15-23Nim adya ganya era, Geisinya ab dara, gangganaʾ gogoldalarak. Dara, Geisinya adya unuwonun senelelanya neb, nimi ganya adya unuwonun senelemaknya neb dara, yok-yok ulumla. Sikja ganya seininaʾ ara yok-yok seinilirakaʾ adya, ugunja unuwanamna senenanya nera ununggululum. 18Bok ugunuk dara, Imik Neyung Geisinya adya bo ulumnesil dara, wera unuwanalum an yub ek ara, ganya dib beiliwoka unggulumnelum.
19Wera nimi ganya oka desinaʾ adya ununaʾ laga eillilimabaʾ ara gela salyaʾ salanaʾ ab, sembejaʾ unaʾ ab, ganya sirigaʾ beilinggom ganya ab, 20bisaʾ girik gala gibnaʾ ab, nimi guma guknaʾ ab, lek seneldanaʾ ab, waldanaʾ ab, ganya oka deregoka solom ganya ab, dibum an ganya ab, nanokok pewounulul senenaʾ ab, doluwoka malya neneldanaʾ ab, mala doldanaʾ ab, 21hman ganya boldanaʾ ab, yu meka deregoka ganya uu anaʾ ab, bera seboka eiya hlan malya unaʾ ab, anasonya nidyaʾ ara malya unaʾ ak ulumla. Nimi ban malya unaʾ enyek nauba unuru yabalamak nang era, Imik Neyung mab adya misaʾ hnon dobnenggunumak aboka, youmaʾ hnon seleb nekesisaʾ ara, onoʾ saawoka sumen hnon neksin.
22Imik Neyung Geisinya adya ganya dok ara, wanaʾ ganya hnon, ei-ei ganya hnon, namen ganya hnon, siklenaʾ ganya hnon, heknaʾ ganya hnon, pe ununaʾ ganya hnon, bojam un ganya hnon, 23ganya sokok neneldanaʾ ganya hnon, pe keeboka diri uldan ganya hnon, ulumla. Yok-yok unuwanalum an yub edya dara, ban ganya danyek boboka unaʾ ara, hnon mem anggulumla. 24Nim ara, Kristus Yesus adyaʾ seleb dangarob nim era, sokok an nimi ganya era, yok-yok malya unaʾ salyaʾ doro unulusinya ganya ab, salyaʾ meknewoka unulusinya ganya anyek, seleb oboka gal ak glabek. 25Imik Neyung Geisinya adya nuk embengaʾ wenyek unaʾ era elegosuk dara, wera nunja nong unaʾ eneba Geisinya adya goluwoka bo ulusilaʾ adya unulumnemab. 26Nunja yok nang ek dengdang ganya boboka, ganya soloma nenebdangoka, hman ganya boldanaʾ ara, hyak mem.
Currently Selected:
GALATIA 5: LAINLC
Highlight
Copy
Compare
Share
Want to have your highlights saved across all your devices? Sign up or sign in
