1 KORINTUS 12
12
Imik Neyung Adya Yok-Yok Wa Damok Eleklesil Yuba
1Wenyek dara, Imik Neyung Geisinya adya wa wenaʾ migibaʾ yok-yok eleklesilaʾ ak lebnamna. Hemyab o, ban yuba damok enyek dara, hyak pe dibaʾ ella danasom senelamna. 2Ugunda Wenelesilnya bek anam elgom ululum salek era, ugunda yuba gomnya giblemakaʾ ak gliboka bo balasuk. 3Imik Neyung Geisinya adya bo ulusilya nim edya dara, ”Yesus ak ara meilinya,” hemenggom anasa, ugunda ella danalum aboka, neksin. Anasonya neikik, onoʾ Imik Neyung Geisinya adya diri bo usinaʾ orok nim edya, ”Yesus anyek Wenelesilnya ulumla,” hemenggom anasa lebsin.
4 #
Rm. 12:6-8
Imik Neyung Geisinya adya, wa wenaʾ damok eleklesilaʾ ara, yok-yok ululabok, ban nidyaʾ ara, neik Geisinya bedya ok eleklesil. 5Wenelesilnya bek arawoka wa wen danasa dara, yok-yok ululabok, ban arawoka welemakaʾ amba dara, Wenelesilnya Imik Neyung hnonok ok gobdo ulumla. 6Imik Neyung wa welemakaʾ ara, yok-yok ululabok, wa welemakaʾ anasa migibaʾ eleklesil Imik Neyung era, hnonok ok ulumla.
7Nuk nidyaʾ hiboka pewosululaʾ aboka, Imik Neyung Geisinya ara, nimi hnonok-hnonok yok-yok eleklesil. 8Dara nimi ben hnonda Geisinya bedya yuba geremsengaʾ salalulaʾ aboka, wa wenaʾ damok eleklamla. Nimi hnonda al neik Geisinya bedya, pe ella dangoka yuba lelelulaʾ aboka, wa wenaʾ en damok eleklamla. 9Dara onoʾ al neik Geisinya bedya, dib senewolulaʾ aboka migibaʾ eleklamla. Onoʾ neik Geisinya bedya hnon nim ek, nimi merellisin migibaʾ damok eleklamla. 10Hnon nim ek ara, yokaʾ-yokaʾ senenggomaʾ migib ununaʾ anyek, unuro yaban danasa wa migib en damok eleklamla. Onoʾ yok nim ek ara, ununumnaʾ lelelulaʾ aboka, an wa nen migibaʾ eleklamla. Al onoʾ neik Geisinya bedya hnon nim ek ara, ban nenera Imik Neyung wa ara ban, alda ban nenyek dara, Imik Neyung adyinya gomaʾ an wa migib eleklamla. Hnon nim ek ara, yok-yok sokok yuba ella danganaʾ damok migibaʾ eleklamla, hnon nim ek ara, yuba damok danyek nera damok ara, banyek lebok an danasa migib eleklamla. 11Ban nidyaʾ unulamlaʾ ara al neik Geisinya bedya ok unulamla. Nimi yok-yok elaʾ gigiro Geisinya elegosunun senemnaʾ ok sunuwoka yok-yok eleklesil.
Yana Soruk Ara Gong Bok Nong Ara Hnonok Yuba
12 #
Rm. 12:4-5
Kristus ara, nimi nong anasoʾ ak hnonok ok ulumla. Nong ara hnonok bok, yana soruk ara yok-yok gong ulumla. Yana soruk ara, yok-yok bok nong dub ak dara, hnonokaʾ ak ulumla. 13Anasonya neikik, numbabya Yahudi nimi yokaʾ gom, Yahudi gom nim gom, ek wa nang gom, seleb blebdangoka sikbeyok ganya doboka ulumak nimi gom, nunda nidyaʾ hnonok nong ak denewoka ulunokaʾ aboka, hnonok neik Geisinya bedya seleb mek dibaʾ dabsuk. Numbabya nidyaʾ ak neik Geisinya elegosuk.
14Wera nimi nong ara, yan moumenaʾ ok unggulusil bok, alda nidyaʾ yana soruka bokoka gong-gong ulusil. 15Yan adya lebnesodya, ”Nara soruk gom anasa, nara nong ak unggulumna,” henemso dara, wera ban nenyek dara yan ak dara, nimi nong unggulumnamso de? Orok. 16Dara onoʾ o adya lebnesodya, ”Nara heng dok unggulumnaʾ anasa, nara nong ak unggulumna,” henemso dara, wera ban wenyhenemsoʾ adya nong unggulumnamso de? Orok. 17Nimi nonga nidyaʾ ara, hiboka heng dok ok ulumso dara, nong ara hekaʾ huboka yuba kebnamso do? Goma, nonga nidyaʾ ara, hnonok hiboka o meklaʾ ok hnonok ulumso dara, songa dinin dara, hekaʾ huboka songa diniwanamso do? 18Imik Neyung adya ok yana soruka nidyaʾ ara nunja nong ak sam beiri yibuk. Yana soruk ab, yokaʾ-yokaʾ nidyaʾ ab, Imik Neyung adya alja unuwonun senemok sok sunuwoka, alja ok ganya doboka dirigoka beiri yibuk. 19Nimi nong ara, yan dem ak gom hnonok ok ulumso dara, hekaʾ uboka nonga danamso do? 20Anasa yana soruk ara gong ululabok, nong ara hnonok ok ulumla.
21Anasa wera heng adya dara, soruk ak, ”Nara anak dolbalek senelenggen,” wenyhenggunumso. Onoʾ huk adya yan ak, ”Nara anak dolbalek senelenggen,” henggunumso. 22Alda saawoka onoʾ nunja dara, nong gararobaʾ hnonda hmeng senelemabnya nenyek onoʾ hyak dib nong ulumla. 23Hnonda nunja nong era darasam anara, mek perob gom senelemabnya nenyek, nunja dara, perob aboka yokaʾ-yokaʾ pe unulumab. Onoʾ heng kemenaʾ perob gom senelemabnya nenyek, nunja dara, pe keebdangoka bo uldalamab. 24Bok nong yana soruka perobnya nera, alak yokaʾ-yokaʾ ununggulumab. Imik Neyung adya nunja nonga pe lelewoka beiyisukaʾ adya, wera nunja heng kemenaʾ edya dara, perob senewamenggomnya nenyek, perob senewanokaʾ aboka umok. 25Wera nong ara, doluwoka bokdeijek aboka, yana soruka nidyaʾ hiboka pe diri ubdanokaʾ aboka umok. 26Yan ak oka del yabasin dara, wera nonga nidyaʾ ak oka dero lolosil. Soruk ak gom alda pelemla aboka gibel yaban dara, yok-yoknya neneba nidyaʾ perob aboka eiya hlalamak.
27Hemyab o, anasa ugunda Kristus nonga ululumukanya, onoʾ ugunda hnonok-hnonok Kristus adya nong yokaʾ ululum. 28#Ep. 4:11Anasonya neikik, Imik Neyung yuba donaʾ nim emba dara, Imik Neyung adya orowek men ellaʾ gigiro gegewoka sekiyimok. Men Imik Neyung yuba lenaʾ gak nang, penenya nera ununumnaʾ len nang, winilinya nera neksin nang, dara sikda yokaʾ-yokaʾ migibaʾ unuro yabalemek nang, dara nimi merellisin damba hnon, yok aran damba hnon, yok nanga bo usin danasa hnon, onoʾ dagalongnaʾ ara, yok-yok yuba san damba hnon, sekiyisuk. 29Sikenek dara, nidyaʾ yuba lenaʾ gak nang ok gom, ununumnaʾ len nang ok gom, neksin nang ok unggulumak. Sikda nidyaʾ ara, yokaʾ-yokaʾ migibaʾ unuro yaban danasa unggulumak. 30Nidyaʾ nimi hwen damba, yok yub edya unuro san danasa, yuba dangawoka san danasa, nidyaʾ ara neikik eleganggusuk.
31Anasa wera, ugunda hyak perob wa wen damok enyek, dobnob senewoka hyak yeiriwoka dulululum. Bok ana damumduk anara, hyak pe unuwanalumnya nenyek neknesin.
Currently Selected:
1 KORINTUS 12: LAINLC
Highlight
Copy
Compare
Share
Want to have your highlights saved across all your devices? Sign up or sign in
