1 KORINTUS 11
11
1 #
1Kor. 4:16; Plp. 3:17 Nababya Kristus adya unulamlaʾ anyek, diliwoka ulumna sok, ugumbabya nadya unulunanya nenyek dililenululum e. 2Ugunda nak sobaʾ beklenulumukanya, nadya neklesin yub ek pe sunuwoka unululumaʾ anasa, nara ugunuk perob aboka gigilesin.
Gelewa Adyaʾ Huk Kweidyaʾ Yuba
3Wera hnonok ella daseng senenanya donok pe ella danalumaʾ ara, nenya adya hukuk ara, Kristus hnonok dubnya ulumla, gel adya hukuk ara, nenya ulumla. Dara onoʾ, Kristus adya huk dubuk ara, Imik Neyung ok hnonok ulumla. 4Nimi ben hnon heng uboka mololamla salek gom, nimi gong weklemakaʾ ak Imik Neyung yuba lel eleklesilikanya, huk golunaʾ golunggulumla dara, wera bera Kristus ak malya nenelamlaʾ ara an. 5Bok onoʾ saawoka, gela hnon heng uboka mololamla gom, Imik Neyung yuba nim ek lel elekleladyok, alda huk goulunaʾ goulunaʾ orok dara, alja gel genedya huk dubuk ululanya, alja nenya ek malya nenelamla. Dara, gel genera seleb honga sirikaʾ gugumna gel genesoʾ ak ulumla. 6Anasa wera, gela hnon nara huka goulunaʾ ara, lek senewalya dara, wera alja hong era garab lobnamso. Bok, on gel era, nadya honga sirikaʾ guknija gom, honga gobnija gom dara, wera nera na damnya malya neneldalamna senewalya dara, or alja huka goluwanamso.
7 #
Kej. 1:26-27
Nengmab ak dara, sikda Imik Neyung adya alja nong eb, alja senenggomaʾ ab, heng kemeldanaʾ dibaʾ ulumakaʾ anasa, huka goluldanaʾ ara mem. Bok gelewa ak dara, nengmab ak, imik nenen damba ulumak. 8#Kej. 2:18-19Nenyek dara, nengmab ara gel ek ab lanawanggumok bok, gelewa anyek nengmab ak ab lanamok. 9Imik Neyung adya nengmab uyimokaʾ ara, gelewa anyek pewosululaʾ awoka uyiwanggumok. Alda gelewa anyek nengmab amba pewolulaʾ aboka uyimok. 10Anasa wera, Imik Neyung lero nang heng eillilisinokaʾ aboka, gelewa ara nenya adya huk damumduk ulumla geknebaʾ, alja huk goluldalalul.
11Ban nenesa ululabok, Wenelesilnya bedya seinilamlaʾ ak dara, gelewa ara ganya doboka, nengmab ak ab loboka, sikbeyok goʾ ubnengguneseng. Dara onoʾ nengmab anaba, gel ek loboka albeyok ganya doboka salyaʾ ubnenggunuseng. 12Men youbuka gel gera nengmab ek ab lanamok sok, onoʾ nengmab ak dara, gelewa ak ab beillilimak. Bok nidyaʾ yokaʾ-yokaʾ ara, Imik Neyung ak abaʾ ok ulumla.
13Hem yabo nang o, ban nenyek ugumbeyok sunubyamadenelum: Gela hnon alja huk goluwanggonggom, Imik Neyung ak heng uboka molowanamso dara, ugunda perob senewanesom de? 14Nimi hnoum ab, men ella ulumakaʾ ara, nengmab ara, honga waranaʾ loldalamla dara, alak alya danganaʾ ulumla. 15Bok gel ak dara, alja hong era waran dara, alak giginaʾ ulumla. Nera alja hong waran aboka elegemok. 16Bok ban nenesa, nimi hnon ban blekel lololabok dara, nub yok Imik Neyung yuba dolomak nim eb dara, yok ununaʾ ara hyak unggulumla.
Imik Neyung Beknaʾ Beklamna Ek Unulumak Yuba
17Bok, ban wen wenyhenesinya nenyek dara, nara ugunuk najabo yabo pelesulum aboka gigiwanggunusin. Ugunja Imik Neyung yuba doboka unululumaʾ ara, perob yinaʾ nauba menggulusil bok, malya yinaʾ ok nauba melesil. 18Men youbuka ugunuk ab, yuba kesisaʾ ara, ugunda yuba donaʾ nim Imik Neyung yuba longowoka ululumaʾ ak sam ara, nimi ganya bokdangoka malya neneldalamak an yuba hnon kelemna. Nadya dara, nera aldib unulumak do senelamna. 19Ugun gangganek ara, har berek Imik Neyung adya perob senelesil nanga hnon, har berek yuba dib donaʾ orok bok, ulumak nanga hnon, laga danokaʾ aboka unulusil. 20Bok, Imik Neyung yuba longowoka beklelum dara, ugunja yuba longolelumaʾ ara, Wenelesilnya bek beknobaʾ aboka longonggululum. 21Ugunda delelum dara, yok nim ek diri bukla henggonggom delelumukanya, hnonda lo deldalalum dara, hnon nim era, gwanenga doboka denggulumak, hnon nim era, mona bukoka delelumaʾ adya wera ganya uu alasil. 22Ban unululumaʾ ara hekasa unululum do? Ugunja gwaneng den damba meka den damba, e dibaʾ unggulusil de? Meka deregoka ululum de? Goma, ugunda Imik Neyung yuba donaʾ nim ek malya nenewoka, bonaʾ garan ulumak nim ek alya nenewanobaʾ aboka, sene ululum de? Ban unululumnya nenesa, nara hekaʾ ak ugunuk lebnesin do? Ban nenyek sikda pelemak aboka ugunuk gigiwanasisinya de? Hyak orok. Nadya dara, ugunuk hyak gibnenggunusisinya.
23Nadya ugunuk nekesisaʾ ara, nara Wenelesilnya bek ab domsaʾ ak nekesisaʾ ara an. Nunja Wenelesilnya Yesus bek obnemab aboka, yuba dil bilimok sum enyek, inimnek enyek, Yesus ara gwanenga dobok dara, 24Alda perob aboka, Imik Neyung ak molobgogomok dara, gwaneng soboka lebokja, ”Nadya nonga ugunsamba elegeisinaʾ ara an. Nak beklenumunukanya, or delelulum,” hyok. 25#Kel. 24:6-8; Yer. 31:31-34Neikso, seleb debgogomek dara, mek hmeiya doboka lebokja, ”Ban mek hmeiya era, nadya eneng ek anasa, wenyek wenyaldan yuba beknaʾ era an. Ugunda ban beknaʾ meka delemun dara, nak beklenumunukanya, delemnelum.” 26Anasa, ugunda sobaʾ gwaneng ab, beknaʾ mek ab delelum dara, Wenelesilnya be somogokaʾ anyek, nekoka unulumun sok moruwoka al yanamla.
27Anasa wera, Wenelesilnya bedya gwaneng gom, alja beknaʾ mek gom, ugun nonga pe maka meibdanggonggom delelum dara, ban unulumak nim era, Wenelesilnya bedya alja nong eb, alja eneng eb danyek, malya ul eleklamla. 28Wera anasa, nimi hnon denemla dara, al damnya men orowek pe maka meibdangoka ublyekanya, wera or gwaneng ab, beknaʾ mek ab or dulul. 29Dara wera, nimi ben hnon gwaneng ab, beknaʾ mek ab delemla dara, Wenelesilnya bedya nong enyek pe seininaʾ loboka, or salyaʾ lelem delemla dara, ban unululanya bera al damnya igin yakaʾ kwellildalamla. 30Wera, ban unuwoka salyaʾ lelem delelumaʾ adya, ugun gangganek ara, hnon neiknaʾ salawoka, nonga hmeng uboka, onoʾ hnonda seleb somogolum. 31Bok nunda beknenggumeibya salek enyek, nun damnya pe heibdeibya dara, nuk igina boyiwanggunesil. 32Bok, Imik Neyung adya nuk malya geblesilnya nera eimik enyek, nuk sokok an yokaʾ nim eb, neikaʾ dib obsilyek aboka, sene men orowek or legebnaʾ dem ok deblesil.
33Nadya hemyab o, anasa wera, Wenelesilnya bek bekoka denobaʾ aboka, yuba longololum dara, pe diri bukdangoka delelulum. 34Denemun sum enyek, nimi hnon gwaneng ok ublya dara, orowek aljaʾ ek ab pe delul. Ban lebnanya nenyek pe unulumun dara, Imik Neyung yuba longowoka bekoka delemunaʾ hmeinggin ara, Imik Neyung adya ugunuk malya uyiwanggunusil.
Yok-yok yuba dara, nadya ugunuk yanya sum enyek, anaso-anaso aboka neknesin.
Currently Selected:
1 KORINTUS 11: LAINLC
Highlight
Copy
Compare
Share
Want to have your highlights saved across all your devices? Sign up or sign in
