Kem Lingón 97
97
1Dwata se yóm Hol Geta.
Hol hligal he yóm klamangen benwu.
Hol hligal he yó kem benwu kilil mohin.
2Wen tey lobun ne kifu mget hmilol du.
Yóm ktedengen ne yóm kukum tedeng nwiten yóm hembegel yóm kogoten tau.
3Wen tey ofi nô bè soluhen,
gotu kenen yó kem hohonen.
4Yóm ksilaen tendo mkal bè klamangen benwu.
Bè yóm kton le du yó kem tau, gotu le likò, botong setbol kkel le.
5Gotu le mnò bè soluhen yó kem bulul, lómón knò tolu.
Mnò le bè solu yóm Dwata bè klamangen benwu.
6Heglalag longit yóm tey ktedengen,
ket benwu mton du yóm tey klinggelen.
7Yó kem tau gel tmaba ebè yó kem dwata kéng,
gotu le mulék myak,
lu se yó kem tau alì heklabak bè yó kem dwata laen dù muhen.
Yakà kdê yó kem dwata kéng, gotu le hegdungul ebéléen.
8Deng gungol yó kem tau bè Sayun yóm kkukumem,
dalang se yó kem tau bè kdê syudad bè Juda,
ya tey kligal le bè yóm kungol le du.
9Yakà uu du, Dwata yóm hol dandónen geta bè klamangen benwu.
Uu se hol geta senta yó kem dumu dwata.
10Tey kbong nawa Dwata kul yó kem tau kembê du yóm sidek.
Sal gel bnenteyen yó kem tau teneb béléen.
Lenwaen lu lem hólól yó kem tau mò sidek.
11Yó nmò Dwata bè yó kem tau mimón du,
sal gel wen layag bélê le,
ne gel hefligalen yó kem tau tedeng nmò le.
12Yu kem tau mò du yóm tedeng,
hol ye hligal bè Dwata.
Hol dóyón ye yóm kun boluy.
Currently Selected:
Kem Lingón 97: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
