Kem Lingón 94
94
1Ó Dwata, uu yóm Dwata fen gel meles.
Hol hegfanem yóm ktedengem, Dwata yóm Dwata fen gel meles.
2Uu se fen kmukum yóm kdéen tau,
géhél nem e knukum yó kem tau hegmón.
Kukumem kul yóm tafak geblà bè yóm deng nmò le.
3Kmò kegenen de, Dwata?
Kmò kegenen de yóm alì kehegmón le yó kem tau gel mò sidek?
4Són udél heklabak btang bè sumóng le.
Henklabak le yó kem deng nmò le.
5Tey kehegnok le yó kem kóm tau, Dwata,
hensidek le yó kem tau kenbong nawahem.
6Botong hnatay le yó kem libun bolu ne yó kem tau milo,
ne bnonok le kem ngà hikit.
7Yó mon le, “Là kô ton Dwata tekuy.
Yóm Dwata yó kem tau Israél, là kô hendemen du kun.”
8Ten-gama ye, yu kem tau nungel.
Kilón de kbaling ye tau hulung hedem?
9Dwata yóm mò klingu ye. Bokong kô kun?
Bud nmoen se mata ye. Butô kô kun?
10Ke tnafaken yó kem tau bè yó kem dumu benwu,
là gbeken tmafak kuy kô?
Gotu tngónen kdéen,
là tngónen du kô yó kem gel nmò ye?
11Gotu tngón Dwata yóm kehedem tau,
tngónen laen kô gónón e kól.
12Ó Dwata, hligal le kul yó kem tau deng wen gónóm semtódô kul,
dalang se yó kem tau wen gel tolokem kul lemwót bè kóm hlau.
13Bè yóm kdawen wen gel gfà le, sal gel henwósem ta le,
efet hokolem yóm tey sol nelem mò gónóm hebtang yó kem tau gel mò sidek.
14Yóm Dwata, là kô nan e kenbê kul yó kem kun tau,
ne là kô tódô bayaen kul yó kem kun tau nfun.
15Yó kem tau tedeng kmò le,
angat bud mulék ebélê le yóm kukum tedeng,
ne tódô kdê le gotu lemolò du.
16Tau du de mofin dou bè yó kem tau gel mò sidek?
Tmau du de mfi dou bélê le?
17Ke tehe là tnóbóng Dwata dou,
là knahem du ne deng katayu.
18Yó monu, “Tlokobe.”
Okóm yóm là konol yóm kbong nawam dou, Dwata, yó se temgel dou.
19Ke wen gónón alì sidek kegnómu du,
gel henyuhem nawaw, ne yó se gel bemlay dou kligal.
20Laen kô dù kóm du, Dwata, yó kem tau mogot kukum là tedengen,
yó kem tau heswì le kogot le kukum.
21Ssotu atul le hemsidek yó kem tau tedeng,
mom hatay kkukum le du yó kem tau laen dù salà le.
22Okóm Dwata se yóm dou gónó hofin.
Du se yóm botu hol mbegel gónóhu e mlo.
23Angat hulék Dwata eta yó kem tau gel mò sidek yó kem ksidek nmò le.
Angat gotu genlaen lu lemwót bè yó kem salà le.
Yóm Dwata hol gónó tekuy mogot fen gemlà kul.
Currently Selected:
Kem Lingón 94: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
