Kem Lingón 95
95
Lingón dmóyón ke Dwata
1Géhél ye ne, na tekuy e dóyón Dwata.
Hol kuy hligal semngal ebéléen,
yakà kenlungen tekuy.
2Hloni tekuy ebè Dwata,
mung du yóm tey keslamat tekuy béléen.
Hol tekuy hligal semngal,
yóm sngal mò dmóyón du.
3Abay se yóm gónó tekuy mogot,
du se Dwata hol gembek bè kdéen.
Du se hol dandónen geta gembek senta yó kem dwata kéng.
4Gotu knamalen yóm klamangen benwu,
lenwóten bè yó kem hol kilib nelem kkólen bè yó kem hol bulul geta.
5Bud knamalen snéen yóm klamang mohin tehe nmoen,
ne yóm klamang tonok tehe dlimunen.
6Géhél ye ne, mtud kuy bukol bè soluhen,
ne tmaba kuy ebéléen.
Du se yóm hol gónó tekuy mogot,
yóm tehe mifil tekuy.
7Du se yóm kut Dwata, tekuy se kem tau sen-gyoken,
lómón ke ubiha gel hótóben.
Hol hnungol tekuy kemdaw ni
yóm udél Dwata ebélê tekuy, yó monen,
8“Hol bê ye hgel kulu ye.
Bê ye hkél bè kgel kulu yó kem tehe fù ye ekni
bè yóm tehe knô le bè yóm benwu Miriba.
Ne senged snéen yóm tehe knô le bè Masa,
bè yóm benwu laen hol wen tauhen.
9Bè yó tehe gónó le tmilów dou, igò le deng hónô mton du yó kem gel nmou lem blóng le.
10Botong fat folò halayen kegenu lembut kul,
botong monu, ‘Hono kem tau tlas kehedem le.
Là móyô le mimón du yó kem hlauhu kul.’
11Ya tey sidek kebutu kul, botonge smafà, monu,
‘Là kô ye gehlós edu yóm benwu blayu kuy,
yóm benwu mò gónó ye henek nô.’ ”
Currently Selected:
Kem Lingón 95: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
