Kem Lingón 91
91
Lingón bè yóm kofin Dwata tekuy
1Yóm tau tendo hofin bè Dwata
ne ke henek bè kofinen du, yóm Dwata laen dù là gbeken du,
2du se yóm tau gembek mon du mò ke Dwata,
“Són uu, Dwata, gónóhu gel heklung ne gónóhu gel hofin.
Són uu yóm dou Dwata, són béléem gónóhu smalig.”
3Abay se yóm Dwata, gbeken hemseng du ebéléem
yó kem angat gel tô gfaem.
Hensengen ebéléem snéen yó kem des mit hatay.
4Yó kmoen kóm, lómón ke onuk,
lenambungen uu laan hafaken, ne laen kô dù hemenem.
Yóm là konol nawahen ebéléem,
yó se mò ofinen kóm ne mò klungen kóm.
5Béem knikò yó kem knikò sut kifu,
duhen ke yó kem tódô muluk ebéléem kemdaw,
6duhen ke wen des gónó mahil gbót tódô sut kifu,
dalang se ke wen sidek mit hatay sut kemdaw,
béem knikò lu.
7Anien ke lemibu tau matay masà klohokem,
ne sfolò libu masà gu hilolem,
laen kô dù tódô béléem.
8Tódô olohem mton du ktafak Dwata kul
yó kem tau gel mò sidek.
9Lemwót bè yóm khofinem ke Dwata,
ne yóm keheklungem bè yóm Hol Dandónen Geta bè kdéen,
10yó gónón laen dù gfà tódô kóm,
ne gónón laen dù tau gel mò sidek hloni bè gónóem.
11Yakà wen hógów Dwata gu bè longit mò mentey kóm
balù kihu gónóm e solu.
12Yó kmò le kóm, lómón ke nogot le uu bè sbalà sigelem
anì là tódóen bè botu tihem.
13Angat gotu ndaem lu elaan yó kem liyun ne yó kem ulal,
balù nô klóbô yó kem liyun,
ne balù nô kalas yó kem ulal.
14Yó udél Dwata, monen,
“Gel lenwau yó kem tau kembong nawa dou,
ne gel nofinu yó kem tau mogot béléu.
15Ke tmaba le ebéléu, bnalau lu.
Ke wen gfà le, elese nô bélê le.
Tendo gel lenwau lu, ne tey kadatu kul.
16Yó ofol blayu kul, angat htahau klowil le,
ne angat lenwau lu.”
Currently Selected:
Kem Lingón 91: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
