Kem Lingón 88
88
Lingón Himan yóm tau sfu Isra
1Ó Dwata yóm Dwata lemwà dou,
tey knihu béléem, tódô senflósu kdaw ne kifu.
2Hol hnungolem yóm knihu,
ne hol henklinguhem yóm alì kehtóbóngu béléem.
3Abay se deng tey dê gfau bè klowilu,
ne tey moni béléu hatay.
4Hol lómón kmò le dou, lómón ke yóm tau deng matay,
lómón ke yóm tau laen dù bud tmóbóng du.
5Deng tódô bayà le ou matay.
Lómón ke ou yóm tau deng hnatay le nô lem lebeng,
yóm tau deng tódô klifótem,
yóm tau là buden gomong bè yóm tóbóngem.
6Lómón ke deng lenesem ou etu lem sol lebeng alì nelem,
lem tum sol nelem alì kmifu.
7Tey gnómu yóm alì ksidek keblaten yóm kebutem dou,
hol lómón lewók mohin tódô slulun etahu.
8Deng mom hlayukem béléu yó kem weu.
Denge tey sidek bélê le.
Denge gholot, laen dù lanu gewà.
9Tódô kmefen ketngelu lemwót bè kkiku.
Tódô ket kdawu htóbóng béléem, Dwata.
Hdau eta hólólu bè yóm kehkoduhu béléem.
10Deng wen kô kem hentaw ton nmoem bè yó kem tau deng matay?
Gbek le bud btik kô anì dóyón le uu?
11Sentulón le ditu lem lebeng kô yóm là konol yóm kbong nawahem?
Ditu bè gónó meglà, gbek le semtulón du kô yóm tey ktenebem bélê le?
12Gfan lem yóm gónón kmifu yó kô yó kem hentaw ton nmoem?
Sentulón le ditu kô yóm ktedengem bè yóm benwu deng gotu klifót le kdéen? Là.
13Ó Dwata, tey kehtóbóngu béléem,
tódô ket hlafusu mni béléem.
14Moen de ke deng kenbéem ou, Dwata?
Moen de ke knogolem ou?
15Nbut bè kegenu ngà, sónmou tendo gemnóm des,
ne denge tô gel matay.
Là bud hol gbeku du ne yóm keblaten yóm ktafakem dou.
16Tey sidek keglumfaku du yóm kebutem dou.
Tey kehsideken dou yóm tafakem.
17Yóm lebutem, hol lómón tô yóm dunuk smibut dou seflós kdaw.
Laen dù lanu gewà.
18Deng gotu hlayukem béléu yó kem dumuhu swè ne yó kem tau kenbong nawahu.
Hono kifu yóm tebel béléu.
Currently Selected:
Kem Lingón 88: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
