Kem Lingón 77
77
Lingón Asaf
1Tey ktabahu ebè Dwata, tey ktabahu
du anì gungolen ou.
2Bè yóm tehe kdawen wen hlayamu, hnebelu Dwata.
Suloyu buteng mni ebéléen igou hdà hólólu ebè longit.
Laen kô dù kligalu ke là wen tóbóng lemwót gu béléem.
3Hendemu Dwata, ne botonge dmolong
lanu hfu imaku tendo mangat yóm któbóngem dou.
4Là hegtungóem dou, Dwata, tey sbeweg kegnómu du,
botong là gbeku du bud mni ebéléem.
5Tendo hendemu yóm tey kehyuhen yóm gnan kdaw,
bè yó kem tehe halay gnan ekni,
6yóm tey gel kehligalu semngal kifu.
Tey kehedemu du yóm gónón stólóng nim kmoen ni.
7Laen dù tul sónen ne kô yóm kekbê Dwata dou?
Là buden hligal béléu ne kô?
8Yóm tehe kbong nawan dou là monolen, laen duen ne kô?
Yó kem tehe fasaden dou, laen duen ne kô?
9Deng klifót Dwata ne kô yóm tehe kehyu nawan ebéléu?
Laen kô dù bud koduhen dou ne kô lemwót bè alì ksidek kebuten dou?
10Ne yó hendemu, “Ni deng tngónu. Gehedemu ne yó kem tehe halay alì kekgis yóm sigel kwanan Dwata,
sigel kwanan yóm Dwata Hol Dandónen Geta.”
11Gehedemu yó kem tehe nmò Dwata.
Gehedemu yó kem tey hentaw ton tehe nmoem bè gnan kdaw ekni.
12Senflósu hemdem du yóm kdê deng tehe nmoem.
Là mkóhen bè nawaw yó kem tey tehe genbekem.
13Laen kô dù belenen yóm kóm klan, Dwata.
Laen dù dumu dwata gemsenged yóm tey kegetahem.
14Uu se yóm Dwata mò du yó kem tey dê hentaw ton.
Deng hegfanem bè yó kem tólóng tau yóm tey kegbekem.
15Deng tehe nsokem yó kem kóm tau lemwót bè yóm tey kekgisem,
lu se yó kem tau sfu tehe Jakub ne sfu tehe Jusif.
16Bè yóm tehe ktonen kóm yóm Mohin Hulô, Dwata,
ya tey sidek klikoen, botong meningkil.
Botong megsinsig bè yóm hol huheden lemwót bè klikoen.
17Ya tey kulón gu bè yó kem lobun.
Ya tey leték gu bè longit,
mung du yóm tey kal silà tódô setles.
18Lel ni letékem mkal lem klifus bong.
Hlayagen klamangen benwu yóm tey kal silaem.
Lemwót bè yóm tey linol bong, botong megsinsig tonok.
19Nifalem yóm tey mohin lamang,
mlani lem blóng yóm tey lewók bong,
bede laen dù mton du danà hólól tihem.
20Tehe nalakem yó kem kóm tau bè yóm lan yó,
hol lómón kalakem kul ubiha,
bede hlanem bè le Musis lewu le Aron.
Currently Selected:
Kem Lingón 77: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
