Kem Lingón 76
76
Lingón Asaf
1Tey tótól Dwata bè benwu Juda.
Tey megdóyón boluyen bè benwu Israél.
2Bè Jirusalim gónóhen nô, nô ta bè bulul Sayun gónóen.
3Bè yó gónón gotu temfok du hanak yó kem hohonen,
kkólen bè klung le ne kem sudeng le, dalang se yó kem dumu ngom le sfatay,
gotu tenfoken bè yó.
4Teyi knóón, Dwata. Teyi geta senta yó kem bulul là sekna.
5Yó kem sendalù hohon me alì lóbô,
deng gotu negef me yóm kdê nô bélê le,
yakà deng le gotu matay yóm kdê le.
Laen dù bélê le gembek hemsidek kum.
6Ó Dwata tehe Jakub, lemwót bè kbólówem kul gónó le gotu matay,
yó kem tau smakay kudà dalang se yó kem kudà le.
7Teyi bong knikò, Dwata.
Tau du de gembek mdà bè soluhem ke bangem lembut?
8Lemwót bè longit yóm kkukumem yó kem hohonem,
botong le likò yó kem tau bè klamangen benwu, tódô le yem bè soluhem.
9Dengi mdà, Dwata, mò kmukum yó kem tau gel mò sidek,
ne mò lemwà yó kem tau hen-gnok talak tonok.
10Yóm kebut le kóm yó kem tau, yó se sotu hol gónóm megdóyón.
Yóm kebut le kóm yó, mò sudengem tmafak tau.
11Mò ye fasad bè yóm sana kuy Dwata hol gónó mogot,
ne hol dnohò ye yóm fasad ye yó.
Yu kem kdéen tau bè kem benwu hmilol,
hol ye mit basa ebè Dwata yóm Dwata hol knikò.
12Sal gel heglaan Dwata yó kem ngà tau hol geta hegeta knô,
ne du se knikò yó kem tau hol geta bè klamangen benwu.
Currently Selected:
Kem Lingón 76: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
