Kem Lingón 75
75
Lingón Asaf
1Slamat me ebéléem, Dwata,
tey keslamat me béléem, yakà teyi moni bélê me.
Gotu tulón yó kem tau yó kem tey hentaw ton deng nmoem.
2Yó monem, “Deng wen buteng fétu mò butengu kmukum yó kem tau gel mò sidek.
Knukumu lu mlan bè ktedengen.
3Ke megsinsig tonok, ne gotu le likò yó kem tau, botong le kenkel,
ou se hol hbegel du yó kem hehek begel tonok.
4Yó udélu ebè yó kem tau heklabak, monu,
‘Bê ye abay bud heklabak.’
Ne ebè yó kem tau mò sidek, monu,
‘Bê ye abay bnantak Dwata,
5botongen ne yóm kbantak ye du.
Ne tenflok ye ne mò du yóm stulón hton salù.’ ”
6Yóm kkukum tau, là lemwóten fi dmata kdaw duhen ke fi desdef,
ne là se lemwóten fi bwak duhen ke fi leged,
ne là se lemwóten bè yóm benwu laen hol wen tauhen.
7Kaem tek són Dwata yóm kmukum tau.
Du se temngón du yóm tau wen salaen,
ne bud tngónen snéen yóm tau laen dù salaen.
8Yakà wen tegayan nogot Dwata,
tódô hnok yóm ninum alì lóbô deng kmodok nô lemen,
hningónen yóm alì kebuten.
Gotu twélen nim ninum ni ebè yóm kdéen tau mò sidek,
hinumen kul efet gotu le.
9Okóm béléu, tendo heglalagu yóm deng nmò Dwata.
Sngalu ebè yóm Dwata yó kem tau Israél yóm sngal dmóyón du.
10Yakà deng mon Dwata du, “Kóhu yóm kul kfasang yó kem tau mò sidek,
okóm bè yó kem tau tedeng kmò le, tennuu yóm kfasang le.”
Currently Selected:
Kem Lingón 75: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
