Kem Lingón 74
74
Lingón Asaf
1Ó Dwata, moen de ke laen dù tul sónen
yóm kekbéem kum?
Moen de ke alì lenbutem yó kem kóm ubiha hótób?
2Hol hentulónem nawa, mi se yó kem tau tehe nélékem là sekna,
kem tau deng nsokem mò hol kóm nfun.
Hentulónem nawa Bulul Sayun, yóm kóm gónó nô dini talak tonok.
3Hnalakem yóm tey gónón gbà yóm syudad yó,
tenngelem yóm alì kegbà kem hohonem yóm Gónóem.
4Deng mom bè yó lemen gónó kem hohonem alì mensag bè yóm kegmò le.
Wen ilô sù le bè yó, ilô yóm deng kegmò le.
5Yóm kmò kegbà le yóm Gónóem,
hol lómón kmò kofok tau yó kem koyu lem dlag.
6Yóm kdê koyu klóónen wen hdanà me du,
gotu genbà le beyung ne bakbak.
7Gotu ntem le yóm Gónóem, deng tódô gotu sulék mlób.
Deng nemeg le yóm kóm Gónô mit yóm kóm boluy.
8Yó hendem le, “Gotu genlà tekuy lu.”
Duhen yó, deng gotu ntem le yóm kdê gónô gónó me gel tmaba ebéléem bè benwu Israél.
9Laen dù ton me mò ilô yóm kehewaem kum.
Laen dù bud tugodem tebel lem blóng me.
Laen dù bélê me temngón du ke kilón kdengen nim glumfak me ni.
10Kegenen de, Dwata, yóm tódô kbayaem kul hemnê kóm yó kem hohonem?
Laen kô dù sónen ne kô yóm tódô kbayaem kul là madat du yóm kóm boluy?
11Moen de ke nafasem yóm henmù kwananem?
Hewaem ne anì genlaem lu.
12Uu se, Dwata, yóm dou Hol Geta lemwót bè kbuten.
Uu se but gónó le gewà yó kem tau talak tonok.
13Lemwót bè kgisem gbekem semkó yóm mohin,
ne gbekem lemuna kem kulu yóm tey utón bong alì lóbô lem mohin.
14Tahu se, deng lenunahem yó kem kulu yóm utón mohin bong boluyen Libyatan,
ne hkenem ungeden bè yó kem ógóf nô bè yóm benwu laen hol wen tauhen.
15Uu se hesfut él ne hlel yó kem él mlel,
ne bud uu se hekti yóm él mlel tehe là ktihen.
16Uu se mò du yóm kdaw ne bulón.
Yóm kdaw ne kifu, kóm funen.
17Uu se deng mò kilil yóm klamang benwu,
nmoem bulónen kinì ne nmoem bulónen tnaw.
18Hendemem dé, Dwata, yóm alì kehnê le kóm yó kem hohonem.
Hono kem tau nungel là madat boluyem.
19Hol béem namà klowil yó kem obunem ebè yó kem ógóf lóbô lem bnes.
Hol béem abay klifót efet kól bé sónen yó kem kóm tau alì hnayam le.
20Hol hentulónem nawa yóm kóm fasad kum bè yóm tehe kesfasad ye yó kem fù me,
yakà dengen tey dê yó kem tau mò sidek bè yó kem gónón kmifu bè klamangen benwu.
21Hol béem abay bayà ke wen gónó le hemyak kul yó kem tau deng hen-gnok.
Mom hyu he ke dóyón le u yó kem tau élél ne yó kem tau laen dù gónó le ma.
22Hekmóni, Dwata, nfihem yóm kóm.
Hentulónem nawa yóm tendo kehnê le kóm smilef kdaw yó kem tau là hemtahu yó.
23Béem tódô bayà yóm kdê mon yó kem hohonem.
Senflósen temnù yóm kegmò le kóm, lel le mom alì hetê.
Currently Selected:
Kem Lingón 74: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
