Kem Lingón 72
72
Lingón Selumun
1Ó Dwata, hol tolokem yóm tau hol
geta anì hol tedeng kogoten kukum.
Hol tolokem du yóm kóm kmò kogot kukum
2anì tedeng kwiten kul yó kem kóm tau,
ne anì tedeng snéen kwiten kul yó kem tau gel hen-gnok le.
3Yó hnihu béléem, Dwata,
anì tilob kógów klowil le yóm kdéen tau knamalen,
ne anì tedeng yóm kukum lem blóng le.
4Yake hol nfihen yó kem tau élél,
ne tnóbóngen yó kem tau laen dù gónó le ma,
anì laen dù gmò le bélê le yó kem tau hemgnok kul.
5Yake bê le tenflok dé, Dwata, tmaba ebéléem yó kem kóm tau
bè yóm tolo kwen dù nóng kdaw ne kwen dù nóng bulón.
Yake yó se bud gel nmò yó kem tau angat semfu gu bélê le.
6Ke tilob kwiten kukum yóm tau hol geta,
hol lómón ke kulón demsù eta yó kem dnadu,
ne lómón ke blanas etalak tonok.
7Klawihen mowil, yake tendo temnù ktedengen yóm kogoten benwu,
ne yake laen dù sónen yóm kehyu klowil yó kem tau knamalen, lómón yóm klaen dù són yóm bulón.
8Yó kem benwu knamalen,
angat lenwóten doli mohin kkólen bè dolin.
Bud lenwóten bè él Yufratis kkólen bè són tonok.
9Angat le gotu mtud bukol bè soluhen
yó kem tau nô bè yóm benwu laen hol wen tauhen.
Angat le gotu lemfen bè soluhen yó kem tau hmohon du.
10Yó kem tau hol geta bè kem Kestilà,
ne yó kem tau hol geta bè yó kem hungul te mohin,
gotu le angat mógów ebéléen na le e benlay basa.
Dalang se yóm tau hol geta bè benwu Syiba ne yóm tau hol geta bè benwu Siba,#72:10 Yóm benwu Syiba ne benwu Siba monen yó, hono benwu kem tau Arab.
gotu le angat mógów ebéléen na le e benlay basa.
11Tódô kdéen tau hol geta bè klamangen benwu,
angat le gotu mtud bukol bè soluhen.
Tódô kdéen tau bè klamangen benwu,
angat gotu mimón du.
12Gotu lenwaen yó kem tau élél gel htóbóng béléen,
yó kem tau laen dù gel kemmón kul.
13Tey kkoduhen yó kem tau lunog
ne yó kem tau laen dù gónó le ma.
Hlowilen yó kem tau élél.
14Lenwaen lu lem tdok
yó kem tau hemgnok kul
ne hemsidek kul.
Tey mebtes béléen yóm kul klowil.
15Dwata he hol htahà klowilen yóm tau hol geta bélê me.
Yake wen blówón lemwót bè benwu Syiba blay le du.
Yake tódô seflós yóm gel kni le béléen bè Dwata yó kem kun tau
anì tendo tnóbóng Dwata.
16Yake hol hmalay dé yóm tonok bè yóm benwu knamalen,
kkólen bè yó kem bulul leneken,
yake tódô tfeng hulu.
Lómón kehyuhen, lómón yóm tonok
gónó le gel mò hulu bè benwu Libanun.
Ne yó kem syudad knamalen, yake tódô hnok tau lemen,
lómón kwen le, lómón yó kem bnes tmowok.
17Yake laen dù kmifót du boluy yóm tau hol geta bélê me,
ne anì laen dù tul sónen yóm któtólen,
lómón yóm klaen dù tul són yóm nóng kdaw.
Yóm kdéen dumu benwu,
yake gotu le mni bè Dwata anì tnóbóngen lu,
lómón yóm gel któbóngen yóm tau hol geta bélê me.
18Hol dóyón tekuy Dwata,
yóm kut Dwata kem tau Israél.
Tek són du gembek mò kul
ni kem hyu hnihu ni koni.
19Hol bê tekuy lensón yóm kdóyón tekuy du,
abay se tey minggel boluyen.
Yake gfan bè klamangen benwu yóm tey klinggelen.
Dwata he hol dmohò du nim ni!
20Ni se sónen yóm kni Dabid bè Dwata, yóm ngà Jisi.
Currently Selected:
Kem Lingón 72: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
