Kem Lingón 71
71
1Són ebéléem, Dwata, gónów e mlo.
Hol béem henyak ou bè là kegmou.
2Lemwót bè yóm tey ktedengem, hol lenwaem ou lem hólól yó kem hohonu.
Hol henklinguhem ou, ne lenwaem ou.
3Hol lómón ke uu yóm botu bong tendo gónóhu e solu mò gónóhu heklung, mò gónóhu hofin.
Géhéli mudél anì gewae, yakà són uu du yóm botu gónóhu heklung ne gónóhu hofin.
4Uu se dou Dwata, hol lenwaem ou lem hólól yó kem tau mò sidek,
lem hólól yó kem tau laen dù tedeng bélê le, kem tau sidek balu le.
5Són uu, Dwata, yóm nefet nawahu.
Són uu yóm tendo snaligu lemwót bè hanà kudiu.
6Lemwót bè ksutu yóm ksaligu kóm.
Kewótu lem blutut yê yóm kesegyokem dou.
Laen dù sónen yóm tendo kdóyónu kóm.
7Yóm dou klowil, lómón ke mò gónó le temngel yóm kdéen tau, abay se uu yóm mbegel mofin dou.
8Yó se gónóhu là semkas du dmóyón kóm,
ne sendawu tmulón du yóm tey keklóónem.
9Ne ni, bè nim deng ktuhahu, béem kó ou.
Béem bayà ou bè nim klaen dù bud kgisu.
10Yakà deng wen udél le etahu yó kem hohonu.
Gotu le stifun, natul hnatay le ou.
11Yó udél le, mon le, “Deng bayà Dwata ne.
Lemwót tekuy kenfô tekuy,
abay se laen dù bud tmóbóng du.”
12Ó Dwata, hol béi hlayuk béléu.
Hetlasik tnóbóngem ou dé.
13Yó kem tau gel tmifù dou yó, hol henyakem lu, hol genlaem lu.
Hyu ke gotu le mulék myak yó kem tau móyô hemsidek dou yó.
14Okóm béléu dou, són uu yóm tendo nefet nawahu mò tmóbóng dou.
Senflósen temnù yóm kdóyónu kóm.
15Tulónu bè kdéen tau hono tedeng yó kem nmoem.
Snilefu kdaw heglalag du yóm nawam lemwà tau,
balù yóm là hol gotu ketngónu du yóm kdê deng gel nmoem béléu.
16Dóyónu yóm tey kegbekem, Dwata
yóm Dwata hol dandónen geta,
Tulónu bè kdéen tau tek són uu yóm tedeng, tek són uu yóm hyu.
17Ó Dwata, lemwót bè hanà kngau yóm ktolokem dou
ne efet ni yóm tendo ktulónu du bè yó kem dumu tau
yóm tey kehyuhen yó kem gel nmoem.
18Balù nim deng ktuhahu, ne denge nubón,
hol béem bayà ou, Dwata, efet deng gotu bud tulónu bè yó kem lugod todol sut yóm tey genbekem,
ne yóm tey hentaw ton gel nmoem bè yó kem tau sut huli dou.
19Yóm tey ktedengem, Dwata, botong gefet ditu bè yóm hol longit geta.
Tey bong hentaw yó kem deng gendengem, Dwata.
Laen kô dù semnged kóm.
20Deng tey kehlayamem dou,
okóm angat bud hlowilem ou.
Hol lómón ke bud hlowilem ou gu lem lebeng.
21Angat tey bud kehegetahem dou,
ne bud henyuhem nawahu.
22Ó Dwata, lemwót bè yóm là konol nawahem ebéléu, dóyónu u hlanu bè yóm gel kenbitu.
Sngalu yóm sngal dmóyón kóm mung bè yóm sotu gel kenbitu.
Uu se yóm Dwata laen dù belenen bè Israél.
23Hligale mensag bè yóm kesngalu dmóyón kóm, yakà deng nsokem dou.
24Snilefu kdaw tendo tmulón du yóm tey ktedeng yó kem gel nmoem,
yakà deng le gotu mulék myak ne slaf yó kem tau tô malu hmatay dou.
Currently Selected:
Kem Lingón 71: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
