Kem Lingón 66
66
Sotu Lingón
1Yu kem tau bè klamangen benwu,
hol ye hligal mensag bè yóm kdóyón ye ke Dwata.
2Sngal ye yóm tey keklóón yóm kun boluy.
Tulón ye bè klamangen benwu yóm tey kun keklóón.
3Mon ye mò ke Dwata, “Tey hentaw me yó kem deng nmoem.
Lemwót yó kem hohonem, gotu le likò bè yóm tey kegbekem.
4Kdéen mowil te tonok, angat le gotu tmaba ebéléem.
Angat sngal le yóm kdóyón le kóm,
sngal le yóm kdóyón le yóm kóm boluy.”
5Géhél ye dé, na ye na tengel yóm deng nmò Dwata.
Wen tey hentaw ton nmoen bè kem kun tau.
6Deng wen lan nmoen hlalak lem Mohin Hulô,
omin le mifal du yó kem kun tau.
Géhél ye dé, hol hnigal tekuy yóm Dwata gembek mò du nim ni.
7Lemwót bè yóm tey kegbeken, laen tul sónen yóm kkamalen yóm klamangen.
Tendo tenngelen yóm gel nmò yó kem tau bè ket benwu.
Béen wen tau tô hguluk matù du.
8Ó kem tau bè klamangen benwu, hol dóyón ye yóm kum Dwata,
hol sngal ye yóm kdóyón ye du.
9Nô lem hólólen yóm klowil tekuy,
ne sen-galaken tekuy anì là tlokob tekuy.
10Deng tnilówem mi, Dwata.
Lómón yóm blówón bukay hlan le bè ofi anì baling hol tahu duhen,
lómón yó se yóm ktilówem kum.
11Deng tehe hnuketem mi,
ne tey blat yóm hbóem kum bè yóm tehe keghesek me.
12Deng hlusem yó kem hohon me anì hol ndà le mi elaan.
Hol lómón ke deng me mlan lem ofi ne lem dunuk.
Okóm deng mom nwitem mi ebè yóm benwu là élélen.
13Ni mógówe ebè yóm kóm Gónô naw e demsù hkekeb ebéléem
mò gónóhu dmohò du yóm deng fasadu kóm.
14Yó se yóm fasad deng gungolem nmou béléem
bè yóm kdaw kwen alì gónóhu glayam.
15Yó se gónóhu demsù yó kem hkekeb ebéléem,
duhen yó kem ubihahu logi alì hyu mò hboohu ebéléem.
Ne bude demsù ebéléem yó kem safì tudu ne yó kem kambing.
16Yu kem tau wen klikò ye ke Dwata,
géhél ye ne, ne hol ye hmungol,
naw e tulón kuy yóm deng nmò Dwata béléu.
17Yakà deng tey kehtóbóngu béléen,
ne hono udél dmóyón du yóm btang bè sumóngu.
18Ke là deng benkasu du yóm salà deng nmou,
là kô hnungol Dwata dou.
19Okóm deng hnungol Dwata ou.
Deng kenmónen yóm knihu béléen.
20Dóyónu Dwata, abay se là kô kenbéen du yóm knihu,
ne là kô kóhen du yóm kbong nawan dou.
Currently Selected:
Kem Lingón 66: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
