Kem Lingón 59
59
Lingón Dabid
1Ó Dwata, lenwaem ou bè yó kem tau gel
hmohon dou.
Hol nofinem ou bè yó kem tau tô hmatay dou.
2Hewaem ou bè yó kem tau gel mò sidek,
bè yó kem tau gel monok.
3Deng wen gónó le hmékét dou.
Kem tau alì lóbô fen mangat dou bè yó,
yakem wen sem salà deng nmou bélê le, Dwata.
4Balù yóm klaen dù salau, deng sana nitung le khatay le dou.
Hetngóni kut, Dwata, ne tnóbóngem ou.
Tenngelem dé yóm tey keglayamu.
5Ó Dwata yóm Dwata laen dù là gbeken du,
yóm Dwata yó kem tau Israél,
hekmóni kut nem e tnafak yó kem tau bè dumu benwu gel mò sidek.
Hol béem abay knodu yó kem tau gel smukat.
6Gel le sut ke kifu, tendo le mngel lómón yóm ohu igoen tendo hgok gu bak lan.
7Hnungol ye dé yóm udél le hemnê ne udél le móló hmatay.
Yóm udél le yó, hol lómón ke sudeng sbalà bak.
Yó hendem le, “Laen kô dù tau gmungol kum.”
8Okóm, Dwata, mom knulihem lu.
Mom knulihem yó kem tau bè yó kem benwu hmohon kum.
9Uu, Dwata, yóm temgel dou.
Nangatu uu mò lemwà dou,
yakà són sem uu, Dwata, gónów gel hofin.
10Lemwót bè yóm là konol yóm kbong nawan dou yóm dou Dwata,
dohò yóm ksuten mò tmóbóng dou.
Htonen dou yóm là kegmò le yó kem hohonu.
11Okóm béem abay hnatay lu, Dwata,
déke mom klifót yó kem dou tau
yóm dnalang le bè yóm nmoem yó.
Mlan bè kgisem hol senklahem lu,
ne hol heglaanem lu, Dwata,
uu se yóm kum gónó heklung.
12Lemwót bè yó kem udél le alì sidek gel btang gu lem bak le,
yó se gónó le gekfô mlan bè yóm alì kehegmón le,
ne bè kehedwata le bak, ne bè alì kmò le kéng.
13Lemwót bè yóm tey kebutem kul, gotu sulék genlaem lu.
Ominen yó he yóm kdéen tau bè klamangen benwu angat temngón du,
Dwata se mogot du yó kem tau Israél.
14Yó kem tau gel hmohon dou, gel le hewà ke kifu,
lómón ke ohu le tendo mngel, hlok lemolò lan.
15Mebel le ken, ne gel le mngel ke là bsow le.
16Okóm dou, Dwata, utómu lingón yóm tey genbekem.
Lemwót bè yóm tey kbong nawam dou,
tódô ketu hlafus hligal mensag.
Abay se són uu gónów e mlo,
gónów henek bè yóm kdawen wen hlayamu.
17Tey kdóyónu kóm, Dwata, uu yóm gel hekgis dou.
Uu se gónów gel e mlo.
Uu se yóm Dwata kembong nawa dou là milihen.
Currently Selected:
Kem Lingón 59: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
