Kem Lingón 41
41
Lingón Dabid
1Ya tey kehligal le kul yó kem tau gel
tmóbóng yó kem tau élél.
Sal gel lenwà Dwata lu bè yóm gónón wen hlayam le.
2Gel nofin Dwata lu ne hlowilen lu.
Tey któbóngen kul bè yóm kmò le nmò ta yóm tonok le,
ne là kô bayaen kul bè yó kem hohon le.
3Gel tnóbóng Dwata lu ke wen des le,
gotu hkóhen yóm des gnóm le.
4Mnihe bè Dwata, monu mò du,
“Ó Dwata, hkoduhe béléem.
Hol hkóhem dou nim desu ni,
yakà denge gemsalà béléem.”
5Okóm yó udél le tendo tmuled dou yó kem hohonu, mon le,
“Kilón katayen anì tódô lana boluyen?”
6Ke nauy le ou, lómón ke wè le ou,
anì monen mò lan le mebel ke wen sidek tulónu.
Bè kulék le, bud gel tulón le bè kdéen tau.
7Tódô kdê yó kem tau kmutó nawa dou,
gotu le sboyong gbak béléu, tey sidek kehedem le dou.
8Yó mon le, “Des mit hatay yóm gnómen.
Là kóen bud gebtik ne bè yóm gónón masà.”
9Balù yó hem hol dou wè, yóm alì snaligu,
yóm tehe gel mken béléu, deng mom hohonen ou.
10Okóm kóm, Dwata, hol knoduhem ou.
Hol hkóhem dou nim desu ni anì bnelesu yó kem hohonu.
11Tngónu se hligali béléu,
abay se là kô hlusem kul ke gemmò le béléu yó kem hohonu.
12Lemwót bè yóm klaen dù sidek nmou,
yó gónóm hlowil dou.
Laen kô dù tul sónen yóm kehnóem do bè soluhem.
13Hol dóyón tekuy Dwata yóm Dwata yó kem tau Israél.
Laen kô dù tul sónen yóm gel kdóyón tekuy du.
Hol tahu se yó.
Currently Selected:
Kem Lingón 41: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
