Kem Lingón 40
40
Lingón Dabid yóm kdóyónen ke Dwata
1Tey khanayu nawahu mangat du
yóm któbóng Dwata dou.
Ominen yó he hmungol dou,
gungolen yóm tey ktabahu ebéléen.
2Ktengen ou lem yóm tey sidek gónóhu gebeng,
lómón ke denge geblos elem yóm helek lebu.
Yó nmoen béléu, lómón ke nkayen ou eta yóm tey botu bong,
ominen yó he mgel kegnómu du.
3Wen lomi lingón toloken dou,
yóm lingón mò dmóyón du.
Angat tey dê tau mton du yóm któbóngen dou.
Bè yóm kton le du, wen dnalang le,
ne angat baling snalig le Dwata.
4Hligal le kul, yó kem tau smalig ke Dwata.
Là kô le smalig ebè yó kem tau heklabak,
duhen ke mung le tmaba bè yó kem dwata kéng.
5Deng tey dê ne yó kem hentaw ton nmoem bélê me, Dwata.
Uu se yóm Dwata gónó me mogot,
laen kô dù semnged kóm.
Deng tey wen kem atul knóón nmoem bélê me,
là kô gbeku msó kul, tey le wen.
6Là kóen gsengel nawahem du, Dwata,
yó kem gel dsù me ebéléem,
ne yó kem dumu gel blay me kóm.
Là kô hnihem du bélê me yó kem ógóf mò hkekeb me ebéléem,
duhen ke yó kem dumu gel dsù mò hkó salà.
Okóm deng wen klingu blayem dou anì hnungolu uu.
7Ne tahu se, gungolu uu, ne yó monu mò kóm,
“Ni ou. Yó kem kóm hlolò dou, hono lemwót lem yóm bok
gónón nô yó kem kóm hlau.
8Tey bong óyóu mò du yóm kóm kóyô, Dwata.
Tendo eles nô bè nawahu yóm gel tolokem dou.”
9Bè yóm gel kestifun le yó kem kóm tau, Dwata,
gel tulónu lem blóng le yóm tulón hyu gbak ebè yóm kehewaem kum.
Tódô tngónem là kô tenfloku du yóm ktulónu du.
10Là kô limengu du yóm tulón hyu gbak ebè yóm kehewaem kum.
Tódô senflósu tmulón du yóm là konol nawahem ebélê me
ne yóm tey któbóngem kum.
Bè yóm gel kestifun le yó kem kóm tau,
balù sulék ke tódóe yem lem blóng le.
Gel tulónu yóm tendo gel kfihem kum,
ne yóm kbong nawahem kum tódô seflós.
11Tngónu, Dwata, là kô lensónem du yóm kkoduhem dou.
Yóm kbong nawahem dou ne yóm kfihem dou,
yó gónón laen dù hemenu.
Lingón Dabid bè yóm knihen tóbóng bè Dwata
12Tey dê yó kem mgel smibut dou,
là kô gbekem msó kul.
Deng gotu gfan ne yó kem salà deng nmou,
ne ni là bud tngónu du kmò kehedemu.
Ke nsóhu yó kem salau,
bong wen senta yó kem dou balu wek.
Yó mò dou, denge mom baling likò.
13Hol lenwaem ou, Dwata, géhél tnóbóngem ou ne.
Yó kem tau móló hmatay dou, hol senbewegem kehedem le
anì laen dù gmò le.
14Yó kem tau hligal lemwót bè yó kem gfau,
hol hensengem lu, hol henyakem lu.
15Yó kem tau gel semdekà dou,
hol hensidekem kegnóm le du sok ton le yóm klaen dù gmò le.
16Okóm yó kem tau tendo gel hloni ebéléem,
yake hol le hligal.
Yó kem tau alì hyu nawa le lemwót bè yóm deng kehewaem kul,
yake hol mon le, “Tey kegbeken yóm Dwata.”
17Yóm béléu dou, Dwata, teye lunog, tauhe élél,
okóm là kô klifótem dou.
Tek són uu yóm lemwà dou,
uu se dou Dwata gónó hemtahu,
géhél tnóbóngem ou ne.
Currently Selected:
Kem Lingón 40: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
