Kem Lingón 42
42
BOK 2
Kem Lingón 42—72
Lingón yó kem sfu Kura#42:1 Nim Lingón 42 ni, lingón yó kem sfu tehe Kura, kem tau alì hulung semngal bè Gónô Dwata bè yóm tehe kun kdaw Dabid. Yóm Kura fù le yó, du se sotu tau tehe alì hulung mò lingón bè yóm tehe kun kdaw Musis ekni. Newen dô tlu latu halay blóngen lenwóten bè Musis kól bè Dabid.
1Tey khebel nawahu kóm, Dwata.
Hol lómón ke yóm uhu mlóy,
alì sidek kleengen mebel él.
2Lómón yó se kebelu kóm, Dwata
yóm Dwata laen dù tul katayen.
Kilón de kógówu ebè Gónóem
anì naw e tmaba ebéléem bè yó?
3Tey tendo kkiku kemdaw ne kifu,
hol lómón ke yó henged kenu.
Lel ni kem hohonu, tendo gel smólók dou,
“Nô se yóm Dwata gónóm hemtahu yó du?”
4Tey sidek kebà nawahu du sok gbel bè nawahu yóm gnan kdaw
bè yóm kmungu bè yó kem tey tau wen mógów ebè Gónô Dwata.
Ou se tehe tukô gna kul yó kem tey tau wen yó.
Tey kligal le, gotu le semngal ne mensag
bè yóm kdóyón le ke Dwata.
5Moen ni du ke alì sidek keblat nawahu?
Moen de ke alì sbeweg kegnómu du?
Dwata he nefet nawahu,
angat wen kdawu bud dmóyón du.
Du se yóm lemwà dou,
ne du se yóm dou Dwata.
6,7Tey sidek kebà nawahu.
Yó gónóm mon, tendo hendemu Dwata.
Yóm tey sidek klóngónu ni,
hol lómón ke munge konul bè yóm tey dunuk.
Ne yó kem tey dê gfau,
hol lómón ke tbó te kuluhu yóm tey él bè hikong
lemwót gu bè yó kem bulul Hérmun ne bulul Misar.
Ya tey lungkulen mool él Jurdan.
8Tódô ket kdaw Dwata hegfan du béléu yóm kbong nawan dou là monolen.
Ket kifuhu semngal du yóm kun sngal,
mung bè yóm knihu béléen, yóm Dwata hlowil dou.
9Dwata se gónóhu hofin. Yó monu mò du,
“Moen de ke deng klifótem ou?
Moen ni du ke tódô seflós yóm keglayamu
lemwót bè yóm tey sidek nmò le béléu yó kem hohonu?”
10Tey sidek kegnómu du bè yóm kehnê le dou.
Sónmò le mon du mò dou,
“Nô se yóm Dwata gónóm hemtahu yó du?”
11Moen ni du ke alì sidek keblat nawahu?
Moen de ke alì sbeweg kegnómu du?
Dwata he nefet nawahu,
angat wen kdawu bud dmóyón du.
Du se yóm lemwà dou, ne du se yóm dou Dwata.
Currently Selected:
Kem Lingón 42: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
