Kem Lingón 37
37
Lingón Dabid bè yó kem tau gel mò sidek ne yóm hyu
1Béem kenteng mata yó kem tau gel mò
sidek,
ne béem nófô yó kem tonem bélê le.
2Là kóen tahà klowil le yó kem tau yó.
Mkél le bè bnes, mahil le menes.
Lómón kenes le yóm hulu laen dù élen,
hlós le matay.
3Holi smalig bè Dwata dé, ne nmoem yóm hyu.
Tódói henek ta yóm tonok blay Dwata kóm,
ne laen kô sembeweg kóm bè yó.
4Ke hnebelem yóm kligalem, bè Dwata dé gónóm e mebel du,
ne blayen kóm yóm hendeen nawam.
5Hogotem ke Dwata klowilem.
Holi smalig béléen, ne tnóbóngen u.
6Ke tedeng yóm gel nmoem, hegfan Dwata bè kdéen tau.
Hol lómón kehegfanen du, lómón ke nóng kdaw deng gtungó.
7Hol hanayem nawam mangat du yóm któbóng Dwata kóm, béi htakas.
Béem kenteng mata yó kem tau deng hyu kul kógów klowil,
duhen ke yó kem tau deng wen gónón e baling
yó kem sidek gel natul le.
8Bê te hegmung bè ktafa nawa,
ne bê te hegmung bè lebut.
Olohen mit kut elem sidek yó kem yó.
9Yó kem tau smalig ke Dwata,
angat le gemfun bè yóm tonok tehe fasad Dwata kul.
Okóm yó kem tau mò sidek, angat hdó le lu.
10Móyón le lana lem benwu yó kem tau mò sidek.
Anien ke tô hnebelem lu,
là kô bud tonem kul ne.
11Okóm yó kem tau heglaan le knô le,
gfun le yóm tonok tehe fasad Dwata kul,
ne tilob kógów klowil le, ne tendo menek kbenwu le.
12Yó kem tau gel mò sidek, gel natul le ktondo le
yó kem tau hyu kmò le, lel le kmutó nawa kul.
13Okóm mom knuli Dwata lu, yó kem tau gel mò sidek,
abay se tngónen móyón le meglà.
14Yó kem tau sidek nmò le,
dmilot le sudeng,
ne bemtul le boho,
tô hnatay le yó kem tau élél,
ne yó kem tau tedeng kmò le.
15Okóm mom bud kul sudeng tles hmatay kul
yó kem tau mò sidek yó.
Yó kem boho le, gotu tfok.
16Mom hyu he yóm tau hyu kmoen ne tek udì kimuhen
senta yóm tau mò sidek ne tey bong kimuhen.
17Abay se angat kó Dwata bélê le yóm kgis le mebel klowil yó kem tau gel mò sidek.
Okóm yó kem tau hyu kmò le, tendo nofin Dwata lu.
18Tendo sen-gifà Dwata yó kem tau mimón du,
ne laen kô dù sónen kfun le du yóm tonok tehe fasaden kul.
19Laen kô gónó le glayam bè klowil le anien ke sidek benwu.
Ne anien ke mbel tey bitil bong,
sal gel wen gónó le ma.
20Okóm yó kem tau mò sidek,
là kóen tahà klowil le.
Móyón le lana yó kem tau gel hmohon ke Dwata.
Lómón klowil bulók lem bnes,
ne lómón kebel ofi,
là kóen legen ktonem kul.
21Ke gel le mutóng yó kem tau gel mò sidek,
là kô bud bnayad le du.
Okóm yó kem tau hyu kmò le,
tey mahil bélê le bemlay.
22Yó kem tau tnóbóng Dwata,
gotu gfun le yóm tonok tehe fasaden kul.
Okóm yó kem tau tnuleden,
tódô hdó le lu ta yóm tonok yó.
23Yó kem tau gel hefligal ke Dwata,
tey tendo gel kesgalak Dwata lan le,
ne sal gel nofinen lu.
24Baluen ke tlokob le, là kô le masà, abay se deng eles nogoten lu.
25Ni denge tey tuha ne, deng tey tahà klowilu.
Là kô deng wen tonu he ke tódô bayà Dwata yóm tau hyu kmoen,
duhen ke gel heslaf mni ken bè kem tau yó kem ngaen.
26Yóm tau hyu kmoen yó,
tey mahil béléen bemlay,
ne là mgel mutóng béléen.
Ne yó kem ngaen,
tey le hulung tmóbóng se kul.
27Hol knogolem yóm sidek, tles nmoem yóm hyu.
Ke ni se nmoem, angat le henek menwu bè yóm tonok tehe fasad Dwata kuy yó kem semfu gu béléem.
28Yakà tey hyu nawa Dwata du yóm tedeng.
Là kô bayaen kul yó kem tau teneb béléen
ne laen dù sónen yóm tendo kofinen kul.
Okóm yóm kul lugod yó kem tau gel mò sidek,
angat hdó le lu ta yóm tonok yó.
29Yó tles mfun du, yó kem tau tedeng kmò le,
ne laen dù sónen yóm knô le tahen.
30Yóm tau hyu kmoen, dilô bè kudélen yóm khulungen hedem,
ne laen dù mtukul nfihen.
31Tendo suen lem hendemen yóm hlau Dwata,
là kô knogolen du.
32Yóm tau sidek nmoen, gel mebel lanen tô hmatay yóm tau tedeng.
33Okóm là kô tódô bayà Dwata du bè hohonen
yóm tau tedeng yó.
Anien ke niten skukum,
laen kô lanen heblosok du.
34Dwata dé nefet nawahem,
ne nimónem yóm kdê hlauhen.
Ke yó se nmoem, angat tey kadaten kóm Dwata
mlan bè keblayen du kóm yóm tonok mò gónóm nô.
Angat tonem yóm kehdóhen kul bè yóm tonok yó,
yó kem tau gel mò sidek.
35Wen tehe tau sidek nmoen tngónu, alì sidek klóbóen.
Alì hegetahen knóen bè kdéen tau.
Lómón kehegetahen knóen,
lómón kegeta yóm koyu sidar tmowok bè Libanun.
36Okóm sotu kdaw, miwese bè yóm tehe gónón nô yóm tau yó,
là kô bud tonu du bè yó.
Benkól tô nebelu, là kô tonu du.
37Okóm hol hennagiem yóm tau hyu kmoen,
yóm tau tedeng kmoen, yóm tau menek kehedemen.
Tey wen semfu gu béléen.
38Okóm yó kem tau mò sidek, gotu le meglà.
Senged se yó kem angat lugod le, meglà le se kul.
39Tólóng kul yó kem tau hyu kmò le,
sal gel lenwà Dwata lu.
Gel kenlungen lu ke gel wen gfà msut.
40Sal gel tnóbóngen lu, ne hewaen lu lem tdok yó kem tau gel mò sidek.
Yó gónón mò du bélê le yóm yó,
abay se gel le heklung béléen.
Currently Selected:
Kem Lingón 37: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
