Kem Lingón 38
38
Lingón Dabid
1Ó Dwata, béem nudél ou bè kebutem.
Béem tnafak ou bè yóm alì khéet yóm kebutem.
2Deng tey nelem gónón tódô béléu yó kem hanakem,
ne kóm tdok se yóm deng smuntuk dou.
3Lemwót bè kebutem dou gónón wen desu.
Deng lengok lem tiolu lemwót bè yó kem salau.
4Denge kmifus lem salà,
ne là bud gbeku mbô du yóm alì ksidek keblaten.
5Lemwót bè yó kem ungel nmou,
yó kem haliu hennolì le lembét ne bolok.
6Deng tódô sónmou hkogò bè alì kdesen.
Tódô ket kdawu tendo lóngón.
7Deng gnómu yóm tey kinì là lembó,
laen kô dù bud gelu.
8Tódóe mungoy, lómón ke denge muna.
Botonge dmolong bè alì ksidek kegnómu du.
9Tngónem se, Dwata, yóm alì hendeenu.
Deng gotu gungolem se yóm kdê dnolongu.
10Lómón uni mdek lem kfuhu, laen kô dù bud kgisu,
deng lemobun ketngelu.
11Kem weu ne yó kem dumuhu, gotu le hlayuk béléu,
kenhisik le yóm desu.
Balù yó hem hol dou fes lówó, sana kehlayuk le béléu.
12Yó kem tau tô malu hmatay dou, deng wen holot nmò le mò alu le dou,
kem tau deng eles natul le yóm keglau.
Tódô snilef le kdaw matul du yóm angat ksukat le dou.
13Okóm lómón ke tauhe bokong, là kô hnungolu du yó kem ifis le dou.
Lómón ke umewe, là mudéle.
14Lómón ke ou yóm tau bokong ne tau umew,
là gbeku malà kul.
15Uu se yóm dou nangat, Dwata.
Uu se malà kul, yakà uu du yóm sana Dwata hol dou gónó mogot.
16Ni se deng hnihu béléem, deng monu mò kóm,
“Hol béi abay móyô ke hligal yó kem hohonu bè yóm kwen desu,
ne ke heklabak le bè yóm gfau.”
17Móyóne matay, senflósu gemnóm du yóm ketduken.
18Okóm gel benkasu yó kem salau,
ne tey kegselu bè yó kem sidek deng nmou.
19Tey le wen yó kem hohonu.
Tey kutó nawa le dou igoen laen dù salà nmou bélê le.
20Gel bnalà le sidek yó kem hyu deng nmou bélê le,
ne tey khohon le dou, abay se ndau yóm tedeng.
21Hol béem bayà ou, Dwata.
Béi hlayuk béléu, Dwata.
22Hol hetlasik tnóbóngem ou, Dwata,
uu se yóm gel lemwà dou.
Currently Selected:
Kem Lingón 38: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
