Kem Lingón 36
36
Lingón Dabid
1Yóm salà, gel senboyongen yó
kem tau gel mò sidek,
senboyongen lem hendem le.
Là kô knikò le ke Dwata, yó gónón laen dù hemseng kul mò sidek.
2Lemwót bè yóm alì kehegmón le,
gónó le là mton du yóm tey ksidek yóm gel nmò le.
3Kdê yó kem mon le, hono sigol ne sukat.
Mom kenbê le yóm khulung hedem,
kenbê le mò du yóm hyu.
4Là kô le gtungô ke kifu, són natul le yóm sidek bud nmò le.
Laen kô dù hyu du yóm gel nmò le.
Là kô knogol le du yóm sidek.
5Yóm kóm kbong nawa là monolen, Dwata, botong kbongen longit.
Yóm tey ktenebem bélê me, botong gefet sentu lobun.
6Yóm kóm ktedeng, hol lómón kbegelen yó kem bulul lembang.
Yóm kukum tedeng nwitem, hol lómón kngelemen mohin.
Tey gel kesgifaem kul, Dwata,
yóm kdéen tau kkólen bè yóm kdéen ógóf.
7Tey mebtes béléu, Dwata, yóm kbong nawam dou là monolen.
Yóm kdéen tau te tonok, sal laan hafakem gónó le e mlo.
8Tendo henkenem lu lemwót bè yóm tey ken deng eles nô bè gónóem.
Ne gel hinumem kul yó kem kóm él mlel alì hyu bélê le.
9Uu se gónón tembul yóm kdéen mowil.
Lemwót bè layagem, Dwata, gónó me lemwót mton.
10Hol senflósem kembong nawa kul yó kem tau kembong nawa kóm.
Hol hentedengem kmukum kul yó kem tau tedeng kmò le.
11Hol béem abay lus lu yó kem tau hegmón ke nundug le ou,
duhen ke lò le ou yó kem tau gel mò sidek.
12Tenngelem dé. Deng le gotu masà.
Deng le gotu masà, là kô le bud gebtik.
Currently Selected:
Kem Lingón 36: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
