Kem Lingón 34
34
Lingón Dabid bè yóm tey któbóng Dwata du
1Là kô senkóhu du yóm tendo gel
keslamatu bè Dwata.
Là kô tenfloku du yóm kdóyónu du.
2Tendo gel dóyónu yóm deng gendengen béléu.
Yu kem tau hen-gnok, hol hnungol ye ou anì wen kligal ye.
3Gbót ye béléu tmulón du yóm tey kegeta Dwata.
Hol dóyón tekuy dé boluyen.
4Bè yóm tehe knihu bè Dwata, bnalaen ou se.
Gotu kóhen béléu yóm kdê gel knikou.
5Gel le htóbóng béléen yó kem tau hen-gnok,
ne tey kehyu nawa le bè yóm któbóngen kul.
Laen kô dù gónón sidek nawa le béléen.
6Gel le mni tóbóng béléen yó kem tau laen dù tmóbóng kul,
ne bnalaen lu.
Hewaen lu gu lem yóm kdê gónó le glayam.
7Wen hógów Dwata gu bè longit gel mentey yó kem tau wen klikò le du,
ne lenwaen lu bè yó kem gónón wen gfà le.
8Tilów nimónem Dwata dé anì gnómem yóm tey kehyuhen.
Bong kligal le kul yó kem tau gel hofin béléen.
9Yake wen klikò tekuy ke Dwata yóm kdê tekuy kem kun tau.
Yó kem tau mimón du, laen kô dù gónó le élél bè klowil le.
10Balù yó kem liyun, sal wen kdaw le gel bitil.
Okóm yó kem tau mimón ke Dwata,
laen kô gónó le élél bè yó kem hyu bélê le.
11Ó kem weu lomi lemnok, hol hnungol ye ou.
Wen toloku kuy anì wen klikò ye ke Dwata.
12Móyô ye kô ke gsengel nawa ye du yóm klowil ye?
Móyô ye kô ke tahà klowil ye ne ke wen kligal ye?
13Ke yó se sen-galu nawa ye, hol béen sidek kebkó ye,
ne bê ye abay tmulón kéng.
14Knogol ye yóm sidek, ne nmò ye yóm hyu.
Hol tilów ye són gel ye mit kenek nawa bè kem dumu ye.
15Tendo gel knudung Dwata yó kem tau tedeng kmò le.
Gel hnungolen yóm ktaba le ebéléen.
16Okóm tey kenbéen yó kem tau sidek nmò le.
Ke matay yó kem tau yó, laen kô dù bud hemtulón nawa kul.
17Bong yó kem tau tedeng kmò le,
gel le tmaba ebè Dwata, ne gel hnungolen lu.
Lenwaen lu gu lem yóm kdê gónó le glayam.
18Tey moni bélê le Dwata yó kem tau wen gónón sidek kegnóm le du.
Gel lenwaen yó kem tau laen dù bud nefet nawa le.
19Sal gel wen gónón glayam yóm tau hyu kmoen,
okóm sal gel lenwà Dwata gu lemen.
20Tendo bnentey Dwata anì laen dù hemenen,
balù sotu tiolen ke tfok.
21Yóm sidek gel nmò tau, yó se bud hatayen.
Yó kem tau kmutó nawa yó kem tau tedeng nmò le,
angat tnafak Dwata lu.
22Tendo gel lenwà Dwata yó kem kun tau.
Yó kem tau gel hofin béléen,
hnifóten yó kem salà le.
Currently Selected:
Kem Lingón 34: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
