Kem Lingón 33
33
1Yó kem tau tedeng kmò ye, hol ye hligal
mensag bè Dwata,
yakà teyen knóón bélê ye dmóyón du.
Yu kem tau gel mimón ke Dwata,
hol dóyón ye se kuy.
2Hol ye slamat bè Dwata mlan bè yóm gel kenbit ye.
Hol ye semngal ebéléen,
hmung ye bè yó kem dumu bud gel kenbit ye.
3Mò ye yóm lomi sngal mò sngal ye ebéléen.
Hol hninggel ye hemglung ebéléen,
ne hol ye hligal mensag.
4Hono tahu yóm udél Dwata.
Ne yó kem nmoen, hono gsalig.
5Tey hyu nawa Dwata du yóm nmò tedeng.
Là kóen monol yóm kbong nawahen tau,
tódô lengeben klamang benwu yóm nawahen yó.
6Yóm tehe kedlimun Dwata yó kem longit seglafin,
tódô lemwót bè udélen.
Bud lemwót bè udélen snéen yóm tehe kedlimunen yóm kdaw ne bulón ne yó kem blotik.
7Ne yóm tey él mohin, deng gotu sentnuen,
ne tey nelem gónón hemsù kul.
8Yóm kdéen tau bè klamangen benwu, hol knikò ye Dwata.
Ne tódô kdéen tau hol madat ke Dwata.
9Abay se tek bè olo udélen,
tódô gónón baling yóm benwu.
Bud bè udélen snéen,
tódô gónón baling yóm kdéen ton tahen.
10Yóm dê atul yó kem tau mogot benwu talak tonok,
gbek henseng Dwata.
Hensengen sok là hyuhen anì là gfuhen.
11Okóm yó kem kun gel atul Dwata,
laen kô dù sónen.
Ne laen kô dù sónen snéen yóm gel nmoen.
12Ya tey kehligal yó kem tau bè kihu benwu ke Dwata hol kul gónó mogot.
Hligal le se kul yó kem tau nélék Dwata mò kun tau.
13Yó nmò Dwata, temngel gu ta bè longit ebè kdéen tau te tonok.
14Lemwót bè yóm gónón myón kmamal,
temngel elaan ebè kdéen tau nô talak tonok.
15Benlayen lu khulung hedem,
ne tódô tngónen se yóm kdê gel nmò le.
16Là kô yó du gónón gemmò bè gida yóm tau hol geta mogot benwu
ke mlan bè kgis yó kem sendaluen.
Senged se yóm sendalù,
là lemwóten bè kun kgis gónón gemmò se kun.
17Là kô yó du gónó le gemmò
ke bè yó kem kudà nit le sgida.
Balù yóm tey kekgis le, là kô le gewà du.
18Yóm Dwata, tendo bnenteyen yó kem tau wen klikò le du,
yó kem tau gléd nawa le bè yóm là konolen yóm kbong nawahen kul.
19Hensengen ebélê le yóm hatay.
Baluen ke mbel bitil bong, sal hlowilen lu.
20Tek són Dwata yóm hol nefet nawa tekuy.
Són du gónó tekuy gel heklung ne gónó tekuy gel htóbóng.
21Tey hyu nawa tekuy,
abay se wen yóm kut Dwata.
Hol snalig tekuy abay se yóm Dwata laen kô dù belenen.
22Ó Dwata, hol béem abay nmò sónen yóm kbong nawahem kum.
Sónen uu se yóm nefet nawa me.
Currently Selected:
Kem Lingón 33: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
