Kem Lingón 29
29
Lingón Dabid
1Yu kem hógów Dwata nô bè longit,
hol dóyón ye Dwata.
Hol dóyón ye yóm tey kegetahen ne yóm tey kekgisen.
2Hol dóyón ye yóm tey kegetahen yóm kun boluy Dwata.
Dóyón ye Dwata bè yóm tey keklóónen bè yóm klaen dù belenen.
3Yóm kudél Dwata, gungolem gu ta mohin.
Ne heték yóm Dwata alì geta.
Yóm udélen lemungkul gu ta yóm tey lewók mohin.
4Tey mfasang yóm kudél Dwata,
yóm kudél yóm Dwata alì geta.
5Gbeken temfok yó kem koyu sidar alì mtétél,
tenfoken yó kem koyu sidar bè Libanun.
6Gbek Dwata hefkak kul yó kem bulul bè Libanun,
lómón kehkak le ngà safì.
Ne yóm kehetoen Bulul Hérmun,
hol lómón kehetò yóm ngà safì logi.
7Yóm kudél Dwata, hol lómón ke kemfô leték.
8Ne gbeken hlinol yóm benwu là hyu menwu du.
Gbek Dwata hsinsig du yóm benwu là hyu menwu du bè benwu Kadis.
9Yóm kudél Dwata, gbeken hkingò yó kem koyu ok,
ne gbeken htosok yó kem doun koyu lem dlag.
Bè yó bè Gónóen, gotu le mensag yóm kdê le, mon le,
“Tey kegeta yóm Dwata.”
10Dwata se mogot kul yó kem él dmunuk.
Ne laen kô dù tul sónen yóm hol kegetahen.
11Dwata se bemlay kul kgis yó kem tauhen.
Du se bemlay kul kenek nawa.
Currently Selected:
Kem Lingón 29: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
