Kem Lingón 21
21
Lingón Dabid
1Ó Dwata, tey kehligalen yóm tau
hol geta lemwót bè yóm kóm kgis.
Tey kehligalen mensag lemwót bè yóm kehegmoem du.
2Deng blayem du yóm kun kóyô.
Deng gotu bnalaem yóm hnihen.
3Deng hnódóhem bè yóm kuléken, mung du yóm tey tóbóng,
ne wen kuruna nmò le bè tahu blówón suubem bè kuluhen.
4Deng mni béléem anì hlowilem,
ne tahu se, bnalaem yóm hnihen yó.
Laen kô dù tul sónen yóm keblayem du klowil.
5Deng tey kegetahen lemwót bè yóm kehegmoem du.
Lemwót béléem yóm tey keklóónen ne yóm tey kegetahen.
6Laen kô dù sónen yóm któbóngem du.
Tey kehefligalem du lemwót bè yóm kmungem béléen.
7Yakà són Dwata snalig yóm tau hol geta.
Lemwót bè yóm là konolen yóm kbong nawa Dwata du
yóm Dwata hol Dandónen Geta,
yó gónón là tlokob yóm tau hol geta.
8Ó Dwata, angat gotu kenfóem yóm kdê hohonem.
Yóm alì kekgis sigel kwananem gónóm gemkfô kul yó kem tau kmutó nawa kóm.
9Bè yóm ksutem na a gemlà kul, lómón kmoem kul yóm tey ofi bong.
Gotu kenem lu lemwót bè alì kebutem kul.
10Angat gotu genlaem yó kem ngà le dini talak tonok,
ne laen kô dù bud semfu gu bélê le.
11Baluen ke wen sidek atul le etahem,
laen kô gónón e kól yóm atul le yó.
12Abay se bè yóm kton le du yóm kehdoem du ebélê le yóm kebtulem bohohem, tódô le gotu mlóy.
13Tey kdóyón me kóm, Dwata, bè yóm tey kekgisem.
Sngal me ne dóyón me yóm tey kfasangem.
Currently Selected:
Kem Lingón 21: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
