Kem Lingón 20
20
Kni Dabid bè Dwata anì gemmò yóm hol geta mogot kul
1Dwata he malà kóm bè yó kem
hnihem béléen
ke wen gfà sut béléem.
Yó hem Dwata tehe gónó Jakub hemtahu
tendo gel mofin kóm.
2Du he hol hemwit kóm tóbóng gu ditu bè Gónóen
bè kun benwu bè Bulul Sayun.
3Hol henmóyô Dwata he yó kem blayem du,
ne hol hligal du he yó kem gel dsuem ebéléen.
4Hol blayen kóm he yóm sen-galu nawahem,
ne hol hbalingen yóm kdê deng atulem.
5Ke yó nmò Dwata béléem, ngem kà gotu me hligal mensag.
Hnigal me yóm kegmoem, hlan me bè kdóyón me ke Dwata.
Dwata he malà du yóm kdê gel hnihem béléen.
6Yóm tau hol geta deng nélék Dwata,
tngónu sal gel hegmoen bè yó kem hohonen.
Ditu bè kun benwu bè longit
gónón lemwót tmóbóng du.
Lemwót bè kun kfasang Dwata
gónón gemmò bè yó kem hohonen.
7Yó kem dumu tau, tey ksalig le bè yó kem klitun gel nit le sgida ne bè yó kem kudà le.
Okóm kum, tódô snalig me yóm kfasang Dwata
yóm kum Dwata gónó mogot.
8Yó kem tau yó koni, angat le mom tlokob du ne masà du yóm tô snalig le.
Okóm kum, là kô me na a masà, mbegel kdà me.
9Ó Dwata, hol hegmoem yóm tau hol geta bélê me.
Bnalaem yóm gel ktaba me ebéléem.
Currently Selected:
Kem Lingón 20: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
