Kem Lingón 141
141
Lingón Dabid
1Ó Dwata, tmabahe
ebéléem. Géhéli dou.
Hol hnungolem yóm kehtóbóngu béléem.
2Henmóyóem yóm knihu,
mò henged boo tilob ntemu ebéléem.
Ne yóm kehdau sigelu eta,
mò henged dsuu ebéléem ke kimel.
3Hol bnenteyem kmò kudélu, Dwata,
ne nafasem do ksumóngu.
4Hol kóhem yóm óyóu mò sidek,
béem hlus o mung bè yó kem tau gel mò sidek,
ne béem hlus o mung mken bélê le.
5Mom hyu he ke yó dmofì do yóm tau tedeng kmoen.
Wen gónón hyu béléu se yó.
Ke wen bnólów le béléu,
hol lómón ke henged bulung bè lówóhu.
Hol tnóbóngem o anì là gekbéu du.
Okóm sónmou gel mni du bè Dwata
anì hensengen yóm sidek gel nmò le,
ne anì hensengen se yó kem tau mò du.
6Ke deng bot le elem kbu yó kem tau malak kul,
yó he khungol le do yó kem tau gel mung kul,
ne hentahu le yóm monu.
7Lómón yóm tau dmadu,
gotu gomong senwóten yó kem botu, ne gotu bulét,
lómón se yó kbulét tiol yó kem tau gel mò sidek,
laen dù mdengen lembeng kul.
8Htóbónge béléem, Dwata yóm Dwata hol dandónen geta.
Uu se yóm dou gónó e mlo.
Hol nofinem ou anì là ghatay le do.
9Hensengem béléu yó kem gónó le hebkó do yó kem tau gel mò sidek,
dalang se yó kem gel holot le do.
10Bud lu he tles bkó du yó kem holot le yó,
okóm fen hefewaem ou do.
Currently Selected:
Kem Lingón 141: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
