Kem Lingón 140
140
Lingón Dabid
1Ó Dwata, hol lenwaem o bè yó kem tau gel mò sidek.
Nofinem o bè yó kem tau alì lóbô,
2yó kem tau sónmò le matul mò sidek lem hendem le,
ne lenulus le kdaw tendo mò sidek.
3Tey des yóm udél gel btang bè sumóng le,
hol lómón ékét ulal,
ne tey des kudél le,
hol lómón alas sedof.
4Ó Dwata, tnóbóngem o anì là nóe lem hólól yó kem tau gel mò sidek.
Kenlungem o bè yó kem tau alì lobô, yakà nifis le o.
5Yó kem tau heklabak, wen holot nmò le mò alu le do.
Deng nból le huket le,
ne deng tey wen holot nmò le bè lan.
6Yó monu mò ke Dwata, “Uu se yóm dou Dwata.”
Hol hnungolem, Dwata, yóm kehkoduhu béléem.
7Ó Dwata yóm hol dandónen geta, yóm alì kemgis lemwà do,
deng gel kenlungem o bè yóm kdawen wen gida.
8Hol béem bayà ou bè yó kem tau gel wen óyô le mò sidek.
Hensengem, Dwata, anì là gfuhen yó kem sidek atul le.
9Hol tles heglaem yó kem hohonu
bè yóm sidek deng atul le etahu.
10Hol hebtangem eta kulu le yo kem bala ofi kemyóngón,
duhen ke tódô tudaem lu elem ofi,
duhen ke elem sol leyong ani là bud le gewà.
11Hol béem abay hdengen lu yó kem tau mò kéng bè nim benwu me.
Hol wen he hlayam hgefetem bélê le yó kem tau alì lóbô.
12Okóm tngónu angat dohò tnóbóng Dwata yó kem tau alì hensidek le,
angat nfihen yó kem tau élél.
13Hol tahu dóyón le boluyem yó kem tau tedeng kmò le,
abay se béléem gónó le nô.
Currently Selected:
Kem Lingón 140: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
