Kem Lingón 139
139
Lingón Dabid
1Ó Dwata, deng gotu henklolem
ne yóm dou kmò, laen kô dù là tngónem du béléu.
2Deng gotu tngónem yóm kdê nmou,
ne yó kem angat hendemu, deng eles tngónem.
3Tendo tonem o. Baluen ke moe nmò duhen ke hegnóe,
gotu tngónem yóm kmò kekdolu.
4Balù yóm gu laanu là deng mudél,
eles tngónem yóm angat monu.
5Tendo gel lenibutem o.
Tendo gel nofinem o mlan bè kfasangem.
6Tey ketngahu du yóm ketngónem do,
là kô gbeku hmingón du.
7Là kô gbeku hembnos du yóm Tulusem
ne là se gbeku hemlóy kóm.
8Ke mógówe ebè longit, elesi sem nô bè yó.
Ke mógówe ebè benwu yó kem tau matay,
bud bè yó gónóm nô.
9Ke yó dum gbeku móyóng esentu dmata kdaw,
duhen ke nóe bè yóm benwu nô esentu desdef,
10kaem elesi nô bè yó mò malak do ne mò tmóbóng do.
11Anien ke gbeku mudél ebè yóm kifu anì bnosen o,
duhen ke gbeku mudél ebè yóm layag anì tódô baling kifu,
12okóm béléem kóm, Dwata, baluen ke kifu là kô gbeku hembnos kóm.
Yóm kifu, lómón ktataw layagen kemdaw yóm béléem.
Tódô senged ktonem du kóm yóm layag ne yóm kifu.
13Yóm kdê nô bè lówóhu ni,
deng gotu nmoem béléu yóm tolo knóu lem blutut yê.
14Tey kdóyónu kóm, Dwata, tey minggel yóm kdê nô bè lówóhu.
Tey bong hentaw yóm kdê deng nmoem béléu.
Deng hol tngónu se dou yóm ni.
15Bè yóm tehe kenoku lem blutut yê bè gónón kmifu tek sotuhu deng sana tonem ou.
16Deng eles tonem ou ne gu laanu là deng sut.
Ne gu laanu là deng sut he, deng eles snulatem bè bokem yó kem deng oluhem etahu
lemwót bè yóm kdaw ksutu efet kól bè yóm buteng angat katayu.
17Ó Dwata, tey bong muhen béléu yóm kdê kehedemem,
là kô gbeku msó kul.
18Lómón kwen le helek.
Ke btike hlafus, sana tódô knóem béléu.
19Ó Dwata, hendéméu dé ke gotu hnatayem lu yó kem tau mò sidek.
Hendéméu ke tódô bayà le o yó kem tau mit klóbô.
20Sidek udél le gbak ebéléem.
Sidek kebkó le ebè boluyem.
21Tey sidek kutó nawahu kul, Dwata, yó kem tau kmutó nawa kóm.
Tey sidek kekbéu kul yó kem tau gel mulé kóm.
22Alì sidek kutó nawahu kul, gotu hohonu lu yó kem tau yó.
23Hol henklolem o, Dwata, hol tenngelem yóm nô lem nawahu.
Hol tilówem o anì tngónem yóm nô lem hendemu.
24Nénégem ke wen sidek tonem béléu,
ne hol sen-galakem o lemolò du yóm lan hlós ebè yóm klowil laen dù tul sónen.
Currently Selected:
Kem Lingón 139: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
