Kem Lingón 115
115
1Olon uu, Dwata, olon uu
yóm knóón hol sendóyón, là yóm kum.
Yó gónó me hol dmóyón kóm lemwót bè yóm klaen dù sónen yóm là konolen yóm kbong nawahem kum,
ne yóm ktenebem bélê me.
2Moen de ke gel snólók le mi yó kem tau bè dumu benwu hmilol, gel mon le,
“Gónón nô se kuy Dwata du?”
3Yó balà me kul, nô bè longit yóm kum Dwata,
gbeken mò du kihu nóyô nmoen.
4Okóm yó kem kul dwata yó kem tau smólók yó,
hono dwata lenbù nmò le lemwót bè tahu blówón ne bè blówón bukay nmò tdok tau.
5Igoen wen sumóng le, là mudél le.
Wen mata le, là kô le mton.
6Igoen wen klingu le, là kô le mungol.
Wen ilung le, là kô le gmungef.
7Igoen se wen tdok le, là kô le gmogot.
Wen ti le, là kô le gógów.
Là kô gbek le du mudél.
8Yó kem tau gel mò dwata lennged yó, ne smalig bélê le,
mkél le bè yó kem dwata lenbù nmò le.
9Yu kem tau Israél, hol ye smalig bè Dwata.
Gbeken tmóbóng kuy, ne gbeken mofin kuy.
10Yu kem gel demsù ebè Dwata sfu Aron, hol ye smalig bè Dwata se kuy.
Gbeken tmóbóng kuy, ne gbeken mofin kuy.
11Yu kem tau wen klikò le ke Dwata, hol snalig ye Dwata.
Gbeken tmóbóng kuy, ne gbeken mofin kuy.
12Là kô klifóten tekuy, ne angat tnóbóngen tekuy.
Angat tnóbóngen yó kem tau Israél,
ne yó kem sfu Aron, duhen yó kem tau gel demsù ebè Dwata.
13Angat gotu tnóbóngen kdéen tau wen klikò le du,
lenwóten bè yó kem tau hol geta
kkólen bè yó kem tau glaan.
14Dwata he hol hból lówó ye.
Dalang se yó kem semfu gu bélê ye,
15Dwata he hol tmóbóng kuy.
Yóm Dwata tehe mò longit ne tonok.
16Yóm longit, ke Dwata funen,
okóm yóm tonok, fen blayen bè tau.
17Là gbek le dmóyón ke Dwata kul yó kem tau deng matay,
yó kem tau deng kól bè benwu yó kem tau deng matay.
18Okóm tekuy kem tau tolo mowil, hol dóyón tekuy Dwata.
Ne bê tekuy lensón yóm kdóyón tekuy du.
Hol dóyón tekuy Dwata.
Currently Selected:
Kem Lingón 115: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
