Kem Lingón 116
116
1Tey bong nawaw ke Dwata
abay se gel hnungolen o.
Sal gel hnungolen ke wen hnihu béléen.
2Lemwót bè yóm gel khungolen dou yó
yó gónóm mon, yóm igou tolo mowil
tendohe tmaba ebéléen.
3Deng tódô lenibuten ou ne yóm hatay.
Tey sidek klikou du yóm deng klonihen béléu.
Là gbeku hmingón du yóm alì klikou ne ktafa nawahu.
4Ominu yó tmaba ebè Dwata, yó monu,
“Ó Dwata, hkoduhe béléem, hol lenwaem ou.”
5Tey kmodu yóm gónó tekuy mogot, ne tey kehyuhen.
Tey kkoduhen tau yóm Dwata tekuy
6yóm Dwata tendo kenlungen yóm tau laen dù gmoen.
Bè yóm tehe deng klonihen béléu hatay, lenwaen o.
7Yó gónón hol mgel nawahu,
abay se tey hyu yóm nmò Dwata béléu.
8Deng lenwà Dwata o bè yóm hatay.
Kóhen yóm gónóhu gel mkik,
ne hensengen ke wen gónóu btang.
9Duhen ni, tolohe mowil, slomonge ke Dwata
bè nim benwu gónó le nô kem tau tolo mowil.
10Bè yóm tehe tô kwen gfau, tódô henlelu hemtahu bè Dwata
balù yóm klaen dù bud lanu gewà,
11ne balù yóm tey sidek klikou,
botong gmonu laen kô dù tau snaligu.
12Tedu tô blayu ke Dwata du
mò balau yóm tey hyu nmoen béléu?
13Angat wen yóm hyu gel ninum nwitu mò blayu du
mò gónóhu slamat béléen bè yóm kehewaen do.
14Yó he keblayu du nim fasadu ni
ke sok bud kól yóm gel kestifun yó kem kun tau.
15Tey le mebtes bè Dwata yó kem tau kenbong nawahen.
Tey sidek kegnómen du ke sotu bélê le matay.
16Ou se tóbóng lówóhem, Dwata.
Nimónu uu hol lómón yóm tehe kimón yê kóm.
Deng lenwaem ou lem hatay.
17Angat wen dsuu ebéléem mò gónóhu slamat béléem,
hmungu du yóm tey kdóyónu kóm.
18,19Bè yóm gel kestifun yó kem tauhem
bè yóm kóm Gónô bè Jirusalim,
bè yó gónóhu bemlay du kóm nim deng fasadu kóm ni.
Hol dóyón tekuy Dwata.
Currently Selected:
Kem Lingón 116: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
