Kem Lingón 112
112
1Hol dóyón tekuy Dwata.
Hligal kun yóm tau wen klikoen ke Dwata,
tendo hyu kegnómen du bè kimónen yó kem hlau Dwata.
2Yó kem ngaen, angat le tey mbegel lem benwu.
Ne yó kem semfu gu béléen, angat tey któbóng Dwata kul.
3Wen tey kendengen le
ne laen kô dù kmifót du yó kem hyu gel nmò le.
4Anien ke nô lem gónón kmifu yóm tau hyu kmoen,
sal gel hlayag Dwata lanen.
Hulung le bemlay ne hulung le kmodu,
ne tedeng kmò le.
5Hyu kun yóm tau mahil bemlay, yóm tau mahil hutóng
ne là lenugihen yó kem dumuhen bè udél swa.
6Yóm tau lómón yó kmoen, là kóen gemmò béléen yó kem sidek.
Yóm tau tedeng kmoen tendo gel hentulón nawa kem dumuhen tau.
7Là kô le likò anien ke sidek tulón sut bélê le,
abay se tey mbegel ksalig le du yóm kehtahu le ke Dwata,
mò semgyok kul.
8Là kô dê tnafa nawa le yó kem tau yó,
laen dù knikò le.
Tódô tngón le laen kô gmò le bélê le yó kem hmohon kul.
9Là sgafas nawa le bemlay yó kem tau élél.
Yóm kehyu nmò le laen kô dù tau kmifót du.
Tey mbegel ktau le,
ne tey kadat le du kem dumuhen.
10Yóm kul kmò yó, gel ton yó kem tau gel mò sidek,
deng le mom semdken beeng botong kebut le du.
Okóm yó kem tau sidek nmò le yó,
tódô le kendel lana lem benwu,
là balingen yó kem tô atul le.
Currently Selected:
Kem Lingón 112: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
