Kem Lingón 111
111
1Hol dóyón tekuy Dwata.
Ke gele mung stifun bè yó kem kun tau mò du yóm tedeng,
tey khotuhu gelu bemlay slamat ebè Dwata.
2Tey hentaw yó kem gel nmò Dwata.
Yake hol hendem le yó kem tau wen kligal le bè Dwata.
3Gel gfan bè kdê yó kem nmoen yóm tey keklóónen ne yóm tey kegetahen.
Ne yóm tey ktedengen, laen kô du tul sónen.
4Là kô klifót kem tau du yó kem hentaw ton nmò Dwata.
Tey hyu yóm Dwata tekuy, lelen tey kmodu tau.
5Sal gel benlayen ken yó kem tau smalig béléen,
là kô klifóten du yóm tehe kesfasad le.
6Deng hegfanen bè yó kem tauhen yóm tey kfasangen
mlan bè keblayen du kul yóm kul tonok yó kem dumu tau.
7Yóm kdê nmoen, sal tedeng, sal hyu,
ne hono gsalig yó kem hlauhen tekuy.
8Laen kô dù sónen yóm ktahuhen yó kem hlauhen yó
mò hol nimón tekuy lemwót lem but blutut tekuy.
9Deng hol tahu nsoken yó kem tauhen.
Laen dù tul sónen yóm fasaden kul.
Laen dù belenen yóm kun boluy, botong wen klikò te du.
10Yóm klikò le ke Dwata, yó se hol buten yóm khulung le hedem.
Yóm kdê tau mimón du, wen ofol le du yóm kimón le yó.
Bê tekuy nmò sónen yóm kdóyón tekuy du.
Currently Selected:
Kem Lingón 111: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
