Kem Lingón 106
106
1Hol dóyón tekuy Dwata.
Bemlay tekuy slamat ebè Dwata, yakà teyen hyu.
Yóm kbong nawahen tau là kóen monol, laen kô dù nan e són.
2Tau du se gembek tmulón du yó kem hentaw ton gel nmò Dwata?
Tau du se gembek hol dmóyón du?
3Hligal le kul yó kem tau ke tedeng nmò le bè kem dumu le,
ne ke tendo nmò le yóm hyu.
4Ó Dwata, hentulón nawam se ou ke deng bangem tmóbóng yó kem tauhem.
Ke lenwaem lu, lenwaem se ou,
5anì gbóte se do bè kehyu klowil yó kem tau deng nélékem,
ne anì gbóte hligal bè yó kem tauhem,
ne munge bélê le dmóyón kóm.
6Deng me gemsalà se kum, mkél me bè yó kem fù me,
deng me mò sidek, ya tey sidek yó kem nmò me.
7Bè yóm tehe knô le bè Idyip yó kem tehe fù me,
là hol kenmón le du yó kem hentaw ton gel nmò Dwata,
là hol hendem le du yó kem tey dê nmoen gónón hegfan du yóm kbong nawahen kul.
Ditu bè Mohin Hulô, deng mom natù le.
8Baluen ke lómón yó nmò le, sana kehewaen kul,
lanen dmohò yóm deng tehe fasaden kul,
ne mò gónón hegfan yóm tey kfasangen.
9Dóken mesgólól yóm Mohin Hulô.
Tahu se, tódô gfan yóm tonok mékéng.
Nalaken yó kem tau Israél mlan etlem sokol mohin, bè gónón mékeng tonok,
hol lómón kékéng yóm tonok bè yóm benwu laen hol wen tauhen.
10Lenwaen lu lem hólól yó kem hohon le,
nsoken lu bè yó kem tau hmohon kul.
11Ominen bud semfulék yóm él
ne gotu le lemneb yó kem hohon le,
laen kô dù mowil balù sotu.
12Omin yó kem tau yó he hemtahu yó kem fasaden kul,
ne sngal le yó kem sngal dmóyón du.
13Okóm là legenen bè yó, sana bud klifót le yóm deng nmoen,
ne là kô hangat le du yóm hlauhen kul.
14Okóm ditu bè yóm benwu laen hol wen tauhen,
bud tnilów le Dwata lan le alì tmalaw mni ken.
15Tahu se, blayen kul yóm hni le,
bede wen des mit hatay hmungen du.
16Timbow nélés nawa le Musis yó kem tau bè kamfù,
dalang se Aron yóm tau deng nélék Dwata, mò blóng tau ebéléen,
17tódô setngag tonok,
ne tódô le geblos etlaan le Datan ne Abiram,
ne yó kem dumu tau deng matù kul le Musis.
18Ominen wen ofi tódô btang lem blóng le,
gotu kenen yó kem dumu tau lemolò kul.
Gotu ken ofi yó kem tau gel mò sidek yó.
19Ditu bè Bulul Sinay, wen lennged safì blówón nmò le,
ne mtud le bukol bè solu yóm lennged blówón yó.
20Deng mom tles le yóm Dwata le alì geta
yóm lennged safì tudu mótób yó kem bnes.
21Deng klifót le Dwata yóm lemwà kul,
yóm deng mò yó kem hentaw ton bè Idyip,
22yóm mò yó kem alì tennga bè tonok Ham ne bè Mohin Hulô.
23Yó gónóm mon, tô genlà Dwata lu.
Okóm kendel hsóól Musis yóm tau nélék Dwata.
Hkodu Musis bè Dwata anì knogolen yóm alì kebuten kul, ne là genlaen kul.
24Yó bud nmò le, là móyô le husek elem yóm tey tonok hyu,
abay se là hentahu le du yóm deng fasad Dwata kul.
25Deng le mom tmalaw lem yó kem tolda le,
ne là kô dog nimón le ke Dwata.
26Yó gónóm mon, snafà Dwata yóm khatayen kul
bè yóm benwu laen hol wen tauhen,
27ne gotu senklahen yó kem semfu gu bélê le
bè yó kem dumu benwu,
hegefen lu ebè yó kem benwu mayuk.
28Omin yó kem fù tekuy, deng le mom mung tmaba ebè Baal bè Pyor,
ne balù yóm deng dsù le ebè matay, sana kken le du.
29Tey hebut le Dwata bè ni kem nmò le ni,
yó gónón wen des mit hatay sut lem blóng le.
30Okóm yó nmò Finihas, hnatayen yó kem tau mò salà yó,
ominen yó teflok yóm des mit hatay yó.
31Lemwót bè yóm nmò Finihas yó gónón tedeng kton Dwata du,
ne là kô klifót le du se kul yó kem tey kwen lugod le.
32Senged se ditu bè Él Miriba, tey bud hebut le Dwata,
gónón wen gfà Musis lemwót bélê le.
33Hebut le Musis, yó gónón mudél sidek.
34Yó kem tau Israél, là gotu genlà le kul yó kem tau nô ta tonok Kanan
lómón yóm deng hmò Dwata kul.
35Deng mom yó nmò le, mung le segbót bélê le,
ne lolò le yó kem sidek nmò le.
36Tmaba le ebè yó kem dwata lennged le,
ne yó se mit kul meglà.
37Balù kem ngà le, tódô dsù le ebè yó kem tulus seitan.
38Hnatay le yó kem ngà le logi ne kem ngà le libun,
kem ngà laen dù deng tngón le.
Bè yóm kedsù le kul ebè yó kem dwata lennged bè Kanan,
deng gholu le yóm tonok Kanan lemwót bè litô yó kem ngà le.
39Deng gholu le kul knô lemwót bè yó kem sidek gel nmò le.
Ne yóm alì kóyô le tmaba bè yó kem dwata lennged,
bè kton Dwata du, hol lómón ke deng le mò samuk béléen.
40Yó se gónó Dwata alì lembut kul yó kem tauhen,
ne tey kutó nawahen kul yó kem kun tau deng nfun.
41Blayen lu elem hólól yó kem hohon le,
ne yó kem tau kmutó nawa kul fen mogot kul.
42Tey kehegnok le kul yó kem hohon le,
ne baling hesek le lu.
43Dê dulék Dwata deng lemwà kul,
okóm mom senflós le là mimón du,
ne yó mit kul meglà yóm kegsalà le.
44Baluen ke lómón yó deng nmò le, sana tolo kkoduhen kul,
ne hnungolen yóm kehtóbóng le béléen.
45Hentulónen nawa yóm tehe senfasad le,
lemwót bè yóm là konolen yóm kbong nawahen kul,
yó gónón temles hendemen.
46Lemwót bè kun nmò Dwata, bud mulék kodu le kul yó kem tau tehe megef kul.
47Ó Dwata yóm hol gónó mogot, lenwaem mi.
Bud sentifunem mi gu bè yó kem benwu deng gónóhem e semkla kum
anì bemlay me slamat béléem,
ne hligal me dmóyón kóm.
48Hol megdóyón Dwata yóm Dwata yó kem tau Israél,
laen kô dù tul sónen yóm kegdóyónen yó.
Yóm kdéen tau, hol mon ye, “Tahu se yó.”
Hol dóyón tekuy Dwata.
Currently Selected:
Kem Lingón 106: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
