Kem Lingón 105
105
Lingón bè yóm kesgalak Dwata yó kem kun tau
1Hol tekuy gel bemlay slamat bè
Dwata.
Hol gel heglalag tekuy yóm kegetahen.
Tulón tekuy bè kem tau bè klamangen benwu yóm deng gendengen.
2Hol gel sngal tekuy yóm sngal dmóyón ke Dwata.
Hol tulón tekuy bè kdéen tau yó kem tey kdê hentaw ton gel nmoen.
3Hol dóyón tekuy yóm klaen dù belen yóm kun boluy.
Yóm kdê tekuy gel tmaba ebéléen, hol tekuy hligal.
4Hol hnebel ye Dwata ne yóm tey kgisen tmóbóng tekuy.
Senflós ye tendo mni ebéléen.
5,6Yu kem tau semfu gu bè Abraham
yóm tau tehe kun tóbóng lówó Dwata,
ne yu kem tau semfu gu bè Jakub
yóm tau tehe kun nélék Dwata,
hentulón ye nawa yó kem hyu tehe nmò Dwata, yó kem hentaw ton gel nmoen bélê le.
Dalang se yóm tehe gel kkukumen yó kem hohon le.
7Dwata se yóm gónó tekuy mogot.
Yó kem kun hlau, nmoen bè kdéen tau bè klamangen benwu.
8Ne yóm deng tehe fasaden yó kem kun tau,
laen kô dù sónen.
Anien ke hilu libu bud lugod le,
senged kdohoen yóm tehe fasaden yó.
9Ni se yóm deng tehe senfasad le Abraham.
Ne bud yó se fasaden ke Isak snéen yóm ngà Abraham.
10Bud fasaden ke Jakub mò lolò le.
Yóm kesfasad laen kô dù tul sónen bè yó kem tau Israél.
11Yó tehe fasaden kul, monen,
“Blayu kuy yóm benwu Kanan mò hol kuy benwu nfun.”
12Bè yóm tehe kmò Dwata bélê le fasad yó kem kun tau yó,
là deng le hol wen he,
tolo le tau milo bè Kanan.
13Tey dê benwu gónó le e semdakit menwu,
sal stólóng yó kem tau mogot du.
14Okóm là kô hlus Dwata du ke wen tau hemgnok kul.
Yó kmò kofinen kul, eles wen gel hetgamahen yó kem tau hol geta mogot benwu, yó monen mò kul,
15“Hol bê ye abay hensidek lu yó kem dou tau nélék.
Ne yó kem tugodu elem blóng le, bê ye abay hensidek lu.”
16Bè yóm kdaw yó, hbel Dwata yóm tey bitil bong bè benwu Kanan yóm gónó le nô,
ngangen efet gotu yóm ken le.
17Okóm eles wen tau hógów Dwata tukô gna kul ebè Idyip, duhen Jusif
yóm tehe hbalù le mò hesek.
18Bè yóm deng kkólen bè Idyip, kendina le tihen,
wen bala tók legiling sù le bè liholen.
19Song gewà, deng dohò yóm tehe eles tulónen kul angat sut bè benwu le.
Yóm eles tulónen kul yó, deng tehe eles hetngón Dwata du.
20Ominen hewà ke Jusif gu lem blanggù yóm tau hol geta bè Idyip,
yóm tau hol geta alì dê benwu knamalen.
21Yó hmoen ke Jusif, hkemen du yó kem tau mò nmò lem gónóen,
ne hogoten du yóm kdê knamalen.
22Hegetahen glalen senta yó kem dumu tau mogot kukum béléen.
Wen kwalis blayen du anì gbeken hmau yó kem tuha gónón gel hmungol hlau.
23Omin Jakub gdek bè Idyip yóm bnoluy le Israél,
ne nô bè tonok Ham yóm benwu gónón milo.
24Yóm knô le ditu, tey kehból Dwata kul,
ne hekgisen lu senta yó kem tau Idyip hmohon kul.
25Yó kmò kehlan Dwata du, baling knutó nawa le lu yó kem tau Idyip,
lel le smukat kul.
26Okóm hógów Dwata Musis ebè Idyip
yóm tau tóbóng lówóhen, mò lemwà yó kem tauhen bè yó.
Hmungen du Aron#105:26 Nim Aron nélék Dwata ni, twogu Musis. yóm sotu tau deng néléken.
27Wen tey hentaw ton hmò Dwata kul bè yó kem tau bè Idyip
mò gónón gdilô yóm khógówen kul.
28Tódô hkifu Dwata kemdaw yóm klamang benwu le,
okóm là kô nimón kem tau Idyip du yóm monen mò kul.
29Ne yóm él mlel bè benwu le, tódô henbaling Dwata litô,
ne gotu matay yó kem utón él nô lemen.
30Bud sotuhen bè yó, tódô hetfeng Dwata fak klamang benwu le.
Balù yóm hol gónón nô yóm tau hol geta, tódô hono fak.
31Bud lemwót bè udél Dwata,
tódô tfeng lenged ne lifet bè klamangen benwu le.
32Bud hetbóhen bulók kulón elem benwu le,
lelen lemték igoen là kmulón.
33Gotu hensideken yó kem lefà grép hulu le ne yó kem koyu fig le,
ne kdê yó kem dumu koyu, gotu le hugón kenfô leték.
34Bud lemwót bè udél Dwata,
tódô muluk yóm hol yéen tlangas mfól bè klamang benwu le.
35Gotu ken le kdéen hulu lem yóm benwu yó,
laen kô dù tagak du.
36Ngangen efet hfatay Dwata yóm ngà logi twogu
bè ket kmuleng bè yó kem tau Idyip.
Yóm ngà le bè tolo tukô nawa le.
37Omin Dwata malak kul hewà gu bè Idyip yó kem tau Israél.
Wen kem tahu blówón ne blówón bukay nit le.
Tódô kdê le sal hyu klówó le, ne tey le kemgis.
38Botong le likò kul yó kem tau Idyip,
song hyu nawa le deng le hewà bè yó.
39Bè yóm kalak Dwata kul,
wen lobun eles tendo gmolung kul ke kemdaw,
ne ke kifu, wen tey ofi nô talak kmawang mò lemayag ebélê le.
40Bè yóm igò le mógów, mni le utón bè Dwata.
Tahu se, wen holò lembang hwit Dwata ebélê le.
Wen mana hebtangen ebélê le gu bè longit
mò ken hegsengel nawa le.
41Sotu kdaw bè yó, tódô hesuten gu lem yóm botu bong yóm tey él mlel mò ninum le,
tódô hlelen elem yóm benwu là hyu menwu du.
42Abay se là kô klifóten du yóm deng fasad mget tehe nmoen bè Abraham yóm kun tau tóbóng lówó.
43Duhen yó, gotu niten lu hewà gu bè Idyip yó kem tau deng kun nélék.
Ya tey kligal le, lel tey hensag le ne tey kesngal le.
44Tódô blayen kul yóm tonok tólóng tau deng hnulenen,
tles hfunen kul yó kem hulu le.
45Yó gónón mò du bè yó kem tau néléken yóm yó,
anì nimón le yóm kun hlau kul ne yóm kun hlolò kul.
Hol tendo dóyón tekuy dé Dwata.
Currently Selected:
Kem Lingón 105: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
