Kem Lingón 107
107
BOK 5
Kem Lingón 107—150
1“Hol ye gel slamat ebè
Dwata abay se tey hyu kmoen ebélê tekuy.
Laen kô dù sónen yóm kbong nawahen tekuy.”
2Hol gel sensulit ye yóm keslamat ye bè Dwata yó,
yu yem kdéen deng lenwaen.
Abay se deng lenwaen yu lem tdok yó kem hohon ye,
3ne deng niten yu hewà gu bè yó kem tólóng benwu mayuk,
bè yó kem benwu fi dmata kdaw ne fi gu desdef,
ne fi gu debwak ne fi gu leged.
4Wen se bélê le tehe tabag lem yóm benwu laen hol wen tauhen,
yóm benwu laen dù lan gu lemen.
Là bud ton le du lan le ebè yóm benwu gónô le e tô menwu.
5Tey sidek kbitil le, tey sidek kleeng le
efet laen dù bud gónón e mefet nawa le.
6Mom yó he ktaba le ebè Dwata deng wen gfà le,
ne lenwaen lu lem yóm tey gónó le glayam.
7Nalaken lu ebè yóm lan tedeng bè yóm benwu knóón mò gónó le menwu.
8Là gbek le du ke là dóyón le ke Dwata
bè yóm là konolen yóm kbong nawahen kul,
ne bè yóm tey kehyu yóm deng nmoen bélê le.
9Hegsengelen nawa yó kem meeng,
ne hegtuhen yó kem bitil bè yó kem hyu deng blayen kul.
10Wen se bè yó kem tehe tau yó ekni, geblanggù,
nô le lem yóm tey gónón kmifu.
Kendina le lu lem blanggù, ya tey keglayam le.
11Yó gónón wen gfà le abay se deng nulé le yó kem hlau Dwata
yóm Dwata laen dù là gbeken du.
Ne deng kenbê le yó kem hloloen kul.
12Ya tey keglayam le mò nmò efet laen dù bud kgis le.
Tódô le kem masà bè gónó le mò nmò,
ne laen dù tau tmóbóng kul.
13Mom yó he ktaba le ebè Dwata deng wen gfà le.
Ne lenwaen lu lem yóm tey gónó le glayam.
14Hewaen lu bè yóm tey gónón kmifu gónó le nô.
Gotu hentohen yóm kdina fét le kul.
15Là kô gbek le du ke là dóyón le ke Dwata
bè yóm là konolen yóm kbong nawahen kul,
ne bè yóm tey kehyu yóm deng nmoen bélê le.
16Gotu genbaen bélê le yó kem tey bak tikeb blanggù hen-get bala tók ne gotu tenfoken yó kem bala tók bè yóm blanggù yó.
17Wen se bè yó kem tehe tau yó ekni, nungel.
Wen des le lemwót bè yó kem salà le,
ne lemwót bè yó kem sidek gel nmò le gónó le alì glayam.
18Balù udì ke móyô iwól le mken,
udì duen gónó le là matay.
19Mom yó he ktaba le ebè Dwata deng wen gfà le.
Ne lenwaen lu lem yóm tey gónó le glayam.
20Gotu kóhen yó kem des le lemwót bè tek olo udélen,
yó gónó le là hlós matay.
Ne lenwaen lu bè yóm tô hatay le.
21Yake hol dóyón le Dwata
bè yóm là konolen yóm kbong nawahen kul,
ne bè yóm tey kehyu yóm deng nmoen bélê le.
22Yake hol le demsù ebéléen mò gónó le slamat béléen,
ne hlan le bè yóm kehligal le semngal.
Yake hol tulón le du yóm deng nmoen bélê le.
23Wen se bè yó kem tehe tau yó ekni, mò le nmò bè kafal,
yó se kul gónó mebel klowil.
24Deng ton le se kul yóm tey kegbek Dwata,
ne yóm tey tennga nmoen bè yóm knô le talak mohin.
25Olon lemwót bè udél Dwata, tódô mbel yóm tey lenos bong,
ngangen ne tey lewók te mohin.
26Tódô megtungkà etta yóm kafal,
ne bud mung etlaan bè yóm kógów lewók.
Ya tey sidek klikò le yó kem tau mit kafal,
botong lana bélê le kfól nawa le.
27Gotu le glénggé, lómón yó kem tau lengel.
Laen kô dù bud gmò le balù yòm tey khulung le mit kafal.
28Mom yó he ktaba le ebè Dwata deng wen gfà le.
Ne lenwaen lu lem yóm tey gónó le glayam.
29Tódô tenflok Dwata yóm tey lenos bong,
ne tódô menek yóm tey lewók.
30Tey kehyu nawa le lemwót bè yóm deng kenek mohin.
Omin Dwata mit kul ebè kilil ebè yóm gónó le e dmuung.
31Yake hol dóyón le Dwata
bè yóm là konolen yóm kbong nawahen kul,
ne bè yóm tey kehyu yòm deng nmoen bélê le.
32Yake hol tulón le lem blóng yó kem tau gel stifun yóm tey kegeta Dwata,
ne hol dóyón le lem blóng yó kem tau gónó le galak bè yóm gel kestifun le.
33Yóm Dwata, deng tódô hektihen yóm él mlel,
ne deng hektihen yó kem tbul él.
34Ne yóm tonok hyu mò hulu tahen,
deng henbalingen tonok laen dù bud hulu tmowok du.
Yó gónón mò du yóm yó, lemwót bè yóm sidek nmò yó kem tau nô tahen.
35Okóm yóm tonok balù udì ke wen élen,
deng wen busung él nmò Dwata bè yó.
Ne yóm tonok alì mékéng laen dù élen,
deng tódô wen él hetbulen bè yó.
36Ne wen yó kem tau bitil suen bè yó anì menwu le bè yó,
ne hlós hdà le yóm benwu le bè yó.
37Gotu le mò hulu bè yó kem tonok le,
hulu le yó kem grép ne tey bong guta le du.
38Tey któbóng Dwata yó kem kun tau, ne tey kehbólen kul.
Balù yó kem ógóf le, laen kô mtón bélê le.
39Bè yóm tehe kdaw laen dù gmò le bè yó kem hohon le yó kem tau Dwata,
tey kehyak le kul, ne tey kdà le kul elaan,
ya tey sidek keglayam le.
40Yó nmò Dwata, bud tles nmoen bè yó kem hmohon
kul yóm tehe nmò le bè yó kem kun tau.
Gotu htabagen lu bè yó kem benwu là hyu menwu du,
bè yó kem benwu laen dù lan gu lemen.
41Okóm fen lenwaen yó kem tau élél bè yóm tey gónó le glayam,
ne tey kehbólen kul lómón kból yó kem ógóf.
42Ni kem nmò Dwata ni, gotu ton yó kem tau tedeng kmò le, ya tey kligal le.
Okóm yó kem tau sidek nmò le, là kô le gudél kul.
43Yó kem tau hulung hedem,
hol hendem ye ni kem deng tulónu kuy ni koni.
Hol hendem ye yóm là konolen yóm kbong nawa Dwata kuy.
Currently Selected:
Kem Lingón 107: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
